काठमाडौं– लामो समयदेखि घरजग्गा तथा सम्पत्ति कर नतिर्ने ठूूला करदाताप्रति काठमाडौं महानगरपालिका कठोर बन्न थालेको छ । विगत २८ वर्षदेखि कर नतिने ठूला करदाताप्रति महानगरले कठोर कदम चाल्न लागेको हो । पटक–पटक सूचना जारी गर्दा, कर नतिर्नेको विवरण सार्वजनिक गर्दासमेत कर असुल नभएपछि महानगरले नयाँ जुक्ति निकालेको छ । महानगरले अब विवरण सार्वजनिक गर्दासमेत कर तिर्न अटेर गर्नेको घर तथा कार्यस्थलमा नाचगानसहितको कार्यक्रम लिएर जाने तयारी गरेको छ ।
महानगरपालिकाले आउँदो बुधबारदेखि पञ्चेबाजासहित कर असुलसम्बन्धी लोक तथा दोहोरी गीत बजाएर घरजग्गा र सम्पत्ति कर नतिर्ने ठूला करदातासमक्ष पुग्ने र गीतमार्फत कर नतिर्ने करदाताका बारेमा जानकारी गराउने कार्यतालिका बनाएको छ । करदाताबारे जानकारी दिएर गीत तयार गर्न र पञ्चेबाजा बनाउन बालाजुको एक महिला पञ्चेबाजा समूहलाई जिम्मा दिइएको छ । महिलाहरूको समूहले पञ्चेबाजा बजाएर नाचगान गरेपछि महानगरपालिकाले माइकिङ गरेर कर तिर्न आह्वान गर्नेछ । त्यसपछि पनि अटेर गर्नेको सेवा बन्द गरेर बाँकीसरह असुल गर्ने प्रक्रियामा जाने महानगरपालिकाले तयारी गरेको छ ।
रचनात्मक ढंगले करदातालाई कर तिर्न आग्रह गर्न गर्न लागेको राजस्व महाशाखा प्रमुख डा.शिवराज अधिकारीले जानकारी दिए । उनले भने, ‘पञ्चेबाजासँगै कर तिर्न आग्रह गर्दै नाचगान पनि हुन्छ ।’ यसअघि पनि महानगरपालिकाले करदाता व्यक्ति तथा संस्थाको घर तथा कार्यालय परिसरमा पुगेर माइकिङ गरेको थियो ।
महानगरपालिकाले गत १६ असार र साउनको अन्तिम साता गरी कर नतिर्ने ७२ ठूला करदाताको नाम सार्वजनिक गरी ३० दिनभित्र सम्पर्क गर्न आग्रह गरेको थियो । महानगरले सार्वजनिक सूचना, आवश्यकताका आधारमा निवेदन, फोनमार्फत पटकपटक जानकारी गर्दा पनि धेरैले अटेर गर्दै आएका छन् ।
आफ्नो विवरण लिएर सम्पर्कमा आए नियमअनुसार महानगरबाट दिइने कर छुट सुविधा प्राप्त गर्न सकिने र अझैँ आलटाल गरिरहे थप समस्या हुने जनाउँदै इमान्दार भएर कर तिर्न निजी र अर्धसरकारी संघ संस्थालाई अनुरोध गरिएको छ । कर नतिर्नेमा नेपाल स्काउट, साझा भण्डार, राष्ट्रिय नाचघर, चेम्बर भवन, कर्मचारी सञ्चयकोष भवन, नेपाल रेडक्रस सोसाइटी, नेपाल विद्युत् प्राधिकरण, नेशनल ट्रेडिङ लिमिटेड, जय नेपाल हल, इम्पेरियल अपार्टमेन्ट, कान्तिपुर होटल, शिशु अर्याल होटल, ग्याङ्जोङ (हाल ले हिमालय), सिटी होटल्स, शुभकामना हाउजिङ डेभलर्पस प्रालि छन् ।
यसैगरी ओम सान इन्टरनेशनल कलेज (हेल्पिङ ह्यान्ड्स), गोपीकृष्ण मुभिज प्रालि, झिग्मी सिग्मी पर्वल विष्ट, काठमाडौँ जेसिस, सिग्नेचर अपार्टमेन्ट, अम्बे कम्प्लेक्स, टाउन डेभलपर्स प्रालि, राजेन्द्रकुमार कावरा, ब्लुबर्ड इन्भेष्टमेन्ट, होटल प्लाटिनियम, बुद्ध महल, सिद्धार्थ वनस्थली स्कुल, जनमैत्री अस्पताल, सिटी सेन्टर, ह्वाइट फिल स्कुल र केएल टावरलगायतले लामो समयदेखिको कर तीर्न बाँकी छ । कर नतिर्ने अर्धसरकारी संस्थाले आफूहरू पनि सरकारी रहेकाले तिर्न नपर्ने जिकिर गर्दै आएका छन् ।
सूचना सार्वजनिक गरेपछि हालसम्म करिब रु तीन करोड बक्यौता रकम असुल गरिएकोे छ । सम्पर्कमा आएकामध्ये चार व्यापारिक प्रतिष्ठानले पहिलो चरणमा रु. एक करोड ५३ लाख राजस्व बुझाएका छन् । यसरी कर बुझाउनेमध्ये सबैभन्दा धेरै युनाइटेड विल्डर्स एण्ड इञ्जिनियरिङ (वल्र्ड टे«ड सेन्टर)ले रु एक करोड बुझाएको छ । यससँगै बिल्डर्सका प्रबन्ध निर्देशक सन्दीप हिराचनले चाँडै सम्पत्तिको मूल्यांकन गरेर तिर्नुपर्ने कर दाखिला गर्ने गरी राजस्व विभागमा निवेदन दिएका छन् ।
वडा नं १४ को नेशनल हस्पिटलले रु २४ लाख, वडा नं १४ कै सहिद मेमोरियल हस्पिटलले रु १९ लाख २० हजार दाखिला गरेका छन् । नाम सार्वजनिक भएपछि वडा नं ११ को एनआरटी क्लबले रु १० लाख दाखिला गरेर बाँकी रकम तिर्ने प्रतिबद्धता जनाएको छ । धेरैले आफ्नो घरजग्गा र सम्पत्तिका बारेमा विवरणसमेत बुझाएका छैनन्, तर लामो समयदेखि कर तिर्न आलटाल गरिरहेका करदाताबाट
विभागले रु ७० करोड असुल गर्ने लक्ष्य लिएको छ ।
