धनगढी– कैलाली र कञ्चनपुर र झापामा स्थानीय प्रशासनले १० भदौसम्म निषेधाज्ञा थप गरेको छ । त्यस्तै रूपन्देहीमा जारी निषेधाज्ञा १५ भदौसम्म लम्बिएको छ भने डोटीमा ३१ भदौसम्म निषेधाज्ञा थप गर्ने निर्णय गरिएको छ ।
सोमबार कैलालीका प्रमुख जिल्ला अधिकारी खगेन्द्रप्रसाद रिजालले कोभिडको तेस्रो लहरको सम्भावना कायम रहेको भन्दै जारी निषेधाज्ञालाई १० भदौसम्म जिल्लाभर निरन्तरता दिने आदेश गरेका छन् ।
प्रजिअ रिजालद्वारा जारी आदेशमा सार्वजनिक स्थानमा हिँड्डुल गर्दा अनिवार्य मास्कको प्रयोग गर्न आग्रह गरिएको छ । मास्कको प्रयोग नगर्नेलाई प्रचलित कानुन बमोजिम मंगलरबारदेखि नै जरिवाना गरिने पनि प्रशासनले जनाएको छ ।
जारी आदेशको पालन गर्न अनुरोध गर्दै उल्लंघन गर्नेलाई प्रचलित कानुनबमोजि कारबाही हुने कुरासमेत आदेशमा उल्लेख गरिएको छ ।
कञ्चनपुरमा पनि १० भदौसम्मका लागि निषेधाज्ञा थप गरिएको छ । प्रमुख जिल्ला अधिकारी रामप्रसाद पाण्डेले सोमबार नयाँ भेरियन्टसहितको संक्रमण दरमा कमी आए पनि जोखिम कायमै रहेको भन्दै निषेधाज्ञा थप गर्ने आदेश गरेका हुन् ।
जारी आदेशअनुसार मानिसको बढी भीडभाड हुने सबै प्रकारका सम्मेलन, संग्रहालय, सिनेमा हल, पार्टी प्यालेस, रेस्टुरेन्ट, खेलकुदलगायत कार्यक्रम सञ्चालन गर्न पाइने छैन । त्यस्तै शैक्षिक संस्थाहरूले भौतिक रूपमा उपस्थित गराउन पाउने छैनन् ।
त्यस्तै रूपन्देहीमा जारी निषेधाज्ञा भदौ १५ गतेसम्मका लागि लम्बिएको छ । सोमवार बसेको डिसिसिएिमसीको बैठकले भदौ १५ गते राति १२ बजेसम्म निषेधाज्ञालाई निरन्तरता दिने निर्णय गरेको जिल्ला प्रशासन कार्यालय रूपन्देहीका प्रवक्ता सहायक प्रमुख जिल्ला अधिकारी विजयराज पौडेलले जानकारी दिए ।
तिज नजिकिँदै गरेकाले विभिन्न होटल तथा पार्टी प्यालेसमा कार्यक्रम गर्दा कोरोना संक्रमणको जोखिम बढ्ने भएकाले निषेधाज्ञालाई निरन्तरता दिइएको छ ।
कोरोना संक्रमण तीव्र रूपमा बढ्दै गएपछि वैशाख १६ गतेबाट जिल्लामा निषेधाज्ञा जारी भएको थियो । संक्रमणदर घट्दै गएपछि असारबाट निषेधाज्ञा क्रमशः खुकुलो गर्दै लगिएको छ । अहिले व्यापार व्यवसाय तथा यातायात सबै सञ्चालन भइसकेका छन् ।
पर्वलाई लक्षित गर्दै हुने सामूहिक कार्यक्रममा कडाइ गरिने छ भने यसअघि जारी भएको आदेशलाई निरन्तरता दिने निर्णय जिल्ला स्तरीय कोरोना संकट व्यवस्थापन केन्द्र डिसिसिएमसीले गरेको प्रवक्ता पौडेलले बताए ।
डोटीमा पनि एक महीना निषेधाज्ञा थप गरिएको छ । जिल्ला कोभिड–१९ संकट व्यवस्थापन केन्द्र (डिसिसिएमसी) को बैठकले डोटीमा भदौ ३१ गतेसम्म निषेधाज्ञा थप गर्ने निर्णय गरेको हो ।
निषेधाज्ञाको समयमा जिल्लाभित्र यातायातका सम्पूर्ण सवारीसाधन चलाउन भने पाइनेछ । पार्टी प्यालेस, जिमखाना र स्विमिङ पुलबाहेकका अन्य सबै प्रकृतिका पसलहरू बिहान ६ बजेदेखि साँझ ७ बजेसम्म सरकारले तोकेको स्वास्थ्य मापदण्डको पूर्ण पालना गरी खोल्न पाइने डोटीकी निमित्त प्रमुख जिल्ला अधिकारी किरण जोशीले बताइन् ।
निषेधाज्ञाको समयमा अनावश्यक हिँड्डुल गर्न, भीडभाड गर्न, कुनै प्रकारका भेला जात्रा महोत्सव, सभा, सम्मेलन, तालिम गोष्ठी, खेलकुदलगायत सञ्चालन गर्न नपाइने जिल्ला प्रशासन कार्यालयले जनाएको छ । शैक्षिक संस्था, प्रशिक्षण केन्द्र ट्युसन सेन्टर भर्चुअल माध्यमबाट मात्र सञ्चालन गर्न सकिने जनाएको छ ।
कोरोना महामारीको उच्च जोखिममा रहेको झापामा स्थानीय प्रशासनले सार्वजनिक तथा निजी सवारीसाधन सञ्चालन खुला गरेको छ ।
जिल्ला प्रशासन कार्यालयले सोमबार रातिदेखि लागू हुने गरी निषेधाज्ञा १० दिन थप गरेको छ । तर सवारीसाधन सञ्चालन भने खुला गरिएको छ । यसअघि पछिल्ला निषेधाज्ञामा सवारी साधन सञ्चालन गर्न पाइने व्यवस्था थिएन ।
