काठमाडौं– लामो समयदेखि नेपाली फिल्म क्षेत्रबाट टाढा रहेका निर्माता, निर्देशक तथा कलाकार युवराज लामाले फेरि सोही क्षेत्रमा फर्कने घोषणा गरेका छन् । विशेषतः राष्ट्रिय खेलकुद परिषदको सदस्य सचिव भएपछि फिल्म क्षेत्रबाट टाढिएका उनले अब आफू फेरि फिल्म निर्माण र निर्देशनमा फर्कन लागेको घोषणा गरेका हुन् । उनले सामाजिक सञ्जालमा आफूले फिल्मका लागि कथा लेख्न थालेको र यो पूरा भएपछि पटकथा र सम्वाद लेखनमा लाग्ने जानकारी दिएका छन् ।
फिल्म निर्माण र निर्देशनमा आफ्नो पछिल्लो संलग्नतालाई उनले ‘दोस्रो इनिङ’को संज्ञा दिएका छन् । उनले फेसबुकमा लेखेका छन्, ‘कथा भेटियो, आजबाट वान लाइनर लेख्न सुरु भयो ।
सकिने बित्तिकै पटकथा अनि सम्वाद लेख्न सुरु गर्ने विचारमा पुगियो । विभिन्न जिम्मेवारी र अभियानको कारण विश्राम लिएको चलचित्र निर्माण र निर्देशनमा दोस्रो इनिङ पुनः प्रवेश गर्ने प्रयास हुँदै ।’
एक समय फिल्म निर्माण, निर्देशन र अभिनयमा सक्रिय व्यक्ति हुन्, लामा । ‘मन मन्दिर’, ‘कन्यादान’, ‘जीवन संघर्ष’, ‘देश परदेश’, ‘माउते दाइ’, ‘प्रतिज्ञा’, ‘दुलहा राजा–दुलही रानी’, ‘खेलौना’, ‘गोरेटो’लगायतका फिल्मको निर्माण र निर्देशन गरेका उनले दुई दर्जन बढी फिल्ममा सशक्त अभिनय पनि गरेका छन् । उनलाई आज पनि दर्शकले फिल्म ‘देउता’ चलचित्रको ‘निमा’ भनेर चिन्ने गर्दछन् ।
‘धर्मात्मा’पछि फिल्म निर्माण र निर्देशनबाट टाढा भएकाले उनी एक वर्ष चलचित्र विकास बोर्डमा आवद्ध भए । त्यसैबेला तत्कालीन नेकपा माओवादीमा प्रवेश गरेका उनले चार वर्ष राष्ट्रिय खेलकुद परिषदको सदस्य सचिवको जिम्मेवारी पनि सम्हाले । ०७२ सालपछि होटल तथा पर्यटन व्यवसायमा लागेका उनले डेढ दशकपछि फिल्म निर्माण र निर्देशनमा कमब्याक गर्ने भएका छन् ।
कोरोनाका कारण धरासायी बनेको फिल्म क्षेत्रलाई जोगाउन आफू फिल्म निर्माण र निर्देशनमा फर्किन लागेको उनले बताएका छन् । उनी आफू शून्यबाट उठ्न लागेका बताएका छन् । शून्यबाट उठ्न लागेका कारण शून्यमा रिस्क नहुने उनको बुझाइ छ । अब बन्ने फिल्मको विषयवस्तु मानिसको पोजेटिभ र नेगेटिभ मनोविज्ञानमाथि आधारित हुने उनले जानकारी दिए । लामाले पछिल्लोपटक फिल्म ‘सरौतो’मा अभिनय गरेका थिए ।
