काठमाडौं– गोंगबुको नयाँ बसपार्कबाट सञ्चालन हुने सार्वजनिक यातायातका सवारी साधनको टिकट कम्प्युटराइज्ड प्रणालीबाट काट्न थालिएको छ । यसअघि यात्रुलाई यातायातकर्मीले हातले कागजमा लेखेर टिकट दिने गरेकोमा अबदेखि बसको टिकट कम्प्युटरमार्फत बनाउन थालिएको हो । यात्रुको सुविधा तथा टिकटदरमा फरक नपरोस् भनेर यो प्रणाली प्रयोगमा ल्याइएको बताइएको छ ।
काठमाडौं महानगरपालिका र ल्होत्से बहुउद्देश्यीय प्रालिबीच ‘सार्वजनिक–निजी साझेदारी’अन्तर्गत सम्झौता भई ०५६ सालदेखि सञ्चालनमा आएको नयाँ बसपार्कभित्रका टिकट काउण्टरलाई अन्तर्राष्ट्रियस्तरको टिकट काउण्टर बनाउने उद्देश्यअनुरूप कम्युटर जडान गरी बस टिकट काट्न सुरु गरिएको छ । गत १ वैशाखदेखि कोरोना महामारीका कारण बन्द गरिएको टिकट काउण्टर केहीसमय पहिलेदेखि सञ्चालनमा ल्याइएको थियो । कोरोना भाइरसको संक्रमण केही कम भएसँगै निषेधाज्ञा खुकुलो पारिएको छ । निषेधाज्ञा खुकुलो पारिएपछि उपत्यकामा लामो तथा छोटो दूरीका सवारीसाधन सञ्चालनमा आएका छन् । लामो दूरीका सवारीसमेत सञ्चालनमा आएपछि खुलेको बसपार्कमा कम्प्युटरको प्रयोग गरी टिकट काट्न थालिएको छ । टिकट काउण्टरलाई ‘डिजिटल प्रणाली’मा लगेसँगै अब टिकट काउण्टरमा बस्ने कर्मचारीले अनिवार्य पोशाक र परिचयपत्र लगाउनुपर्ने व्यवस्था गरिएको छ । प्रविधिको प्रयोगसँगै यात्रुले अब कुन कम्पनीको कति नम्बरको गाडी कुन समयमा कुन गन्तव्यस्थानमा कति यात्रु लिएर जान्छ भन्ने कुरा स्पष्ट थाहा पाउन सक्छन् ।
कम्युटर प्रणाली अपनाएसँगै गाडीमा सिट भए वा नभएको प्रष्ट थाहा पाउने हुनाले आफूले चाहेको टिकट सजिलै काट्न सकिन्छ । नयाँ बसपार्कबाट हाल ६५ भन्दा बढी जिल्लामा एसी, डिलक्स र साधारण खालका सार्वजनिक सवारी साधन आवतजावत गर्दै आएका छन् । नयाँ बसपार्कभित्रका ३२ टिकट काउण्टरले हाल कम्युटर प्रणालीमार्फत बसको टिकट काट्न सुरु गरेका छन् ।
यसअघि यो प्रणाली सञ्चालनमा ल्याइनुपूर्व अनधिकृत व्यक्तिहरूले यात्रुलाई ठग्ने, भाडा मनपरी लिने, सोझा सिधा यात्रुलाई बढी भाडा लिने र एउटै सिटका लागि धेरै टिकट काटेर यात्रुलाई दुःख दिने गरेको गुनासो सुनिने गरेको थियो । अब त्यस्ता गुनासो ‘डिजिटलाइज्ड टिकट काउण्टर’ले समाधान गर्ने अपेक्षा गरिएको छ ।
ल्होत्सेले सरकारले लिएको नीतिअनुसार कोभिड–१९ संक्रमणपछि हुने भीडभाडलाई ध्यानमा राखेर प्रविधिको प्रयोगलाई जोड दिएको हो । बस टिकट खरिद तथा बुकिङका लागि क्युआरकोडमार्फत भुक्तानी हुने व्यवस्था मिलाएको छ । ल्होत्सेले लक्ष्मी बैंक लिमिटेडको सहकार्यमा उक्त सेवा सञ्चालन गरेको हो ।
ल्होत्से बहुउद्देश्यीय प्रालिका अध्यक्ष इञ्जीनियर दीपक कुँवर टिकट काउण्टरलाई प्रविधिमा लगेसँगै बसपार्कका काउण्टरमा हुने भीडभाड र यात्रु तानातानको अवस्था अन्त्य हुने बताउनुहुन्छ । नयाँ बसपार्कलाई अन्तर्राष्ट्रियस्तरको बसपार्कका रूपमा विकास गर्ने लक्ष्यअनुसार काउण्टरमा प्रविधिको प्रयोगलाई जोड दिइएको अध्यक्ष कुँवरको भनाइ छ ।
ल्होत्सेले नयाँ बसपार्कभित्र चालक, सहचालक र यात्रुलाई सहुलियत दरमा खान र बस्नका लागि होटल तथा लजसमेत सञ्चालनमा ल्याएको छ । काठमाडौं महानगरपालिकाको वडा नं २६ मा रहेको नयाँ बसपार्क ६१ रोपनी क्षेत्रफलमा फैलिएको छ । ल्होत्सेले यातायात व्यवसायीसँगको सहकार्यमा लामो दूरीबाट आएका चालक, सहचालक र यात्रुलाई रातको समयमा खान तथा बस्नका लागि बिचल्ली नहोस् भन्ने उद्देश्यले होटल तथा लज सञ्चालनमा ल्याएको ल्होत्सेका मानव संशाधन प्रमुख पंकज मल्लले बताए ।
