काठमाडौं– काठमाडौं उपत्यकाबाट चल्ने लामो दूरीको सवारी साधन मनोहरा खोला कोरिडोर वा सल्लाघारीबाट सञ्चालन गर्न उपयुक्त हुने एक अध्ययन प्रतिवेदनले देखाएको छ । उपत्यकाको ट्राफिक व्यवस्थापनका लागि ती दुई मध्ये एक स्थानबाट लामो दूरीका
सवारीसाधन सञ्चालनमा ल्याइए उपयुक्त हुने अध्ययनको निष्कर्ष निस्केको हो । काठमाडौं महानगरपालिकाले गठन गरेको यातायात सञ्चालनसम्बन्धी अध्ययन कार्यदलले तयार पारेको प्रतिवेदनमा ति दुई स्थानमा बसपार्कका लागि पर्याप्त जग्गा रहेको, र ती स्थानबाट सवारी सञ्चालन गर्दा सहज हुने निष्कर्ष निकालेको हो ।
काठमाडौं महानगरपालिकाकी उपप्रमुख हरिप्रभा खड्गीको संयोजकत्वमा गठित ‘कामपा भएर गुड्ने लामो दूरीका सार्वजनिक सवारी साधन व्यवस्थापन अध्ययन समिति’ले तयार पारेको प्रतिवेदन नगर प्रमुख विद्यासुन्दर शाक्यलाई हस्तान्तरण गरेको छ । महानगरले ठूला सार्वजनिक सवारी साधनको ‘पिक एन्ड ड्रप’ लाई थप व्यवस्थापन गर्नका लागि एक हप्ताअघि कार्यदल गठन गरिएको थियो ।
तीनबुँदे उक्त प्रतिवेदनमा तत्काल सार्वजनिक यात्रुवाहक ठूला सवारी साधनको व्यवस्थापन जडीबुटी पुल पूर्वको मनोहरा खोला करिडोर सर्मत–सम्भार गरी वा सल्लाघारी तीनकुने सडक किनाराबाट धुलिखेल पूर्वतर्फका सार्वजनिक सवारी सञ्चालन गर्न सकिने उल्लेख छ । संघीय सरकार, प्रदेश सरकार, उपत्यकाभित्रका पालिका र सवारी साधन व्यवसायीको समन्वय, सहकार्य र लागत सहभागितामा सवारी साधनको कार्य प्रकृति तथा सञ्चालन हुने दूरीका आधारमा लामो दूरी र सहरी यातायातका छुट्टाछुट्टै सवारी साधन टर्मिनलको विकास गर्न आवश्यक रहेको पनि प्रतिवेदनमा भनिएको छ ।
हाल काठमाडौं महानगरपालिकाले खुला मञ्चबाट सञ्चालित बसपार्क हटाएर सिटी यातायातका लागि ‘पिक एन्ड ड्रप’ र मध्यम दूरीका यातायातलाई नयाँ बसपार्कबाट सञ्चालन गर्ने व्यवस्था गरेको छ । नेपाल यातायात व्यवसायी राष्ट्रिय महासंघले अर्को व्यवस्था नभएसम्मका लागि खुला मञ्चमा साबिकबमोजिम बसपार्कका रूप्मा प्रयोगका लागि माग गरे पनि महानगरपालिकाले त्यो सम्भव नहुने बताउँदै आएको छ ।
प्रतिवेदनमा काठमाडौँ उपत्यकामा १४ लाख विभिन्न खाले सवारी सञ्चालनमा रहेको र त्यसमध्ये ८० प्रतिशत सवारी काठमाडौं महानगरपालिका क्षेत्र भएर सञ्चालन हुने पनि जानकारी दिएको छ । खुला मञ्चबाट सञ्चालन भएको बसपार्क गत १७ वैशाखबाट बन्द गरेको थियो । खुला मञ्च बन्द भएपछि यातायात व्यवसायीले उपयुक्त स्थानको माग राख्दै आएका छन् । व्यवसायीको मागका विषयमा अध्ययन गर्न १५ साउनमा बसेको महानगरपालिकाको ६५औँ कार्यपालिका बैठकले उपप्रमुख खड्गीको संयोजकत्वमा पाँच सदस्यीय समिति गठन गरेको थियो । खुलामञ्चबाट बसपार्क सञ्चालन गर्दा ट्राफिक व्यवस्थापनमा असहज भएको र शहरमा प्रदुषणको मात्रा बढेको विभिन्न क्षेत्रबाट गुनासो आइरहेको छ ।
दरबार हत्याकाण्ड अगाडि तत्कालीन युवराज निराजन शाहका लागि दरबार बनाउन प्रारम्भिक तयार गरिसकेको यो जग्गामा पछि भक्तपुर नगरपालिकाले मेडिकल कलेज, भक्तपुर क्षेत्र नं २ का सांसद महेश बस्नेतले खेलकुद मैदान, मानव अंग प्रत्यारोपण केन्द्रलगायत विभिन्न निकायबाट विभिन्न संरचना बनाउन माग गरेका थिए ।
०७२ सालको विनाशकारी महाभूकम्पपछि भने भक्तपुर जिल्लाको एक मात्र ठूलो खुला क्षेत्रका रूपमा रहेको यो चौरलाई विपद् व्यवस्थापनका लागि प्रयोग गर्ने गरी खुला नै राख्नुपर्ने भक्तपुरका बासिन्दाले आवाज उठाउँदै आएका छन् ।
