ओखलढुंगा– डिभिजन वन कार्यालय ओखलढुंगाका प्रमुखले ज्ञानकुमार लामाले घुस रकम दिन इन्कार गर्ने सेवाग्राहीलाई अनुदान उपलब्ध गराउन इन्कार गरेपछि सेवाग्राहीले मर्कामा परेको भन्दै क्षतिपूर्ति माग गरेका छन् ।
विनियोजित बजेट कार्यन्वयनको शिलशिलामा छनोट भएका सेवाग्राहीलाई तोकिएको काम गर्न लगाएर आर्थिक वर्षको अन्त्यमा रकम भुत्तानी नदिएर सेवाग्राहीह्रूले क्षतिपूर्ति माग गर्दै उद्योग पर्यटन वन तथा वातवरण मन्त्रालयका सचिव समक्ष उजुरी गरेको भए तापनि त्यसको सुनुवाइसमेत नभएको उनीह्रूको गुनासो छ । आर्थिक वर्ष ०७७/७८ का लागि विभिन्न शिर्षकमा विनियोजित कार्यक्रमअनुसार सरोकारवालाह्रूको सहभागितामा अनुदानका लागि छनोट भएको करिब २० लाख रकम बराबरको काम सम्पन्न गर्न छनोट भएका लाभग्राहीलाई रकम भुक्तानी गर्न इन्कार गरेका हुन् । उनले जिल्लामा सञ्चालन हुने लिखु चम्पादेवी सबडिभिजन भवन निर्माणलगायत अधिकांश कार्यक्रमह्रूबाट रकम घुसबापत लिएको उनीमाथि आरोप लागेको छ ।
यसरी आफूलाई रकम दिन इन्कार गर्ने सेवाग्राहीलाई कार्यालय प्रमुखको पदीय मर्यादा र जिम्मेवारीको समेत ख्याल नगरी रकम मागेको भन्दै नाम नखुलाउने सर्तमा सेवाग्राहीले गुनासो गर्दै आएका छन् ।
‘डिभिजन वन कार्यालयका कर्मचारीह्रूले तोकेअनुसारको काम सम्पन्न गरी रकम भुक्तानीका लागि कार्यालयमा जाँदा कार्यालय प्रमुख आफैँले रकम मागको रकम नदिए रकम निकासा दिन आफू बाध्य नहुने भन्दै आफूह्रूलाई फिर्ता पठाइयो,’ उनीह्रूले गुनासो गरे ।
अधिकृत लामाले कार्यालयबाट सञ्चालित दर्जनभन्दा बढी कार्यक्रमबाट रकम असुलेको जानकारह्रू बताउँछन् । उनले आफ्ना कार्यालयका कर्मचारीलाई उपलब्ध गराएको अनुदानको भुक्तानी दिए तापनि सर्वासाधारणसँग भने खुलेआम रूपमा रकम माग गरेको पाइएको छ । कार्यालयमा प्राप्त भएका अधिकांश कार्यक्रममा सरोकारवालालाई जानकारी समेत नदिई आफूखुसी वितरण गरेर उपभोक्तासँग रकम असुलेको भन्दै सामुदायिक वन उपभोक्ता महासंघले आपत्ति जनाएको पाइएको छ । आफूले विरुवा खरिद गरिदिने भन्दै नर्सरी व्यवसायीह्रूसँग समेत रकम माग गरको व्यवसायीह्रूले गुनासो गरका छन् ।
ओखलढुंगा जिल्लाका लागि प्रदेश तथा संघ सरकारको तर्फबाट फलफूल विरुवा खरिद तथा रोपण एवं जडिबुटी कार्यक्रमका लागि विनियोजित रकमका लागि सार्वजनिक सूचना आह्वान गरी सरोकारवालाको बैठकले लाभग्राही छनोट गर्ने काम भए तापनि कार्यालय प्रमुखका कारण कार्यान्वयन हुन नसकेको कार्यालयका सूचना अधिकारी जमानसिंह मोक्तानले बताए ।
उनले छनोट भएका सेवाग्राहीलाई काम सम्पन्न गराउन फिल्डमा खटिएका कर्मचारीले लगाएको भए तापनि कार्यालय प्रमुखको इच्छाशक्ति नहुँदा आफूह्रूले सेवाग्राहीह्रूलाई न्याय गर्न नसकेको बताएका छन् । कार्यालयले ताकेता गरे अनुसार आफूले सामुदायिक वन समूहमा तोकिएका १ हजार तेजपातको विरुवा खरिद गरी रोप्ने काम गरेको भए तापनि सो बापतको भुक्तानी नहुँदा समस्या भएका च्यानडाँडा सामुदायिक वन समूह सुनकोसी–५ का अध्यक्ष पञ्चे तामाङले गुनासो गरे ।
डिभिजन प्रमुख लामाको निर्देशनअनुसार समुदायमा गएर आफूले तोकेको काम गर्न लगाएको भए तापनि काम गरेका उपभोक्ताह्रूलाई रकम भुक्तानी नगरी कार्यालय प्रमुखले गल्ती गरेको सुनकोसी मोलुङ सबडिभिजन प्रमुख एवं सहायक वन अधिकृत प्रमोद ठाकुरले गुनासो गरे । सेवाग्राही मात्र नभएर डिभिजन वन अधिकृत लामाको रबैयाले अधिकांश कर्मचारीसमेत रुष्ट भएको पाइएको छ ।
