काठमाडौं– बोनम्यारो पीडित दैलेख भगवति गाउँपालिका–२ निवासी दिनेश शाहीका छोरा ११ वर्षीय सुशिल शाहीलाई उपचारको लागि युनिक स्वयंसेवक नेपालले आर्थिक सहयोग गरेको छ । बुधबार राजधानीमा पत्रकार सम्मेलन गर्दै युनिक स्वयंसेवक नेपालले बिरामी शाहीको उपचारको लागि पूर्वमन्त्री कुन्तीकुमारी शाहीमार्फत १५ लाख ८५ हजार ५ सय ५५ रूपैयाँ हस्तान्तरण गरेको हो ।
अध्यक्ष एजिला बस्नेत रहेको यस संस्थाले उक्त रकम बिरामी बालकको उपचारमा व्यवस्थापकीय भूमिका निभाउँदै आएकी तथा पूर्वमन्त्री शाहीलाई हस्तान्तरण गरेको हो । बालकको हाल काठमाडौंस्थित सिभिल अस्पतालमा उपचार भइरहेको छ । कार्यक्रममा बोल्दै मन्त्री शाहीले बालकको परिवारको अवस्था कमजोर भएको, उपचारमा ठूलो रकम लाग्ने र त्यो रकम घरपरिवारबाट सम्भव नभएकोले आफूह्रूले उपचारको लागि आवश्यक खर्चको बन्दोबस्दो गरेको सुनाइन् ।
उनले बालकको परिवारको आर्थिक अवस्था कमजोर भए पनि आफूले उपचारमा कुनै कमी हुन नदिने प्रतिवद्धता गरिन् । उनले राजनीतिकमात्र नभएर सामाजिक कार्यमा पनि अग्रसर हुनुपर्ने बताइन् । उपचारमा आर्थिक सहयोग गर्ने सबैलाई धन्यवाद दिँदै बच्चाको शल्यक्रिया चाँडै नै सम्पन्न गर्नेसमेत जानकारी दिइन् । बच्चालाई नयाँ जीवन दिनको लागि आफूले हरसम्भव भएसम्म लाग्ने प्रतिवद्धतासमेत दोहोर्याइन् । कार्यक्रममा रिपोर्टर्स क्लब नेपालका अध्यक्ष ऋषि धमलाले बिरामी बालकको स्वास्थ्य लाभ गर्दै उपचारार्थ चलाइएको अभियानलाई साथ र सहयोग गर्ने बताए । दैलेखी सेवा समाजका अध्यक्ष प्रताप शाहीले दैलेखको बच्चालाई आफू र समाजको तर्फबाट सहयोग गर्ने बताए । उनले बालक बचाउने अभियानलाई साथ र सहयोग गर्ने स्पष्ट पारे ।
कार्यक्रमको अन्तिममा युनिक स्वयंसेवक नेपालको तर्फबाट बोल्दै सरोज कार्कीले बिरामी बच्चालाई सहयोग गर्न पाउँदा खुसी लागेको बताए । बालकको चाँडोभन्दा चाँडो शल्यक्रिया होस् भन्दै सफल अपरेशनको कामना गरे । कार्यक्रममा सामाजिक अभियन्ता तथा कार्यक्रमका संयोजक चक्रबहादुर चन्दले प्राप्त भएको सहयोग रकम बालकको शल्यक्रियामा प्रयोग गरिने बताए । उनले बालकका बाबु बोल्न नसक्ने अवस्थामा रहेको बताउँदै उपचारमा २६/२७ लाख रूपैयाँ लाग्ने बताए । चन्दले अस्पतालमा बालकको शल्यक्रियाको मिति नपाएको गुनासो गर्दै भने, ‘डेटको लागि रिक्वेस्ट गरिरहेका छौँ ।’ बच्चाको उपचारको लागि जम्मा भएको रकम बालकको नाममा रहेको बैंक खातामा रहेको समेत चन्दले जानकारी दिए । कार्यक्रमको अन्त्यमा पूर्वमन्त्री शाहीले दैलेखी समाजको तर्फबाट युनिक नेपाललाई धन्यवाद दिँदै सम्मानपत्र प्रदान गरेकी थिइन् ।
