काठमाडौ– वैदेशिक रोजगारको क्षेत्र पुनः थलिने अवस्थामा पुगेको छ । कोरोना महामारी कम हुँदै गएपछि चलायमान हुने अवस्थामा पुगेको यो क्षेत्रमा कोभिडको महामारी पुनः बढेपछि थप समस्या देखिएको हो । पछिल्लो समय दैनिक रूपमा कोरोना संक्रमित थपिँदै गएको अवस्थामा सरकारले जारी राखेको निषेधाज्ञामा थप कडाइ गरेको छ । मंगलबार मात्रै उपत्यकाका प्रमुख जिल्ला अधिकारीहरूको बैठकले वैदेशिक रोजगारीमा जाने श्रमिकले अनिवार्य रूपमा लिनु पर्ने अभिमुखीकरण तालिम भौतिक रूपमा सञ्चालन गर्न रोक लगाएको छ । यो अवस्थामा पुनः यो क्षेत्रलाई धक्का पुग्ने अवस्था सिर्जना भएको व्यवसायीहरूको भनाइ छ ।
कोरोनाको संक्रमण बढेको भन्दै तीन जिल्लाका प्रमुख जिल्ला अधिकारीहरूको बैठकले २८ साउनदेखि ८ भदौसम्म निषेधाज्ञा थप गर्दै राति ८ बजेपछि सार्वजनिक सवारीसाधन सञ्चालन गर्न नपाइने तथा वैदेशिक रोजगारमा जाने श्रमिकले लिने अभिमुखीकरण तालिम भौतिक रूपमा लिन नपाइने निर्णय गरेको हो । अहिले रोजगारीका लागि विदेश जानेहरूले दुईदिने अभिमुखीकरण तालिम भौतिक उपस्थितिमा नै लिइरहेका छन् । तर, तालिम नै लिन नपाउने भएपछि विदेश जानका लागि अन्तर्वार्ताबाट छनोट भएका, भिसासमेत आइसकेका श्रमिकले श्रम स्वीकृति लिन नपाउने अवस्था देखा परेको सरोकारवालाले बताएका छन् ।
भौतिक रूपमा उपस्थित भएर तालिम दिँदा नै हाजिर मात्रै गरेर प्रमाण पत्र वितरण गरेको भन्ने गुनासो आइरहेको समयमा यसैलाई थप सहज हुने गरी यो निर्णय आएको नेपाल वैदेशिक रोजगार व्यवसायी संघका सचिव मेघनाथ भुर्तेलले बताएका छन् । यस्तो कार्यले लामो सययदेखि थलिएका व्यवसायी र गरिब श्रमिक मर्कामा पर्ने उनले बताए । अभिमुखीकरण तालिम पनि व्यवसायीले नै दिन पाउनु पर्ने भुर्तेलको भनाइ छ । उनका अनुसार अभिमुखीकरण तालिम दिनेहरूलाई व्यवसायीले ल्याएको कामका विषयमा जानकारीसमेत हुँदैन । जे गर्दा पनि व्यवसायी र श्रमिकलाई नै मार भइरहेको व्यवसायीहरूको भनाइ छ ।
अभिमुखीकरण प्रदान गर्ने संस्था देशका विभिन्न जिल्लामा रहे पनि अधिकांश काठमाडौंमा नै रहेकाले यसले व्यवसायी र श्रमिकलाई प्रत्यक्ष प्रभाव पर्ने देखिन्छ । उपत्यकाभन्दा बाहिरका तालिम प्रदाय संस्थाले भने भौतिक रूपमा नै उपस्थित गराएर तालिम दिन सक्ने भए पनि यो सबैका लागि सहज नहुने बताइएको छ । कोरोनापछिको समयमा नेपाली युवाहरूको प्रमुख श्रम गन्तव्य मुलुकहरू मलेसियालगायत देशले श्रमिक लिएका छैनन् । साउदी अरब, कतारलगायत मुलुकले केही मात्रामा नेपालबबट श्रमिक लैजाँदै आएका छन् । तर, पछिल्लो व्यवस्थाले ती देशहरूमा पनि श्रमिक पठाउन समस्या हुने व्यवसायीहरूको भनाइ छ ।
