ओखलढुंगा– जिल्ला समन्वय समितिका सदस्य होमबहादुर विकले समन्वय समितिका लाखौँ रकम बराबरको सामाग्रीहरूको दुरूपयोग गरेको स्थानीयले आरोप लगाएका छन । सदस्य विकले विभिन्न व्यक्तिको नाममा फरक उद्देश्यले लिएको सामग्री तोकिएको स्थानमा नपुर्याई निजी कामका लागि प्रयोग गरेर दुरूपयोग गरेको आरोप छ । समितिको कार्यालयमा रहेका ११७ थान तारजाली रमाइलो डाँडाबाट लालीगुराँस स्कुल आउने बाटो बनाउन भनी आफैँले लिएको, उनका भाइ खड्गबहादुर लगुनले लिएको ११९ थान तारजाली र श्रीमती विमला विश्वकर्माले लिएको २० थान तारजाली तथा स्थानीय चन्द्र लगुनले लिएको २० थान तारजाली सुनकोशी ८ च्यानमको निर्माणाधीन सडकले बनाएको पहिरो संरक्षण गर्न लिएको तारजाली सम्बन्धित स्थानमा नपु¥याई सिद्धिचरण ११ मा रहेको उनको निजी घरजग्गामा प्रयोग गरी दुरूपयोग गरेको आरोप छ ।
उनले हैसियत नाघेर आफ्नै तोकआदेशले समन्वय समितिको कार्यालयको स्टोरमा रहेको ८० थान रोल जिआइतार र २५०० मिटर एचडी पाइपलगायत बहुमूल्य पर्ने दर्जनौँ सामग्रीसमेत लिएको देखिन्छ । तर, सो सामग्री के प्रयोजनका निमित्त कहाँ प्रयोग भएको छ भन्ने समेत देखिँदैन । सुनकोशी गापा–८ ले चन्द्रबहादुर लगनलाई १०० थान तारजाली दिन मिति २०७५ माघ १३ गते सिफारिस गरेको र २०७५ माघ १४ गते बुझेको कार्यलयको रेकर्डमा देखिन्छ ।
सामग्री दुरूपयोग भएको सम्बन्धमा सिद्धिचरण ११ का स्थानीयहरूले समेत पटक–पटक गुनासा गरेको भएता पनि सुनुवाइ भएको छैन । सदस्य विकले शक्तिको दुरूपयोग गरी आफ्नो जग्गामा अनावश्यक र अव्यवस्थित रूपमा तारजाली भरेपछि छिमेकीहरूलाई समेत जोखिम बढेको गुनासो गरेका छन् । सामग्रीहरूको दुरूपयोग भएको सम्बन्धमा प्रतिक्रिया खोज्दा सुनकोशी ८ का वडा अध्यक्ष गुणराज भट्टराई सम्पर्क गर्दा उनले सामग्री गाउँ–गाउँमा ल्याएर गाउँ–गाउँमा बाढेको दाबी गरेका छन् ।
यता सुनकोशी–८ का लागि सामग्री बुझेका उनका भाइ खड्गाबहादुर लगुनले भने आफूले १ सय १९ थान तारजाली लिँदै नलिएको दाबी गरेका छन् । सामग्री दुरूपयोग भएको सम्बन्धमा कुरा गर्दा सदस्य विकले भने आफूले मात्र नभएर सबैले जिल्ला समन्वयको सामग्री लगेको बताएका छन । उनले आफ्नो भाइले कुनै पनि सामग्री नलिएको भनेता पनि १ सय १९ थान जाली उनले नै बुझेको भरपाई सुरक्षित रहेको पाइएको छ । आफूले लिएको सामान दुरूपयोग हैन सदुपयोग गरेको उनले दाबी गरेका छन् ।
