काठमाडौं– काठमाडौं महानगरपालिकाका प्रमुख विद्यासुन्दर शाक्यले महागरपालिकाको सबै वडामा पार्क निर्माण गरिने बताएका छन् । महानगरपालिका ‘एक वडा–एक पार्क’को नीति कार्यान्वयनतर्फ अघि बढेको बताएका छन् । सोमबार वडा नम्बर–५ को हाँडीगाउँमा नरबुद्धपार्कको शिलान्यास कार्यक्रमलाई सम्बोधन गर्दै उनले भने, ‘काठमाडौं महानगरपालिकाले एक वडा–एक पार्कको नीति लिएको छ । नरबुद्ध पार्कको शिलान्यास त्यही नीतिअनुरूप नै हो ।’
प्रमुख शाक्यले काठमाडौं महानगरपालिले अहिलेसम्म साना–ठूला गरी करिब ७० वटा पार्क निर्माणको काम अघि बढाएको जानकारी दिएका छन् । उनले पार्क निर्माणको अभियानलाई प्राथमिकतामा राखेको स्मरण गराए ।
‘पार्क निर्माणसँगै हामीले सम्पदा निर्माण, पुनर्निर्माणको अभियानलाई पनि प्राथमिकतामा राखेको छौँ,’ उनले भने,
‘बनाउने जिम्मा हामी लिन्छौँ, त्यसको व्यवस्थापन स्थानीयले गर्ने हो । हामी काठमाडौं महानगरलाई सुन्दर बनाउने अभियानमा छौँ ।’
कार्यक्रमलाई सम्बोधन गर्दै वाग्मती प्रदेशका सांसद नारायण सिलवालले हाँडीगाउँदेखि कपन निलोपुलसम्मको क्षेत्रलाई पार्क हबको रूपमा विकास गर्ने योजनामा रहेको बताएका छन् । काठमाडौं महागरपालिकाकी उपप्रमुख हरिप्रभा खड्गी श्रेष्ठले काठमाडौं महानगरपालिका पार्क निर्माण र हरियाली कायम गर्ने अभियानमा निरन्तर रहेको बताइन् ।
करिब सात रोपनी क्षेत्रफलमा निर्माण हुने सो पार्कको लागत रु. १ करोड ४८ लाख रहेको छ । पार्कमा कलात्मक डिजाइनका साना–ठूला गरी चारवटा ढोका रहने छन् भने आराम गर्नका लागि चौतारीसहितको छहारी रहने छ । त्यसैगरी विश्रामका लागि झिँगटीका छाना भएका चौताराहरू पनि रहने छन् ।
पार्कमा हरियालीका लागि दुबोसहितका मैदान रहने छन् भने १५ फिट गोलाइको फाउण्टेनसहितको पोखरी रहने छ । व्यायाम र हिँडडुलका लागि बाटो र खुला ठाउँको समेत पार्क डिजाइनमा व्यवस्था गरिएको छ । वृद्धवृद्धा र अपांगमैत्री पार्कमा अभय मुद्राको बुद्धको मूर्तिसमेत राख्ने योजना रहेको छ ।
अतिक्रमित जग्गामा उद्यान
काठमाडौं महानगरपालिका–११ वसन्तनगरस्थित किङ्स कलेजसँगैको दुई रोपनी १४ आना सार्वजनिक जग्गामा उद्यान निर्माण गरिने भएको छ । व्यवसायी दीपक मल्होत्राले अतिक्रमण गरी संरचना बनाएर हडपेको यो जग्गा वाग्मती प्रदेशसभा सदस्य दीपेन्द्र श्रेष्ठको नेतृत्वमा वडाका जनप्रतिनिधिसमेतको सक्रियतामा खाली गरिएको थियो । सार्वजनिक जग्गा खाली गरिएसँगै उद्यान निर्माणका लागि जग्गा सम्याउन थालिएको छ । व्यक्तिले हडपेको सार्वजनिक जग्गालाई फेरि सार्वजनिक स्वामित्वमा ल्याएर उद्यान निर्माण गर्न लागिएको ११ नं वडाध्यक्ष हीरालाल तण्डुकारले जानकारी दिएका छन् ।
उक्त सार्वजनिक जग्गा सम्याउने काम लगभग सकिएको छ । स्थानीयवासी लाभान्वित हुने गरी त्यस क्षेत्रमा उद्यान निर्माणको योजना तयार गरिएको जानकारी वडा कार्यालयले जनाएको छ ।
