काठमाडौं– भारतले सम्झौताअनुसारको कोभिशिल्ड खोप उपलब्ध नगराएपछि पहिलो मात्रा लगाएका जेष्ठ नागरिकले लामो समयदेखि दोस्रो मात्रा लगाउन पाएका थिएनन् । भारत सरकारसँग पटक–पटक सम्झौताअनुसारको १० लाख डोज खोप दिन आग्रह गर्दा पनि नदिएपछि पहिलो मात्रा लगाएकाहरूले दोस्रो मात्रा पाएका थिएनन् ।
सरकारले कोभिशिल्डको पहिलो मात्रा लगाएका जेष्ठ नागरिकलाई आज (सोमबार) र भोलि (मंगलबार) काठमाडौंमा दोस्रो मात्रा लगाइदिने भएको छ । स्वास्थ्य कार्यालय काठमाडौंका अनुसार कोभिशिल्डको पहिलो मात्रा खोप लगाएकाहरूलाई दोस्रो मात्र लगाउन लागिएको हो । भारतले कोभिशिल्ड खोप उपलब्ध नगराए पनि जापान सरकारले एष्ट्रोजेनिका खोप उपलब्ध गराएपछि उक्त खोपलाई नै दोस्रो मात्राको रूपमा लगाउन लागिएको हो । दुवै खोपको कम्पोजिशन एउटै भएकाले उक्त खोप लगाउँदा फरक नपर्ने भएकाले कोभिशिल्डको सट्टामा एष्ट्रोजेनिका लगाउन लागिएको मन्त्रालयले बताएको छ ।
स्वास्थ्य तथा जनसंख्या मन्त्रालयको २२ साउनको निर्णयअनुसार काठमाडौं महानगरपालिकासहित कीर्तिपुर, चन्द्रागिरी, नागार्जुन, तार्केश्वर, दक्षिणकाली, बूढानीलकण्ठ, टोखा, गोकर्णेश्वर, शंकरापुर र कागेश्वरी मनोहरा नगरपालिकाका कोभिशिल्डको दोस्रो डोज पाउनुपर्ने नागरिकलाई खोप लगाउन लागिएको हो ।
स्वास्थ्य कार्यालयले विद्युतीय दर्ता अनिवार्यरूपमा गराइ स्वास्थ्य मापदण्ड पालना गरेर खोप लगाउने कार्य गर्न अनुरोध पनि गरेको छ । स्वास्थ्य मन्त्रालयको अनलाइन प्रणालीमा विवरण इन्ट्री गराएकाहरूलाई खोप प्रदान गरिने र अन्यथा भएमा खोप प्रदान गर्ने संस्थाका प्रमुख, कोअर्डिनेटर, स्वयंसेवक र संलग्न अन्य कर्मचारीहरूलाई कानुनबमोजिम कारबाही गर्ने चेतावनी स्वास्थ्य कार्यालयले दिएको छ ।
उल्लेखित नगरपालिकाको खोप केन्द्र यसअघि भेरोसेलको दोस्रो मात्रा लगाउँदा कायम भएका केन्द्रहरू नै तय गरिएको छ । खोप लगाउनका लागि काठमाडौंमा १४९ केन्द्र तोकिएको छ ।
जापानबाट आयो तीन लाख खोप
जापान सरकारले नेपाललाई अनुदानमा दिएको कोरोनाविरुद्धको करिब तीन लाख खोप आइपुगेको छ । कोभ्याक्स सुविधाअन्तर्गत पहिलो चरणमा एस्ट्राजेनिकाको तीन लाख मात्रा खोप आइपुगेको स्वास्थ्य तथा जनसंख्या मन्त्रालयका सचिव डा.रोशन पोखरेलले जानकारी दिएका छन् । जापानले नेपाललाई १६ लाख मात्रा एस्ट्राजेनिकाको खोप दिने बताएको थियो । जापानबाटै शनिबार पाँच लाख मात्रा खोप आएको थियो । बाँकी खोप एक सातापछि आउने मन्त्रालयले जनाएको छ ।
यसअघि शुक्रबार भुटानबाट दुई लाख ३० हजार मात्रा कोभिशिल्ड खोप प्राप्त भएको थियो । जापानबाट प्राप्त खोप पहिलो मात्रा लगाएका नागरिकलाई लगाइनेछ । हालसम्म खरिद र अनुदान गरेर करिब एक करोड मात्रा खोप स्वदेश आइपुगेको छ । नेपालले ६० लाख मात्रा खोप खरिद गरेको छ । चीनबाट ४० लाख भेरोसेल र भारतबाट २० लाख कोभिशिल्ड खोप खरिद गरिएको छ । भारतबाट खरिद गरिएकामध्ये १० लाख मात्रा खोप अझैँसम्म आपूर्ति भएको छैन ।
यसैगरी भारतबाट अनुदानमा ११ लाख कोभिशिल्ड (नेपाली सेनासहित) प्राप्त भएको छ । चीनबाट १८ लाख मात्रा भेरोसेल खोप अनुदानमा प्राप्त भएको छ । यस्तै गाभीबाट तीन लाख ४८ हजार कोभिशिल्ड र अमेरिकाबाट १५ लाख ३४ हजार जोन्सन एन्ड जोन्सन खोप अनुदानमा प्राप्त भएको मन्त्रालयले जनाएको छ ।
खोपको नियमित आपूर्ति हुन थालेपछि सरकारले खोप केन्द्र पनि थप गरिएको छ । खोप केन्द्रमा भिडभाड देखिएको र खोप लगाउनेबाटै संक्रमण फैलनसक्ने देखिएपछि सरकारले एक हजार ४३३ खोप केन्द्र थप गरेको हो । पहिले दुई हजार ९८९ खोप केन्द्र भएकामा अहिले त्यो संख्या चार हजार ४२२ पु¥याइएको छ । काठमाडौं उपत्यकामा ८३ खोप केन्द्र थप गरी १४९ पु¥याइएको छ ।
