काठमाडौं– गृहमन्त्री बालकृष्ण खाँणको प्रमुख आतिथ्यमा सशस्त्र प्रहरी सहायक निरीक्षक आधारभूत तालिमको दिक्षान्त समारोह आइतबार सम्पन्न भएको छ । सो अवसरमा समारोहका प्रमुख अतिथि गृहमन्त्री खाँणले उक्त तालिममा सर्वोत्कृष्ट भएका सशस्त्र प्रहरी सहायक निरीक्षक चन्द्रा वलीलाई खुकुरी प्रदान गरेका थिए ।
समारोहमा गृहमन्त्री खाँणले कर्तव्यपालनाको सिलसिलामा राष्ट्र र नागरिकको सेवा र सुरक्षाको खातिर आफ्नो प्राणको समेत आहुती दिएका प्रहरी महानिरीक्षक स्व. कृष्णमोहन श्रेष्ठलगायत अमर सशस्त्र प्रहरीप्रती भावपूर्ण श्रद्धाञ्जली व्यक्त गर्दै उनीहरुको योगदानको स्मरण गरे ।
उनले राज्य प्रदत्त जिम्मेवारीका क्षेत्रहरुमा खटिएर सीमा सुरक्षा तथा व्यवस्थापन, नागरिकको सेवा, विपद प्रकोपमा परेकाहरुको उद्वार, कोभिड–१९ महामारी व्यवस्थापनका साथै राजस्व चुहावट नियन्त्रण लगायतका जिम्मेवारीमा सशस्त्र प्रहरी बल नेपालले सम्पादन गरेका कार्यको मुक्तकण्ठले प्रशंसा गर्दै सीमा सुरक्षार्थ सशस्त्र प्रहरी बल नेपालले २२६ वटा बिओपीहरु स्थापना गरी डेडिकेटेड फोर्सको रुपमा खटिरहेको र भविष्यमा बिओपीको संख्या ५०० पु¥याउने नेपाल सरकारको लक्ष्य रहेको बताए ।
सशस्त्र प्रहरी बल नेपाललाई जनशक्ति एवं स्रोत साधन सम्पन्न बनाउन नेपाल सरकारको तर्फबाट प्रतिवद्धता जनाउँदै थप व्यवसायी अनुशासीत इमान्दार र कर्तव्यनिष्ठ भई कार्यसम्पादन गर्न राष्ट्रसेवकहरुलाई निर्देशन दिए । गृहमन्त्री खाँणले दीक्षित अधिकृतहरुलाई तालिमबाट प्राप्त फौजी ज्ञान, कला कौशलको उच्चतम् प्रयोग गर्दै इमान्दार र पूर्ण व्यवसायिक भई मुलुकमा शान्ति सुरक्षा कायम राख्ने कार्यमा राज्य र नागरिकले सोचे र खोजेजस्तो सेवा प्रवाहमा निर्भिकताकासाथ उच्च जिम्मेवारी बोध गर्दै कार्यसम्पादनमा जुट्नसमेत निर्देशन दिए । उनले शान्ति सुरक्षा वहाली राज्यको प्रमुख दायित्व रहेको उल्लेख गर्दै कार्यसम्पादनको क्रममा सम्वद्ध अन्य निकायहरुसँग समेत समन्वय र सहकार्य गर्दै नेपाल सरकारले लिएको लक्ष्य प्राप्तिमा सबैले आ–आफ्नो ठाउँबाट इमान्दारिताकासाथ काम गर्नुपर्ने बताए ।
प्रहरी महानिरीक्षक शैलेन्द्र खनालले सिमित स्रोत साधनका बाबजुद पनि सीमा नाका, नेपाल ए.पि.एफ. अस्पताललगायत देशका विभिन्नि स्थानमा रातोदिन तैनाथ रही घामपानी र भोक तिर्खा नभनी सशस्त्र प्रहरी बल, नेपालका चिकित्सक, स्वास्थ्यकर्मी एवं कर्मचारीहरुले सीमा सुरक्षा तथा व्यवस्थापन, सीमा अपराध नियन्त्रण, विपद्जन्य घटनामा पीडितको उद्दार तथा राहत वितरणलगायत हाल विद्यमान कोभिड–१९ महामारीको संक्रमण रोकथाम, नियन्त्रण र उपचारमा निरन्तर क्रियाशील रहेको बताए । उनले आगामी दिनमा थप व्यवसायिक भएर तन, मन, वचन र कर्मका साथ देश र नागरिकको सेवामा समर्पित रहनुपर्ने बताए ।
गत साल २२ भदौबाट संचालन भएको उक्त तालिम २० जना महिलासहित कुल ६१ जना सशस्त्र प्रहरी सहायक निरीक्षकले सफलतापूर्वक सम्पन्न गरेका छन् ।
उक्त तालिममा सहिष्णुतातर्फ सशस्त्र प्रहरी सहायक निरीक्षक वीरेन्द्रप्रसाद जोशी र कवाज तथा चाँदमारीतर्फ सशस्त्र प्रहरी सहायक निरीक्षक सन्तोषी महत उत्कृष्ट भएका छन् ।
