काठमाडौं– केही कम भएको नयाँ भेरियन्टसहितको कोरोना भाइरसको संक्रमणदर फेरि बढ्न थालेको छ । दैनिक दुई हजार आसपास आइपुगेको संक्रमणदर बुधबार र बिहीबार चार हजार आसपास पुगेको छ । स्वास्थ्य तथा जनसंख्या मन्त्रालयका अनुसार बिहीबार देशभर तीन हजार ९३८ जना नयाँ संक्रमित थपिएका हुन् । १८ हजार ४०८ जनाको पिसिआर परीक्षण गर्दा उक्त संख्यामा नयाँ संक्रमित थपिएका हुन् । बुधबार भने ४ हजार १०७ जनामा संक्रमण देखिएको थियो । संक्रमित थपिनुको कारण सर्वसाधारणले स्वास्थ्यसम्बन्धी मापदण्डको पालना नगर्नु निष्कर्ष निकाल्दै मन्त्रालयले आगामी शनिबारदेखि देशभर मास्क अभियान सञ्चालन गर्ने भएको छ ।
मन्त्रालयले यही २३ देखि २९ साउनसम्म देशभर मास्क अभियान सञ्चालन गर्ने घोषणा गरेको छ । ‘महामारी नियन्त्रण र रोकथाममा मेरो प्रतिबद्धता मास्क लगाउनु नै आजको आवश्यकता’ भन्ने मूल नाराका साथ मन्त्रालयले अभियान सञ्चालन गर्न थालेको हो । मन्त्रालयले मास्क लगाई मानिसको व्यवहारमा परिवर्तन गर्ने उद्धेश्यले अभियान सञ्चालन गर्न लागेको जनाएको छ । मन्त्रालयका सहप्रवक्ता डा.समीरकुमार अधिकारीले कोरोना भाइरसबाट बच्न मास्क अभियान सञ्चालन गर्न लागिएको बताएका छन् । ‘जनस्वास्थ्य सम्बन्धीमा मापदण्ड उल्लंघन भएको र मास्क लगाउन पनि लापरबाही गरेकाले स्वास्थ्यको मापदण्ड तथा मास्कको महत्वबारे जानकारी गराउन अभियान सुरु गर्न लागिएको हो,’ उनले भने ।
अभियानअन्तर्गत मन्त्रालयले परिचालन गरेको स्वास्थ्यकर्मीले सबै नागरिकलाई सही तरिकाले मास्क लगाउन सिकाउनेछन् । त्यस्तै, स्थानीय तहले पनि आ–आफ्नो क्षेत्रमा मास्क कसरी लगाउने भनेर सिकाउने छन् । स्वास्थ्य स्वयंसेविकामार्फत गाउँटोलमा मास्कको महत्वबारे सिकाउने मन्त्रालयको तयारी छ । सात दिनसम्म मास्कको महत्व र लगाउने तरिका सिकाइने छ ।
सहप्रवक्ता डा.अधिकारीका अनुसार महामारी नियन्त्रणमा खोप जतिकै मास्क, सेनिटाइजरसँगै जनस्वास्थ्यको भूमिका पनि महत्वपूर्ण रहेको उनको भनाइ छ । उनले भने, ‘सबै नेपालीलाई महामारी नियन्त्रणमा मास्कको भूमिकाबारे जनचेतना जगाउन आवश्यक छ ।’ म पनि मास्क लगाउँछु र अरुलाई पनि मास्क लगाउन प्रेरित गर्छु भन्ने सन्देश दिई कोभिड–१९ को रोकथाम तथा नियन्त्रण गर्न अभियान सञ्चालन गरिएको हो । कोरोना भाइरसबाट बच्न बढी प्रभावकारी उपाय भनेको नै मास्क रहेकाले सबैले अनिवार्य मास्क लगाउनसमेत उनले आग्रह गरेका छन् ।
संक्रमण दिनानुदिन बढे पनि मानिसले सही तरिकाले मास्क नलगाउने गरिएको पाइएको छ । स्वास्थ्य सेवा विभागको राष्ट्रिय स्वास्थ्य, शिक्षा तथा सूचना केन्द्रका निर्देशक डा.राधिका थपलियाले मास्कबारे जनचेतना मात्र नभई मास्कले मानिसको व्यवहारमा परिवर्तन गर्न अभियान सुरु गर्न थालिएको बताएकी छन् ।
