काठमाडौं– नेपाली चलचित्र उद्योगमा सफल मानिएको चलचित्र ‘नाइँ नभन्नू ल’ को छैँटौ सिक्वेलमा अभिनेत्री मलिका महतलाई मुख्य नायिकाको भूमिकामा प्रस्ताव गरिएको छ । म्युजिक भिडियोमा ‘हाई डिमान्ड’मा रहेकी अभिनेत्री मलिकालाई निर्माण पक्षले उक्त चलचित्रको लागि अफर गरेको हो ।
बिहीबार आफू अभिनित ‘तिम्रो माया’ गीतको सार्वजनिक कार्यक्रममा उनले ‘नाइँ नभन्नू ल ६’ बाट अफर आएको खुलाएकी छन् । यद्यपि उक्त चलचित्रमा काम गर्नेबारेमा अन्तिम निर्णय भइनसकेको उनको भनाइ छ । उनले आफू चलचित्रको टिमसँग निरन्तर संवादमा रहे पनि हालसम्म कागजी सम्झौता भने भइनसकेको बताइन् ।
त्यस्तै गोपीकृष्ण मुभिजले पनि चलचित्रको मुख्य नायिकामा अफर गरेको उनले बताएकी छन् । डेढ दशक अगाडिको सुपरहिट फिल्म ‘पर्खि बसेँ’ को सिक्वेलमा मुख्य नायिकाको प्रस्ताव आएको उनले खुलासा गरिन् । चलचित्रमा मलिकाको जोडी पल शाहसँग बाध्ने तयारीमा गोपीकृष्ण छ । तर, पल र मलिकाले यो फिल्म साइन भने गरिसकेका छैनन् । गोपीकृष्ण मुभिजसँग पनि निरन्तर संवादमा रहेको उनले जानकारी दिइन् ।
म्युजिक भिडियो हुँदै फिल्ममा आएकी अभिनेत्री हुन्, मलिका । अभिनेता सलिनमान बनियाँसँग जोडी बाँधेर चलचित्र ‘यात्रा’बाट उनले अभिनेत्रीको रूपमा डेब्यू गरेकी थिइन् । तर, पहिलो चलचित्रले आसातित सफलता प्राप्त गर्न सकेन । यद्यपि, उनको अभिनय र सुन्दरता भने दर्शकले रुचाए । यसपछि उनले खगेन्द्र लामिछाने निर्देशित फिल्म ‘पानी फोटो’ मा काम गरिन्, जुन प्रदर्शनको पखाईमा छ ।
फिल्ममा काम गरेर पनि चर्चामा आउन नसकेकी मलिकालाई लकडाउनमा सार्वजनिक भएको ‘फूलबुट्टे साडी’ गीतले एकाएक चर्चामा ल्याएको थियो । साथै, उनको जोडी पल शाहसँग दर्शकले निकै रुचाए । यसपछि उनले पुनः पलसँगै ‘टाढा भए पनि’ गीतमा अभिनय गरिन् । यो गीतले पनि उनको लोकप्रियता चुल्याउन मद्दत ग¥यो । अहिले उनको म्यूजिक भिडियोमा ‘हाइ डिमान्ड’ छ ।
म्यूजिक भिडियोबाट दर्शकको ठूलो वर्गमा चिनिएकी मलिकाले लकडाउनयता प्रतिष्ठित ब्यानरबाट फिल्म अफर पाइरहेकी छन् ।
