काठमाडौं– हलिउड/बलिउडजस्ता उद्योगमा चलचित्र छायांकनको क्रममा सक्कलीभन्दा आकर्षक देखिने नक्कली हातहतियारको प्रयोग गर्न दिइन्छ । त्यसकारण चलचित्रमा देखाइने हातहतियार सक्कलीजस्तै लाग्छन् । त्यसले दर्शकमा पार्ने प्रभाव पनि बलियो हुन्छ । त्यसले चलचित्रको प्रभावकारिता वृद्धि गर्दछ । तर, नेपालमा भने चलचित्रमा यस्ता हतियारहरू प्रयोग गर्न प्रतिबन्ध छ ।
त्यसैले चलचित्र निर्माता तथा निर्देशकहरू साधारण प्लास्टिकका खेलौनालाई फिल्ममा हतियारको रूपमा देखाउने गर्दछन् । जसले गर्दा नेपाली चलचित्रको गुणस्तर नबढेको आरोप खेप्न निर्माता निर्देशकहरू बाध्य छन् ।
नेपाल चलचित्र निर्माता संघले फिल्म छायांकनका लागि आवश्यक पर्ने हातहतियार प्रयोग गर्न दिन माग गरेको छ । सक्कलीजस्तै देखिने तर, नक्कली हतियारको प्रयोगमाथिको प्रतिबन्ध हटाउन माग गर्दै संघले नेपाल प्रहरीलाई ज्ञापन पत्र बुझाएको छ ।
संघले नक्कली तर सक्कलीजस्तै देखिने हातहतियार प्रयोग गर्ने वातावरण मिलाउन माग गर्दै प्रहरी प्रधान कार्यालयलाई ज्ञापन पत्र बुझाएको हो । संघका अध्यक्ष तथा फिल्म निर्देशक आकाश अधिकारीले प्रहरी नायब महानिरीक्षक वसन्तकुमार लामालाई संघको तर्फबाट ज्ञापन–पत्र बुझाएका हुन् ।
नेपालमा नक्कली हातहतियार आयात गर्ने कम्पनीलाई निश्चित परिधिभित्र राखेर राज्यबाट नियमित रूपमा सुपरीवेक्षण र प्रहरी प्रधान कार्यालयको प्रत्यक्ष निगरानीमा त्यस्ता हातहतियारको प्रयोगलाई संस्थागत गरी छायांकनमा नक्कली प्लास्टिकका हातहतियार प्रयोग गर्ने वातावरण मिलाउन र प्रहरीकै निगरानीमा सक्कली हातहतियार प्रयोग गर्ने अनुमति दिन पनि संघले आग्रह गरेको छ ।
ज्ञापनपत्रमा निर्माताले छायांकनका लागि हतियारको माग गरेमा प्रहरीले संघसँगको समन्वयमा उपलब्ध गराउने वातावरण मिलाउन सक्ने उपाय पनि सुझाइएको छ ।
संघले चलचित्रमा आवश्यक पर्ने हातहतियार तथा द्वन्द्वका दृश्यको बारेमा अध्ययन गरेर त्यसको लागि आवश्यक सहजीकरण गर्नसक्ने भएकाले प्रहरी र संघबीचको समन्वयमा त्यस्ता हतियार दिनसकिने उल्लेख छ । उक्त हातहतियार प्रहरीसँग माग भएको तीनदिनभित्र उपलब्ध गराउने वातावरण बनाउन पनि संघले माग गरेको छ ।
फिल्म छायांकनमा प्रहरी जवानको आवश्यकता परेको खण्डमा २५ देखि ५० प्रतिशत जवान उपलब्ध गराउनुका साथै प्रतिव्यक्ति ५ हजारबाट घटाएर १ हजार शुल्क कायम गर्न, छायांकनमा प्रहरीको भ्यानका लागि बुझाउनु पर्ने शुल्क घटाएर १ हजार वा १५ सय कायम गर्न पनि संघको माग छ । प्रहरी नायव महानिरीक्षक लामाले संघको माग पूरा गर्न प्रयास गर्ने आश्वासन दिएको अध्यक्ष अधिकारीले जानकारी दिएका छन् ।
