काठमाडौं– वीर अस्पतालका स्वास्थ्यकर्मी र कर्मचारीले गरेको प्रदर्शनमा प्रहरीले हस्तक्षेप गरेपछि आइतबार दुई पक्षबीच झडप भएको छ । कोरोना भाइरस (कोभिड–१९)विरुद्ध अग्रपंक्तिमा रहेर काम गरिरहेका स्वास्थ्यकर्मी र कर्मचारीले केहीदिन पहिलेदेखि अस्पतालमा परिसरमा प्रदर्शन गरिरहेका छन् । कोरोना महामारीको समयमा सरकारले उपलब्ध गराउने भनेको जोखिम भत्ता पाउनुपर्नेलगायतका मागसहित उनीहरू आन्दोलित बनेका हुन् ।
सोमबार आन्दोलनरत स्वास्थ्यकर्मी तथा कर्मचारीले अस्पतालका प्रशासकीय अधिकृत डा.जागेश्वर गौतमविरुद्ध प्रदर्शनमा उत्रिएका थिए । त्यसक्रममा स्वास्थ्यकर्मी र कर्मचारीलाई प्रहरीले लाठीचार्ज गरेर घाइते बनाएको आन्दोलनरत कर्मचारी दीपक मुडभरीले बताएका छन् । झडपका क्रममा चार जना घाइते भएको उनले जानकारी दिए ।
सरकारले कोभिड १९ नियन्त्रणसम्बन्धी अध्यादेश ल्याई वीर अस्पताललाई कोभिड युनिफाइड अस्पताल बनाउने घोषणा गरी डा. गौतमलाई प्रमुख नियुक्त गरेको थियो । तर, त्यसपछि अस्पतालको सेवामा कुनै सुधार नभएको बरु आर्थिक अनियमितता भएको भन्दै स्वास्थ्यकर्मी र कर्मचारी प्रदर्शनमा उत्रिएका हुन् । उनीहरूले आठ महिनादेखि कोभिड–१९ जोखिम भत्ता लगायतका विभिन्न भत्ता नपाएको पनि बताएका छन् । आठ महिनादेखि रोकिएको सेवा विस्तार भत्ता, औषधि उपचार भत्ता, कोभिड–१९ जोखिम भत्ता पाउनु पर्ने उनीहरूको माग छ ।
स्वास्थ्य तथा जनसंख्या मन्त्रालयले स्वास्थ्यकर्मीको लागि आवश्यक रकम निकासा गरे पनि समयमै वितरण नभएपछि गएको आर्थिक वर्षमा सो रकम त्यत्तिकै फ्रिज भएको थियो । मन्त्रालयले वीर अस्पताललाई कोभिड बिरामीको उपचारका तथा स्वास्थ्य सामग्री खरिद लागि पठाएको दुई करोड मात्रै खर्च गरेर बाँकी ३८ करोड रूपैयाँ फ्रिज भएको थियो ।
कोरोनाको पहिलो लहरदेखि फ्रन्टलाइनमा खटिएका स्वास्थ्यकर्मी तथा सफाइकर्मीलगायतका कर्मचारीले जोखिम भत्ता र ओभरटाइम काम गरेबापतको अतिरिक्त रकम तथा सधैँ खाइपाइ आएको औषधि उपचार खर्चसमेत नपाएको आन्दोलनरत पक्षको भनाइ छ ।
महामारीमा दिनरात खटिए काम गरे पनि जोखिम भत्ता नपाएकाले बाध्य भएर काम छाडेर आन्दोलनमा उत्रिएका नर्स सीता भुसालले बताइन् । ‘कोरोना बिरामीको चाप हुँदा हामीले दिनरात खटिएर बिरामीको सेवा ग¥यौँ,’ उनले भनिन्, ‘डा.बाहिर–बाहिरबाट हेरेर जान्थे उनीहरूले जोखिम भत्ता पाए तर हामीले पाएनौँ ।’
उनीहरूले आफूहरूले पाउनुपर्ने रकम दिन निरन्तर आग्रह गर्दा पनि सुनुवाइ हुन नसकेपछि आन्दोलन गर्नुपरेको बताउँदै आएका छन् । भत्ताको माग गर्दा अस्पतालका प्रमुख कार्यकारी अधिकारी डा. गौतमले प्रहरी बोलाएको आन्दोलनकारीहरूले आरोप लगाएका छन् । आक्रोशित उनीहरूले जोखिम भत्ता माग गर्दै गौतमको राजीनामा समेत माग्दै चर्को नाराबाजी गरेका थिए ।
स्वास्थ्यकर्मीले सेवा सुविधा माग गरेर आन्दोलन गर्दा अस्पतालको सेवा प्रभावित भएको छ । अस्पतालको सेवा खटिने स्वास्थ्यकर्मी र कर्मचारी नै आन्दोलनमा उत्रिएपछि बिरामीको हेरचाहमा कमी आएको बिरामीका आफन्तहरूले बताएका छन् । बिरामीको हेरचाहमा खटिनुपर्नेहरू नै आन्दोलनमा उत्रिएपछि उचित हेरचाह हुन नसकेको भन्दै बिरामी र उनका आफन्तहरू अत्तालिएका छन् ।
अस्पतालमा कार्यरत स्वास्थ्यकर्मी तथा कर्मचारीहरू आन्दोलनमा उत्रिरहेका बेला अस्पताल प्रशासनले भने उनीहरूले घोषित सबै भत्ता पाउने जनाएको छ । कोरोनाको पहिलो लहरदेखि नै फ्रन्टलाइनमा खटिएका स्वास्थ्यकर्मी, सफाइकर्मी र कर्मचारीले तलब नपाएको स्वीकार गर्दै अस्पताल प्रशासनले अब चाँडै सबैलाई तलब तथा भत्ता उपलब्ध गराउने बताएको छ । अस्पतालका प्रमुख कार्यकारी अधिकारी डा. गौतमले स्वीकारे क्रमशः स्वास्थ्यकर्मीलाई जोखिम भत्ता उपलब्ध गराउने प्रतिबद्धता जनाएका छन् । अस्पताल यही ढंगले अझै ३ महिना जति सञ्चालन भएमा क्रमशः सबै फ्रन्टलाइनर स्वास्थ्यकर्मीले जोखिम भत्ता पाउने उनको भनाइ छ ।
उनले अस्पतालले बाध्यताबस भत्ता उपलब्ध गराउन नसकेको स्पष्टीकरण दिएका छन् । ‘अस्पतालले कमाएपछि क्रमशः भत्ता दिन्छ, पहिलैदेखि जोखिम भत्ता पाउनु भएको रहेनछ,’ उनले भने, ‘अस्पतालले दिनै नसक्ने स्थितिमा कसरी भत्ता दिने ? तर, अस्पतालले अब क्रमशः भत्ता दिन्छ, नियमित तलब सबैले पाउनु भएको छ, सुनियोजित ढंगले मेराविरुद्ध आन्दोलन भएको छ ।’ अस्पतालले क्रमशः गति लिँदै गरेको अवस्थामा केही स्वार्थ समूहले अनावश्यक लफडा गर्न उक्साइरहेको उनको आरोप छ ।
