काठमाडौं– इजरायल जाने श्रमिकहरूको परीक्षा लिनका लागि आवेदन फारम आह्वान गर्ने तयारी अन्तिम चरणमा पुगेको छ । वैदेशिक रोजगार विभागमा निर्देशक तथा सूचना अधिकारी महेन्द्रनाथ भट्टराईका अनुसार इजरायलमा रोजगारीका लागि जान चाहने श्रमिकका लागि लिइने परीक्षाका लागि आवेदन फारम आह्वान गरिँदै छ ।
जिटुजीमार्फत सञ्चालन हुने परीक्षा सञ्चालनका लागि आवेदन फारम भर्नका लागि सूचना निकाल्ने काम अन्तिम चरणमा पुगेको उनले बताएका छन् । अहिले श्रमिक छनोटका लागि धमाधम काम भइरहेको र छिट्टै सूचना निकाल्ने तयारी भइरहेको उनले बताए ।
वैदेशिक रोजगार विभागको इजरायल हेर्ने निर्देशक डम्बरबहादुर सुनुवारका अनुसार अबको २÷३ दिनमा परीक्षा सञ्चालनका लागि सूचना निस्कने छ । अहिले यसै विषयमा छलफल भइरहेको र सूचना आएपछि सबै कुरा जानकारी हुने सुनुवारको भनाइ छ । सूचना जारी भएको २१ दिनभित्र परीक्षा सञ्चालन हुने गरी सूचना निकाल्ने तयारी भइरहेको विभागले जनाएको छ । श्रमिकले काम गर्ने समय, श्रमिकको योग्यता, तलब र इजरायलको कानुनी व्यवस्थाबारेमा पनि सूचनामा प्रष्ट पारिने निर्देशक सुनुवारले बताएका छन् । परीक्षा अंग्रेजी भाषामा हुने बताइएको छ ।
लिखित परीक्षा उत्तीर्ण भएपछि अन्तर्वार्तासमेत लिइने जनाइएको छ । त्यसपछि अन्तिम सूची तयार गरेर इजरायल पठाउने र पठाइएको सूचीबाट इजरायलको पिआइबिएले अन्तिम उम्मेदवार छनोट गर्ने बताइएको छ । यसका लागि अहिले तयारी तीव्रगतिमा भइरहेको विभागका सूचना अधिकारी भट्टराइले जानकारी दिएका छन् । उताबाट नाम छनोट भएर आएपछि भिसा प्रक्रियाको काम सुरु हुने विभागले जनाएको छ ।
नेपाल सरकार र इजरायल सरकारबीच भएको सम्झौताअनुसार स्याहार केन्द्रमा १ हजार नेपाली श्रमिकको माग भएको र सोहीअनुसार परीक्षाको तयारी भइरहेको सूचना अधिकारी भट्टराइले बताए । रोजगारका लागि इजरायल जाने श्रमिकमध्ये ७० प्रतिशत पुरुष र ३० प्रतिशत महिला रहने बताइएको छ । पारिश्रमिक र कार्यस्थलका दृष्टिले इजरायल नेपाली श्रमिकका लागि दक्षिण कोरियाभन्दा पनि आकर्षक गन्तव्य मानिँदै आएको छ ।
लिखित परीक्षा तथा अन्तर्वार्ताबाट छनोट भएका उम्मेदवाहको करारनामामा हस्ताक्षर गरी इजरायलले नेपालको वैदेशिक रोजगार विभागलाई पठाउने र विभागले सम्बन्धित व्यक्तिको हस्ताक्षर गराएर इजरायल पठाइने बताइएको छ ।
इजरायल जाने श्रमिकको न्यूनतम् पारिश्रमिक मासिक १ हजार ५ सय अमेरिकी डलर हुने बताइएको छ । जुन नेपाली रूपैयाँ करिब ९ लाख ७८ हजार हुने भनिएको छ । इजरायलमा श्रमिक पठाउनका लागि कोरोना भाइरस (कोभिड–१९) का कारण रोकिएको थियो । मन्त्रिपरिषद्बाट इजरायल कामदार पठाउन निर्देशिका यसअघि नै स्वीकृत भइसकेको थियो । नेपालबाट ३ वर्षअघि करिब १ सयको हाराहारीमा श्रमिक इजरायल गए पनि थप श्रमिक पठाउन सकिएको थिएन र अब यसका लागि प्रक्रिया सुरु गरिएको विभागले जनाएको छ ।
-1745656903.jpeg)