काठमाडौं – हाँस्य कलाकार पल्पसा डंगोलको दुवै मिर्गौैलामा समस्या देखिएको छ । स्वास्थ्यमा समस्या देखिएपछि त्रिवि शिक्षण अस्पताल भर्ना भएकी ‘चम्सुरी’ नामले परिचित कलाकार पल्पसाको दुवै मिर्गौलाले काम गर्न छाडेको चिकित्सकहरूले बताएका छन् । एक महिनाअगाडि स्वास्थ्य खराब भएपछि उनी अस्पताल भर्ना भएकी थिइन् ।
लामो समयदेखि उपचार गराइरहेकी उनलाई भेट्न अस्पताल पुगेकी सहकलाकार तथा निर्देशक दीपाश्री निरौलाले पाँच वर्षअघि नै पल्पसाको मिर्गौलामा समस्या देखिएको जानकारी दिएकी छन् ।
दीपाश्रीका अनुसार तर, पल्पसाले छोरीहरूले थाहा नपाउन् भनेर आफ्नो रोग लुकाउँदै आएकी थिइन् । दिपाश्रीले भनिन्, ‘उहाँले डाक्टरको सल्लाहअनुसार औषधि र खानेकुरामा ख्याल गर्दै आउनुभएको थियो, तर आफूलाई युरिक एसिड मात्रै भएको भनेर भन्नुभएको थियो । एक महिनाअघि अस्पताल भर्ना भएपछि पनि उहाँले धेरैलाई थाहा दिन चाहनुभएन ।’
अस्पतालमा डाइलसीस चलिरहँदा केही दिनदेखि पल्पसाको स्वास्थ्यमा समस्या आएको चिकित्सकले बताएका छन् । पछिल्लोपटक गरिएको डाइलसिसका क्रममा समस्या आएकाले डाक्टरले चाँडोभन्दा चाँडो मिर्गौला प्रत्यारोपण गर्न सुझाव दिएका छन् । स्वास्थ्य गम्भिर भएपछि आत्तिएकी पल्पसाले कलाकार सुरवीर पण्डितमार्फत केही साथीहरूलाई खबर गर्न लगाएकी थिइन् । सुरवीरबाटै थाहा पाएर आफू आइतबार अस्पताल पुगेको दिपाश्रीले बताइन् ।
‘उहाँले यतिबेला हिम्मत हार्न‘भएको छ, मसित अब बाँच्दिन भनेर निकै बिलौना गर्न‘भयो,’ दिपाश्रीले भनिन्, ‘उहाँलाई सबै दर्शकको हौसला र सहयोगको आवश्यकता छ ।’ पल्पसा केही वर्षअघि नै श्रीमानसँग अलग भएर दुई छोरीहरूसँग बस्दै आएकी छन् । कलाकारिता गरेर नै उनले आफ्ना दुई छोरीहरूको पालनपोषण र शिक्षादिक्षाको जिम्मेवारी वहन गर्दै आएकी थिइन् । मिर्गौला प्रत्यारोपणका लागि ठूलो खर्च लाग्ने भएकाले आर्थिक सहयोगको आह्वान गरिएको छ ।
पल्पसा केही समयअघिसम्म अभिनयमा सक्रिय नै थिइन् । उनले हाँस्य टेलिश्रृंखला ‘मेरीबास्सै’मा सुरुदेखि नै अभिनय गर्दै आएकी छिन् । लकडाउनका कारण सो टेलिश्रृंखलाको छायांकन रोकिनुअघिसम्म उनले त्यसमा काम गरिरहेकी थिइन् ।
