काठमाडौं– कोरोना भाइरसका कारण विश्वभरका हरेक क्षेत्र प्रभावित बन्न पुग्यो । सिनेमा क्षेत्र पनि यसबाट अछुतो रहने कुरै भएन । जसले गर्दा सिनेमा क्षेत्रमा काम गर्नेहरूका लागि धेरै नै असर पारेको छ । डामाडोलको अवस्थामा पुगेको भए पनि विस्तारै सुरु हुने क्रममा रहेको छ । अन्य क्षेत्रजस्तोे होइन सिने क्षेत्र । फिचर्स फिल्मको सुटिङको समयमा ५०÷६० जनाको युनिटले काम गर्नुपर्ने हुँदा स्वास्थ्यको दृष्टिकोणले पनि यतिका संख्यामा मानिस भेला भएर सुटिङ गर्ने कुरै भएन ।
युनिटमा काम गर्नु पर्ने भएकोले एकआपसमा नजिक रहेर काम गर्नुपर्दा जोखिम रहने हुँदा पनि सिनेमाको सुटिङ हुन सकिरहेको छैन । एकातिर कथावस्तु, कलाकारको पूरा सुरक्षामा ध्यान राख्नुपर्ने र अर्काेतिर युनिटमा खटिने प्राविधिकको पनि उत्तिकै सुरक्षाको व्यवस्था गर्न‘पर्ने बाध्यताले पनि निर्माताहरू सुटिङ सुरु गर्न डराइरहेका छन् । यस्तो अवस्थामा पनि म्युजिक भिडियो, टेलिसिरियलहरूको सुटिङ भने स्वास्थ्यको ख्याल गर्दै भइरहेको छ ।
लामो समयको बन्दबन्दीका कारण कलाकार, प्राधिकिहरू मारमा परेका छन् । लम्बिँदै गएको निषेधाज्ञाले आफ्नो काम गर्न नपाउँदा गुजारा कसरी चलाउने भन्ने चिन्तामा छन् मेकअप आर्टिष्ट राकेश रणपाल । अन्य व्यवसाय खुकुलो भएजस्तै सिनेमा निर्माण र प्रदर्शनमा पनि सहजता हुनु पर्ने उनको भनाइ छ । सुटिङ सुरु भएको खण्डमा स्वास्थ्य मापदण्ड अपनाएर काम गर्न पनि अलि समस्या हुने उनको बुझाइ छ ।
झण्डै डेढ दशक देखि मेकअप आर्टिष्टको रूपमा काम गर्दै आइरहेका राकेश रणपाल नेपाली सिने क्षेत्रमामात्र होइन बलिउड र भोजपुरी सिने उद्योगमा समेत ख्यातिप्राप्त नाम हो ।
सोनी टेलिभिजनबाट प्रशारण हुने अपराध सम्बन्धी सिरियल ‘क्राइम पेट्रोल’मा लामो समय मेकअप आर्टिष्टको रूपमा काम गरेका राकेशले भोजपुरी भाषाको ‘जय शम्भु’, ‘प्रेम गीत’, ‘प्रेम गीत २’, आदि सिनेमामा काम गरिसकेका छन् । मिजासिलो स्वभावका, युनिटमा सबैसँग मिलेर काम गर्न रुचाउने राकेशले ‘बीचबाटो’, ‘मायाँको बारीमा’, ‘सौभाग्य’, ‘डर्टी लभ’, ‘चियर्स’, ‘कमिना’, ‘ब्रम्हा’, ‘राजा’, ‘लाले’, ‘धनवान’, ‘लभ इन दार्जलिङ’, ‘प्रेम लिला’, ‘झमक बहादुर’, ‘झिल्को’ आदि सिनेमामा काम गरिसकेका छन् ।
मेकअप आर्टिष्टको भीडमा आफ्नो छुट्टै पहिचान बनाउन सफल राकेशलाई विभिन्न संघ, संस्थाले सम्मानसमेत गरेको छ । वुमेन्स एरा मिडिया ग्रुप नेपालले आयोजना गरेको ‘हिमालय इन्टरनेशनल अवार्ड २०७७’ बाट पुरस्कृत राकेश आफ्नो पेसाबाट सन्तुष्ट छन् । यस क्षेत्रमा आउन इच्छुक नयाँ पिँढीलाई आफ्नो ज्ञान र सीप बाड्दै आइरहेको उनी उदयपुर, चौदण्डी नगरपालिका ९ का स्थानीय वासिन्दा हुन् । उनी भविष्यमा पनि यही पेसालाई निरन्तरता दिने योजनामा छन् ।
