काठमाडौं– स्थानीय प्रशासनले काठमाडौं उपत्यकामा लगाइएको निषेधाज्ञा केही खुकुलो पारे पनि पूर्णरूपमा हटाएको भने छैन । पछिल्लो पटक असार मसान्तसम्मका लागि जारी गरिएको निषेधाज्ञा स्थानीय प्रशासनले १० दिन थप गरेको छ । काठमाडौं उपत्यकाअन्तर्गतका तीन जिल्ला काठमाडौं, भक्तपुर र ललितपुरका प्रमुख जिल्ला अधिकारीहरूको संयुक्त बैठकले कोभिड–१९ नियन्त्रणका लागि काठमाडौं उपत्यकामा जारी निषेधाज्ञा १० दिन थप गर्ने निर्णय गरेको हो ।
बिहीबार बसेको बैठकले निषेधाज्ञा थप्ने निर्णय गरेको काठमाडौंका प्रमुख जिल्ला अधिकारी कालीप्रसाद पराजुलीले जानकारी दिएका छन् । बैठकले पसल खोल्ने समय एक घन्टा थप गरेको छ । ३१ असारसम्म सबैथरि व्यवसाय ६ बजेसम्म सञ्चालन हु“दै आइरहेकामा अब बेलुका ७ बजेसम्म पसल सञ्चालन गर्न पाइने आदेशमा उल्लेख छ । कोरोनाभाइरस संक्रमणको जोखिम अझैं कायम रहेकाले निषेधाज्ञा थप्ने निर्णय गरिएको उनको भनाइ छ । तीनै जिल्लाका प्रमुख जिल्ला अधिकारीले १० साउनसम्म निषेधाज्ञा थपेका हुन् । उपत्यकामा १६ वैशाखबाट निषेधाज्ञा जारी छ ।
यसअघि सञ्चालनमा रहेका गतिविधिमा रोक लगाइएको छैन । आगामी १० दिन निषेधाज्ञा थप खुकुलो गरिएको छ । सबै प्रकारका सभा, सम्मेलन, सिनेमा हल, पार्टी प्यालेस, डान्सबार, दोहोरी, नाचघर, क्लब, स्विमिङ पुल, मनोरञ्जन स्थल, सैलुन, ब्युटी पार्लर, हेल्थ क्लब, फुटसल, जिमखाना, संग्रहालय, रंगशालामा हुने दर्शकसहितको खेलकुद र मानिसको भिडभाड हुने अन्य कार्यक्रममा रोक लगाइएको छ ।
त्यस्तै, सार्वजनिक स्थलमा भेला हुन, भिडभाड गर्न, सभा, जुलुस, जात्रा, महोत्सव, भोजभतेर गर्न पनि रोक लगाइएको छ । पुजारीबाट हुने नित्य पूजाबाहेकका धार्मिक तथा सांस्कृतिक गतिविधि पनि गर्न नपाइने भएको छ ।
कोभिड–१९ नियन्त्रणका लागि गरिएको निषेधाज्ञाका कारण लामो दूरीका सार्वजनिक यातायातका साधन अझै १० दिन नचल्ने भएका छन् । बैठकले काठमाडौं आउने र जाने लामो दूरीका सार्वजनिक यातायातका साधनमा लगाएको रोक यथावत् राखेको छ । काठमाडौं उपत्यकामा कोरोनाभाइरस संक्रमणको जोखिम यथावत् रहेकाले लामो दूरीका सवारी साधन खुला नगरिएको प्रजिअ पराजुलीले बताएका छन् ।
प्रजिअ पराजुलीका अनुसार लामो दूरीमा यातायात सञ्चालन गर्ने प्रस्ताव मन्त्रिपरिषदमा पुगेको छ । उपत्यकाका प्रमुख जिल्ला अधिकारीहरूको बैठकले यसअघि नै लामो दूरीको यातायात चलाउने प्रस्ताव कोभिड–१९ संकट व्यवस्थापन केन्द्र (सिसिएमसी) मा पठाइसकेको र बिहीबार सिसिएमसीले मन्त्रिपरिषदमा पठाएको जानकारी आएको उनले बताए । काठमाडौं उपत्यकामा सार्वजनिक यातायात सञ्चालन भइरहेको र सम्बन्धित जिल्ला प्रशासन कार्यालयको पास लिएर आउने गाडी उपत्यका प्रवेश गरिरहेको उनले बताए । ‘तर देशभरिको यातायात सञ्चालनको विषय
हुनाले मन्त्रिपरिषदले निर्णय गर्नुपर्छ’ उनले भने ।
तीनै जिल्लाका प्रमुख जिल्ला अधिकारीले जारी गरेको निषेधाज्ञा सम्बन्धी आदेशमा पनि अत्यावश्यक कामका लागि भने आउन जान दिने उल्लेख छ । काठमाडौं उपत्यकामा भने सार्वजनिक यातायातका साधन यथावत् सञ्चालन हुनेछन् । स्वास्थ्य मापदण्ड भने अनिवार्य गरिएको छ भने क्षमताभन्दा बढी यात्रु राख्न पाइनेछैन ।
