काठमाडौं– संयुक्त राज्य अमेरिकाले नेपाललाई १५ लाख ३४ हजार ८५० डोज कोरोना भाइरसविरुद्धको खोप उपलब्ध गराएको छ । अमेरिकाले कोभ्याक्स सुविधाअन्तर्गत जोन्सन एण्ड जोन्सन कम्पनीद्वारा निर्मित खोप अनुदान सहयोग गरेको हो । अमेरिकी सरकारबाट उपहारस्वरूप प्राप्त कोभिड–१९ विरुद्धको उक्त खोप नेपालस्थित अमेरिकी राजदूत ¥यान्डी बेरीले सोमबार स्वास्थ्य तथा जनसंख्या मन्त्री कृष्णगोपाल श्रेष्ठलाई हस्तान्तरण गरेका छन् ।
राजदूत बेरीले मन्त्री श्रेष्ठलाई त्रिभुवन अन्तर्राष्ट्रिय विमानस्थलमै खोप हस्तान्तरण गरेका थिए । खोप हस्तान्तरणपछि विमानस्थलमै आयोजित पत्रकार सम्मेलनमा मन्त्री श्रेष्ठले प्राप्त खोप नेपाली नागरिकको जीवनरक्षाका लागि बरदान हुने प्रतिक्रिया दिए । अमेरिकाले यसअघिदेखि नै नेपाललाई कोरोनाको उपचार र रोकथाममा आवश्यक स्वास्थ्य सामग्री सहयोग गरिरहेकामा मन्त्री श्रेष्ठले आभार व्यक्त गरेका छन् । उनले भने, ‘कोरोनाको नियन्त्रणका लागि खोप नै उत्तम विकल्प हो, ७२ प्रतिशत जनतालाई कोरोनाविरुद्धको खोप लगाउने गरी सरकारले आवश्यक तयारी गरेको छ ।’
मन्त्री श्रेष्ठले एक मात्रा मात्र लगाए पुग्ने सो खोप सरकारले ५० देखि ५४ वर्ष उमेर समूहका नागरिकलाई प्राथमिकताका आधारमा लगाउने योजना बनाएको जानकारी दिएका छन् ।
पत्रकार सम्मेलनमा राजदूत बेरीले नेपाली जनताको जीवनरक्षाको एक मात्र उद्देश्यले खोप उपलब्ध गराइएको बताउँदै यसले नेपाललाई अहिलेको महामारीबाट बाहिर निस्कन सहयोग गर्ने विश्वास व्यक्त गरेका छन् । कोभ्याक्सको गौरवशाली सदस्यका रूपमा अमेरिकाले दुई अर्ब डलरको अनुदान उपलब्ध गराएको अवगत गराउँदै उनले त्यस सहयोगबाट न्यून तथा मध्यम आय भएका मुलुकमा खोप आपूर्ति हुने बताए । राजदूत बेरीले आजसम्म अमेरिकाले नेपालको कोभिड प्रतिकार्यका लागि सात करोड अमेरिकी डलरभन्दा बढी योगदान गरिसकेकोसमेत जानकारी दिए ।
विमानस्थलपछि राजदूत बेरीले प्रधानमन्त्री केपी ओलीलाई पनि प्रधानमन्त्री निवास बालुवाटार पुगेर खोप हस्तान्तरण गरेका थिए ।
सोमबार कतार एयरवेजमार्फत खोप नेपाल आइपुगेको खोप तत्कालै हस्तान्तरण गरिएको हो ।
सो अवसरमा प्रधानमन्त्री ओलीले खोपले नेपाली जनतालाई कोरोना भाइरसबाट बचाउन सहयोग मिल्ने बताएका छन् । उनले कोभिड–१९ संक्रमणको रोकथाम र नियन्त्रणमा पु¥याइएको सहयोग तथा राष्ट्रपति विद्यादेवी भण्डारीले अमेरिकी राष्ट्रपति जो वाइडेनलाई गरेको आग्रहबमोजिम कोभिड–१९ विरुद्धको लडाइँमा नेपाललाई सघाउन ऐक्यबद्धता जनाएकामा अमेरिकी सरकारलाई धन्यवाद दिँदै खोप उपलब्ध गराइएसँगै अमेरिकासँगको नेपालको सम्बन्ध थप उचाइमा पुग्ने विश्वास व्यक्त गरे ।
अमेरिकी सरकारले यसअघि कोभिड–१९ रोकथाम र नियन्त्रणका लागि भेन्टिलेटर, मास्क, सेनिटाइजरलगायत स्वास्थ्य सामग्री सहयोग गरेको थियो । यसअघि कोभ्याक्स सुविधामार्फत तीन लाख ४८ हजार खोप आइसकेको छ । नेपालमा अहिलेसम्म भारतबाट कोभिशिल्ड र चीनबाट भेरोसेल खोप आइसकेको छ । नेपाललाई हालसम्म ६० लाख मात्रा खोप प्राप्त भएको छ ।
