काठमाडौं– वैदेशिक रोजगारीको आकर्षक गन्तव्य मुलुक दक्षिण कोरियाले कामदार लैजानका लागि विभिन्न सर्त राखेको छ । कोरोना महामारीका कारण रोजगारीका लागि जान नपाएका नेपाली कामदारलाई लैजानका कोरिया सकारात्मक भए पनि स्वास्थ्य मापदण्डलगायत सर्त तेस्र्याएको छ ।
भाषा पास गरेर बसेका नेपाली युवाहरूलाई कोरियामा रोजगारीका लागि लैजान नेपालको अवस्था सामान्य हुनु पर्ने, कोरिया गएपछि अनिवार्य क्वारेन्टाइनमा बस्नु पर्ने तथा खोपको मात्रा पूरा गरेको हुनु पर्नेलगायतका सर्त राखिएको इपिएस कोरिया शाखाका प्रमुख इन्द्र गौतले बताएका छन् । एचआरडी कोरिया कामदार लैजानका लागि सकारात्मक रहे पनि कोरिया सरकारले नेपाललाई खतराको सूचीबाट नहटाउँदासम्म कोरिया जाने सम्भावना भने कम रहेको गौतमको भनाइ छ । कोरियाले कामदार लिन सुरु गरेपछि पनि त्यहाँ गएर १४ दिन अनिवार्य होटल क्वारेन्टाइनमा बस्नु पर्ने छ । यसबाहेक कोरोना परीक्षणको नेगेटिभ रिपोर्ट, खोपको मात्रा पूरा गरेको हुनु पर्ने पनि बताइएको छ । आफूहरूले कामदारको विषयमा एचआरडीसँग बारम्बार कुरा गरिरहेको र कोरिया सरकारले खतराको सूचीबाट नहटाएकाले कामदार लैजान नसकेको जवाफ दिने गरेको प्रमुख गौतमले बताए ।
कोरिया कामदार पठाउने विषयमा निरन्तर छलफल भएको भए पनि कोरियाले कामदार आपूर्तिका लागि स्वीकृति नदिएका कारण अहिले कोरियन भाषा पास गरेका कामदार जान नपाएको बताएका छन् । अहिले नेपाल मात्रै नभएर कोरियाले कामदार आपूर्ति गर्ने १६ वटै राष्ट्रबाट कोरियाले कामदार नलिएको अवस्था छ । भाषा परीक्षा पास गरेर बसेका कामदारको समय भने थप भइरहेको इपिएस शाखाले जनाएको छ ।
कोरोनाको दोस्रो लहर सुरु हुनुभन्दा केही समय पहिले कोरियाले नेपाललाई कम्फर्ट (यलो) जोनमा राखेको थियो । तर, दोस्रो लहर सुरु भएपछि अवस्था सामान्य नभएकाले कोरियाले यस विषयमा कुनै पनि निर्णय नगरेको प्रमुख गौतमको भनाइ छ । कोरियाले कामदार लैजानका लागि उसले सुरक्षित (ग्रिन)मा राख्नु पर्ने हुन्छ । अन्यथा कोरियाले कामदार लैजाने सम्भावना नरहने बताइएको छ ।
अहिले कोरियन भाषा परीक्षा पास गरेर करिब ८ हजार नेपाली कामदार कोरिया जाने लिस्टमा रहेको इपिएस कोरिया शाखाले जनाएको छ । त्यसमध्ये नयाँ करिब ५ हजार र करिब ३ हजार पुराना कामदार रहेको प्रमुख गौतमले बताए । अहिले सन् २०१७, ०१८ र ०१९ मा पास गरेकाहरू लिस्टमा रहेको बताइएको छ । कोरोनाका कारण २०२० मा कोरियन भाषा परीक्षा हुन सकेको थिएन । लिस्टमा रहेका कामदारहरूको नाम नआएको अवस्थामा उनीहरू पुनः रोस्टरमा जाने र फेरि लिस्टमा आउन सक्ने भएकाले पहिले पास गरेकाहरू पनि कोरिया जाने लिस्टमा रहेको प्रमुख गौतमले बताए । २०२१ मा हुने परीक्षाका विषयमा भने अहिलेसम्म कुनै जानकारी आउन नसकेको उनको भनाइ छ । कोरियाले भाषा परीक्षामा पास गर्नेको कोटासमेत निर्धारण गरिसकेको अवस्थामा कोरोनाको दोस्रो लहर सुरु भएपछि अहिले नयाँ भाषा परीक्षा अनिश्चित बनेको छ ।
