काठमाडौं– सरकारले रात्रिकालिन व्यावसाय बन्द गर्न निर्देशन दिएको छ । पछिल्लो समय कोरोना भाइरसको संक्रमण बढ्दै गएको भन्दै सरकारले सतर्कता अपनाउन राति ९ बजेदेखि रात्रिकालीन व्यावसाय र रेस्टुरेन्ट बन्द गराउन निर्देशन दिएको हो ।
स्वास्थ्य तथा जनसंख्या मन्त्रालयले बुधबार सूचना जारी गर्दै कोरोनाको नयाँ भेरियन्टबाट संक्रमित हुनेको संख्या बढ्दै गएको हुँदा विद्यालय, सार्वजनिक यातायात, धेरै भिडभाड हुने स्थानमा जनस्वास्थ्यका मापदण्ड कडाइका साथ पालना गराउन सरोकारवालाहरुलाई आग्रह गरेको छ । यस्तै विदेशबाट फर्केर घरमै क्वारेन्टिनमा रहेका तथा संक्रमित भएर घरमै आइसोलेसनमा बसिरहेकाहरुलाई आवश्यक निगरानी गर्न स्थानीय तह तथा प्रशासनलाई मन्त्रालयले अनुरोध गरेको छ । सार्वजनिक स्थानहरुमा मास्कको प्रयोग अनिवार्य गर्नुपर्ने पनि मन्त्रालयले भनेको छ ।
मन्त्रालयले काठमाडौंलगायत सहरहरुमा कोरोना संक्रमण दर बढ्ने क्रममा रहेको दाबी गर्दै शैक्षिक संस्थाहरु र अन्य भीडभाड हुने ठाउँमा सतर्कता अपनाउन आग्रह गरेको छ । जारी सँचनामा भीडभाड हुने स्थान सिनेमा हल, स्विमिङ पुल, मन्दिरलगायत क्षेत्रमा उच्च सतर्कता अपनाउन आह्वान गरेको छ । मन्त्रालयले कोभिड १९ को संक्रमण दर बढेपछि उच्च सतर्कता अपनाउन सरोकारवालाहरुलाई अनुरोध गरेको छ । मन्त्रालयले जनस्वास्थ्यका मापदण्ड कडाइका साथ पालना गर्न र मापदण्ड लागु भए नभएको निगरानी गर्न स्थानीय तहहरुलाई सूचित गरेको छ । ठूला सहरहरुमा ५०० भन्दा बढी र साना सहरमा १०० भन्दा बढी संक्रमित देखिएमा ती स्थानमा अवागमन कडाइ गर्नसमेत स्थानीय प्रशासनलाई मन्त्रालयले अनुरोध गरेको छ । पछिल्लो समय विद्यालय जाने उमेर समूहमा पनि संक्रमण बढेकाले सतर्कता अपनाउन मन्त्रालयले शैक्षिक संस्थाहरुलाई सुझाएको छ ।
पछिल्लो समय संक्रमित भएकाहरुमा युके भेरियन्ट रहेको लक्षण देखिएको इपिडिमियोलोजी तथा रोग नियन्त्रण महाशाखाले जनाएको छ । संक्रमितहरुमध्ये धेरैको नमुनामा एस जिनको नेगेटिभको मात्रा धेरै देखिएको इपिडिमियोलोजी तथा रोग नियन्त्रण महाशाखाले जनाएको हो । यता, ५१४० मा कोरोना परीक्षण गर्दा ३३९ लाई कोरोना संक्रमण पुष्टि भएको छ ।
बुधबार मन्त्रालयले दिएको जानकारीअनुसार पछिल्लो २४ घन्टामा ४१०० मा पिसिआर गर्दा २९८ मा पोजेटिभ आएको र १०४० मा एन्टिजेन परीक्षण गर्दा ४१ जनामा पोजेटिभ देखिएको हो । योसहित नेपालमा कोरोना संक्रमितको संख्या दुई लाख ७८ हजार ८०९ पुगेको छ । पछिल्लो २४ घन्टामा ७४ जना निको भएर फर्किएका छन् । योसहित कोरोनाबाट निको हुनेको संख्या दुई लाख ७३ हजार ५२९ पुगेको छ ।
