काठमाडौं– आप्रवासी श्रमिकको न्यूनतम पारिश्रमिक कार्यान्वयन गर्ने पहिलो खाडी मुलुक कतार बनेको छ । २० मार्चदेखि न्यूनतम पारिश्रमिक कार्यान्वयनमा आएसँगै कतार आप्रवासी कामदारलाई न्यूनतम पारिश्रमिक दिने पहिलो खाडी मुलुक बनेको हो ।
कतार सरकाले यसअघिनै घोषणा गरेको न्यूनतम तलब मार्च २० अर्थात शनिबारदेखि कार्यान्वयनमा ल्याएको हो । कतारले न्यूनतम तलब एक हजार कतारी रियाल तोकेको जनाइएको छ । योसँगै श्रमिकहरुले पाउने न्यूनतम भत्ता पनि निर्धारण गरेको छ । यदि रोजगारदाताले खाने र बस्ने व्यवस्था नगरेको खण्डमा अब खाना भत्ताबापत ३ सय रियाल र आवास भत्ताबापत ५ सय रियालसमेत श्रमिकलाई दिनुपर्ने बताइएको छ । खाने, बस्ने व्यवस्था रोजगारदाताले नै गरेको अवस्थामा भने श्रमिकले भत्ता पाउने छैनन् ।
कतार सरकारले यो कानुन कार्यान्वयनमा ल्याएसँगै कतारमा कार्यरत नेपालीलाई पनि फाइदा पुग्ने वैदेशिक रोजगार व्यवसायीले बताएका छन् । न्यूनतम तलब सुविधा अहिले कार्यान्वयन भए पनि कतारका ५ हजारभन्दा बढी कम्पनीले पहिलेदेखि नै न्यूनतम तलब सुविधा कायम गरिसकेको कतार सरकारले जनाएको छ ।
पछिल्लो समय कतार सरकारले श्रमिकको पक्षमा काम गरिरहेको छ । यसअघि कतारले श्रमिकको हितलाई मध्येनजर गर्दैै रोजगारदाता परिवर्तन गर्न पाउने कानुन ल्याएको थियो । २०२० को अन्तिम चौमासिकमा ७८ हजार श्रमिकले यसको फाइदा लिइसकेको अलजजिराले उल्लेख गरेको छ । यस्तै एक्जिट भिसाबिना देश छाड्न मिल्ने गरी सन् २०१८ मा कतारले आफ्नो आवासीय कानुनमासमेत परिमार्जन गरेको थियो ।
सन् २०१० मा नै २०२२ को विश्वकप फुटबल कतारले आयोजना गर्ने भन्ने घोषणा भएदेखि आप्रवासी कामदारलाई लिएर कतार सचेत रहँदै आएको छ । फलस्वरुप उसले नियमित रुपमा श्रमिकका पक्षमा विभिन्न निर्णय गर्दैसमेत आएको बताइएको छ ।
