काठमाडौं– ४१ जना युवालाई यूएई पु¥याएर अलपत्र पार्ने म्यानपावर ओशो रिक्रुटिङ एजेन्सी प्रा.लि.लाई वैदेशिक रोजगार विभागले कारबाही प्रक्रिया अघि बढाउने जनाएको छ । सोमबार प्रभाव दैनिकसँगको कुराकानीमा पुरानो बानेश्वरमा सञ्चालनमा रहेको उक्त म्यानपावरले ती युवाहरूलाई आकर्षक तलबको लोभ देखाएर युएईमा अलपत्र बनाएको उजुरी परेसँगै कारबाही प्रक्रिया बढाइएको विभागका महानिर्देशक कुमारप्रसाद दाहालले बताए ।
महानिर्देशक दाहालका अनुसार ओशो रिक्रुटिङ एजेन्सी प्रा.लि.को इजाजत रोक्का गरी आवश्यक छानबिन तथा कारबाही प्रक्रिया अघि बढाइएको छ । ‘४१ जना युवाले विभागमा उजुरी दिएसँगै आवश्यक कारबाहीका लागि प्रमाणहरू माग गरेका थियौँ । र, हालसम्म आएका प्रमाणहरूका आधारमा म्यानपावरमाथि कारबाही अघि बढाइनेछ ।’
४१ जना युवालाई पठाउने म्यानपावर मात्र नभएर त्यससँग सम्बन्धित रहेका व्यक्तिउपर पनि आवश्यक अनुसन्धान भइरहेको र दोषी देखिएमा कारबाही गरिने उनले बताएका छन् । ओशो रिक्रुटिङङ म्यानपावरले आफूहरूको करोडौँ रूपैयाँ ठगी गरेको आरोप लगाएका ती युवाहरूले आफूहरूबाट जनही अढाइ लाखदेखि साढे ३ लाखसम्म असुलेको विभागमा उजुरी दिएको पनि उनले बताए ।
कोभिड–१९ संक्रमण फैलिनुअघि नै उक्त म्यानपावरबाट विदेशिएका ती युवाहरूले कोरोना संक्रमणकै समयमा उद्धार भएर फर्किएको ७ महिना बितिसक्दा पनि अहिलेसम्म कुनै क्षतिपूर्ति पाउन नसकेको उजुरीमा उल्लेख छ । विभागमा उजुरी परेसँगै विभागले युएईस्थित नेपाली दूताबासलाई उनीहरूले त्यहँँ तलब पाए–नपाएको निश्चित गर्न पत्रचार गरिसकेको महानिर्देशक दाहालले बताए ।
उजुरी दिने सबै ड्राइभर
महानिर्देशक दाहालका अनुसार विभागमा उजुरी दिने सबैजना विभिन्न चरणमा ओशो रिकुटिङमार्फत् शारजाहको इमिरेट्स क्याब नामक ट्याक्सी कम्पनीमा ड्राइभिङ कामका लागि पुगेका थिए । साथै, यससँग सम्बन्धित थप कुरा बुझ्नका लागि दूताबासलाई विभागले पत्राचार गरिसकेको र यदि उनीहरूले तलब नपाएको दूताबासले निश्चित गरेको खण्डमा सोहीअनुसार कानुनी प्रक्रिया अपनाएर कारबाही प्रक्रिया अघि बढाइने उनले बताए ।
युएई पुगेर अलपत्र भएको बताउने सबै युवाहरू लकडाउनकै बीचमा नेपाल फर्किएर आफूहरूले म्यानपावरले गरेअनुसारको सेवा सुविधा नपाएको भन्दै उजुरी दिएका थिए । महानिर्देशक दाहालका अनुसार कोही ६ महिनामै फर्किएका हुन् भने कोही १ वर्षसम्म बसेर फर्किएका हुन् ।
सम्झौता पत्रमा कमिसनको लोभ
सम्झौता पत्रमा कम्पनी, कर्मचारी र एजेन्टले आफूहरूलाई तलबबाहेक आकर्षक कमिसन आउने र मासिक डेढ लाखभन्दा बढी आम्दानी हुने आसा देखाएर ३ लाखभन्दा बढी रकम आफूहरूबाट लिएको पीडितले उजुरीमा भनेका छन् । साथै, म्यानपावर कम्पनीले युएईमा १ हजार ५ सय दिराम तलब, दिनमा ८ घन्टा ड्युटी र हप्तामा १ दिन बिदा दिइने भनेर कागजी सम्झौता गरेको पनि उजुरीमा उल्लेख छ ।
तर, सम्झौता पत्रबमोजिम तलब, कमिसन र ड्युटी नभएको पीडितहरूले विभागसमक्ष उजुरी दिएका छन् । साथै, उजुरी दिएका केही भने डुयुटी गरेबापत घन्टाको आधारमा कमिसन मात्रै आउने तर त्यो पनि निकै कम आउने उनीहरूले गुनासो गरेको महानिर्देशक दाहालले बताए ।
यही बीचमा समस्यामा परेपछि उद्धार गरिदिन भन्दै अबुधाबीमा रहेको नेपाली दूताबासमा उनीहरू पुगेका थिए । तर, खान बस्न पनि गाह्रो हुने अवस्था आएपछि उनीहरू लकडाउनकै बीचमा स्वदेश फर्किएका थिए । महानिर्देशक दाहालका अनुसार विभागले दबाव दिएपछि उनीहरूलाई फर्किन म्यानपावरले हवाइ टिकट उपलब्ध गराएको थियो ।
