कलैया– कलैया उपमहानगरपालिकाको वडा नंं. १६ को कार्यालयमा तालाबन्दी भएको छ । वडा विकास सुधार समिति–१६ ले ११ सूत्रीय माग पूरा नगरेको भन्दै मंगलबार करिब ५ सय वडाबासीको टोलीले तालाबन्दी गरेको हो ।
सो समितिले सम्बन्धित सरोकारवाला निकायमा ज्ञापन पत्र दिँदै आएको थियो । ‘हामीले दुई पटकसम्म सम्बन्धित निकायमा वडा कार्यालयमा वडा अध्यक्षको नियमित उपस्थिति तथा वडाका सम्पूर्ण कामहरू नियमित रूपमा सञ्चालनसहितका विभिन्न मागसहित ज्ञापन पत्र दिँदै ध्यानाकर्षण गराएका थियौँ, सम्बन्धित पक्षबाट कुनै पनि वास्ता नगरेको तथा कार्यालयमा नियमित रूपमा उपस्थिति पनि नभएकोले वडाबासी मर्कामा पर्दा वडा कार्यालयमा तालाबन्दी गरेका छौ,’ समितिका अध्यक्ष अनिल कुशवाहाले बताए ।
समितिका अध्यक्ष कुशवाहाको नेतृत्वमा रहेको एक टोलीले वडाको कार्यालय कलैया उ.म.न.पा. १६ मा तालाबन्दी गरेको हो । बाराको कलैया उपमहानगरपालिका–१६ को वडाध्यक्ष शेषनाथ साह निर्वाचित भएका तीन वर्षको कार्यकाल बितिसक्दा पनि मुस्किलले ३ दिन पनि वडा कार्यालयमा पूरा समय उपस्थित भई राज्य सरकारले लिएको लक्ष्य तथा आफूले चुनाव यताका जनतासमक्ष गरेको वाचा अनुरूपका कामहरू नगरेकोमा वडा विकास सुधार समितिको गम्भीर ध्यानाकार्षण भएको विज्ञप्तिमा उल्लेख छ ।
कार्यालय समयमा आफू उपस्थित नभई व्यक्तिगत कामकाजमा व्यस्त रहने वडाध्यक्षले सेवाग्रहीलाई मर्कामा परेको स्थानीयहरूले गुनासो गरेका छन् । कार्यालयमा नबस्ने, जनताको सेवा, सिफारिस, विकास निर्माणका काममा आफूखुसी तानाशाही प्रवृत्तिबाट समिति बनाई आङ्खना नजिकका मानिसहरूलाई ठेक्का दिने, काम गर्नेजस्ता कामले जनगुनासाहरू बढ्दै गएकाले तालाबन्दी गरेको स्थानीय तथा समितिका सदस्य लक्ष्मी कुशवाहाले जनाए ।
ज्ञापनपत्रमा जनप्रतिनिधि वडामा अनुपस्थित रहने गरेको, वडाबाट हुने गरेको विकाससम्बन्धी सम्पुर्ण क्रियाकलाप पारदर्शी नदेखिएको, वडामा रहेको स्वास्थ्य निकायबाट सेवाग्राहीहरू वञ्चित हुने गरेको, यस वडामा रहेका शैक्षिक संस्थाहरूको अनुगमन नभएको हुँदा गुणस्तरीय शिक्षा नभएको, कृषिसम्बन्धी कुनै योजनाहरू हालसम्म सार्वजनिक नभएको, वडा नंं १६ मा नगर स्तरीय बजेटबाट गरेको योजनाहरू सार्वजनिक नभएको, प्रदेश स्तरीय योजनाहरू सार्वजनिक गर्न नचाहेको, केन्द्र स्तरीय योजनाहरू सार्वजनिक नभएको नगरेको, परिषद्बाट स्वीकृत योजनाहरू वडा कार्यालयमा नभएको र राख्नसमेत नचाहेको, बेरोजगार व्यक्तिबारेको विवरण सार्वजनिक नगरेको र गर्न नचाहेको, विगतमा घोषणा भएको ओडिएफलाई निरन्तरता दिन खासै योजना नबनाएको तथा गर्नसमेत नचाहेकाले विवश भएर तालाबन्दी गरिएको समितिका सदस्य धनेश्वर रामले प्रभाव दैनिकलाइ बताए ।
माथि उल्लेखित आफूहरूको मागहरूलाई वडा अध्यक्षलगायत सम्बन्धित निकायले यथाशिध्र कार्यान्वयन नगरे आउँदा दिनमा अझ सशक्त रूपमा अन्दोलनका कार्यक्रमहरू गर्ने समितिका सदस्य कलामेदिन अन्सारीले बताए ।
उक्त कार्यतक्रममा वडाबासी विनोदकुमार यादव, कलामोदिन अन्सारी, जितेन्द्रकुमार यादव, धनेश्वरकुमार राम, राजकिशोर कुशवाहा, ज्ञानप्रकाश ठाकुर, चन्दन राम, पवनकुमार कुशवाहा, प्रवेशकुमार कुशवाहा, बृजकिशोर ठाकुर, अजयकुमार राम, रविरन्जन कुमार राम, रविन्द्रकुमार राम, अरविन्दकुमार राम, जेनिश मेहरा, हरिओम कुशवाहा, बैजनाथ रामलगायतको सहभागिता रहेको थियो ।
