काठमाडौं– नेपालमा कोरोना सुई यति चाँडो दौडिन थालेको छ कि यसले कुनै पनि बेला भयावह स्थिति आउन सक्ने संकेत गरेको छ ।
शुक्रबारयता लगातार दुई हजारभन्दा माथि संक्रमित फेला पर्न थालेपछि यस्तो संकेत देखिएको हो ।
आइतबार एकैदिन दुई हजार २५३ जनामा कोरोना संक्रमण पुष्टि भएको छ । यो हालसम्मकै संक्रमितको बढी संख्या हो । विशेषगरी उपत्यका कोरोना संक्रमणको हट स्पट बन्दै गएको छ ।
नेपालमा लकडाउन खुकुलो पारिएसँगै संक्रमितको संख्या बढ्याबढ्यै छन् । हालसम्म नेपालमा कोरोनाभाइरसबाट संक्रमितको संख्या ८६ हजार ८२३ पुगेको छ ।
दुई साताअघि मात्र नेपालमा जम्मा ६४ हजार १२२ थियो । यो दुई सातामा मात्र २३ हजारभन्दा बढी संक्रमित थपिएका छन् । कोरोनाबाट उपत्यका सबैभन्दा बढी जोखिममा परेको छ ।
आइतबार मात्रै उत्यकामा एक हजार ५९९ कोरोना संक्रमित थपिएको जनसंख्या तथा स्वास्थ्य मन्त्रालयका प्रवक्ता डा.जागेश्वर गौतमले जानकारी दिए ।
थपिएका संक्रमितमध्ये काठमाडौंका एक हजार ३७३, ललितपुरका १८७ तथा भक्तपुरका ३९ जना रहेका छन् । उनीहरूको उपत्यकाका विभिन्न प्रयोगशालामा परीक्षण गरिएको थियो ।
योसँगै काठमाडौं उपत्यकामा कोरोना संक्रमितको संख्या २९ हजार ५१७ पुगेको छ । काठमाडौंमा २४ हजार ४६, ललितपुरमा दुई हजार ९८३ तथा भक्तपुरमा दुई हजार ४८८ जना कोरोना भइरसबाट संक्रमित भएका छन् ।
स्वास्थ्य मन्त्रालयका अनुसार देशका विभिन्न प्रयोगशालामा विगत २४ घण्टामा १२ हजार ७८४ जनाको पिसिआर परीक्षण गरिएकामा यतिका संख्यामा संक्रमित भेटिएका हुन् ।
मन्त्रालयको प्रवक्ता डा जागेश्वर गौतमका अनुसार हालसम्म ६४ हजार ६९ जना कोरोना भाइरसबाट मुक्त भई घर फर्किएका छन् । पछिल्लो २४ घण्टामा एक हजार ३२९ जना संक्रमित निको भएर घर फर्किएका छन् । हालसम्म १० लाख ७४ हजार ४४८ जनाको पिसीआर गरिएको छ ।
देशभर हाल २२६ संक्रमितको अति सघन कक्षमा उपचार भइरहेको छ भने ३४ संक्रमितलाई भेन्टिलेटरमा राखि उपचार भइरहेको प्रवक्ता गौतमले बताए ।
प्रदेश नं १ मा २८ संक्रमित अति सघन कक्षमा, १ जना भेन्टिलेटरमा, प्रदेश नं २ मा १७ संक्रमितको अति सघन कक्षमा, बागमती प्रदेशमा ११२ संक्रमितको अति सघन कक्षमा तथा २७ जनाको भेन्टिलेटरमा, गण्डकी प्रदेशमा ६ संक्रमितको अति सघन कक्षमा, प्रदेश नं ५ मा ४४ संक्रमितको अति सघन कक्षमा, सुदूरपश्चिममा ४ संक्रमितको अति सघन कक्षमा तथा कर्णाली प्रदेशमा १५ कोरोना संक्रमितको हाल अति सघन कक्षमा उपचार भइरहेको प्रवक्ता गौतमले जानकारी दिए ।
हाल देशभर २२ हजार २१९ जना सक्रिय संक्रमित रहेका छन् । हाल ११ हजार ८९३ संक्रमित होम आइसोलेसनमा बस्दै आएका छन् । होमआइसोलेसनमा रहेका संक्रमितको संख्या प्रदेश नं १ मा एक हजार ८५०, प्रदेश नं २ मा ५५८, बागमती प्रदेशमा ७ हजार १५३, गण्डकी प्रदेशमा ५३२, प्रदेश नं ५ मा एक हजार २०२, कर्णाली प्रदेशमा २८० तथा सुदूरपश्चिम प्रदेशमा ४१८ रहेको छ । हाल सात हजार ४५१ ज्ना संक्रमित क्वारेन्टिनमा रहेका छन् ।
यस्तै हालसम्म प्रदेश नं १ मा पाँच हजार ७३३, प्रदेश नं २ मा १२ हजार २९१, बागमती प्रदेशमा २० हजार ४९३, गण्डकी प्रदेशमा तीन हजार ५५५, प्रदेश नं ५ मा ९ हजार ५५५, कर्णाली प्रदेशमा तीन हजार १८५ तथा सुदूरपश्चिम प्रदेशमा सात हजार १५५ कोरोना संक्रमित निको भएर घर फर्किएका छन् । हाल चार हजार २०३ जना क्वारेन्टिनमा रहेका छन् ।
मन्त्रालयका अनुसार पछिल्लो २४ घण्टामा प्रदेश नं १ को उदयपुरमा दुई, खोटाङमा ३, झापामा १६, भोजपुरमा एक, मोरङमा ८१, संखुवासभामा १ तथा सुनसरीमा ८ जनामा कोरोना संक्रमण पुष्टि भएको छ । यस्तै प्रदेश नं २ को धनुषामा ९, पर्सामा आठ, बारामा सात, महोत्तरीमा एक, रौतहटमा पाँच, सप्तरीमा तीन, सर्लाहीमा छ तथा सिरहामा सात जनामा कोरोना देखिएको छ ।
गण्डकीको कास्कीमा चार, तनहुँमा १९, बागलुङ तीन, स्याङ्जामा चार, नवलपरासी पूर्वमा ४० तथा लमजुङमा सात जना कोरोना संक्रमित भेटिएका छन् । यस्तै, प्रदेश नं ५ को कपिलवस्तुमा चार, गुल्मीमा चार, दाङमा नौ, नवलपरासीमा एक, पाल्पामा १५, प्युठानमा पाँच, बर्दियामा १३, बाँकेमा ५० तथा रूपन्देहीमा ५२ जनामा कोरोना संक्रमण पुष्टि भएको प्रवक्ता गौतमले जानकारी दिए ।
सुदूरपश्चिम प्रदेशको कैलालीमा ५५, कञ्चनपुरमा २१, डडेल्धुरामा एक, बैतडीमा एक तथा बझाङमा एक जनामा कोरोना संक्रमण पुष्टि भएको छ ।
काठमाडौं उपत्यकामा एक हजार ५९९ कोरोना संक्रमित थपिएका छन् । आइतबार नेपालमा कोरोनाबाट सात जनाको मृत्यु भएको छ । मृत्यु हुनेमा तीन पुरुष तथा चार महिला रहेका छन् । योसँगै नेपालमा कोरोनाबाट मर्नेको संख्या ५३५ पुगेको छ ।
