काठमाडौं– गैरआवासीय नेपाली संघ (एनआरएनए) ले पहिलोपटक क्षेत्रीय विज्ञ सम्मेलन ‘नलेज कन्भेन्सन’ को आयोजना गर्ने भएको छ ।
बुधबार पत्रकार सम्मेलनमार्फत आगामी २६ र २७ सेप्टेम्बरमा आठौँ एनआरएनए एसिया प्यासिफिक क्षेत्रीय बैठक तथा पहिलो एसिया प्यासिफिक विज्ञ सम्मेलन आयोजना गर्न लागिएको जानकारी गराइएको हो ।
विशेषगरी नोबेल कोरोना भाइरस (कोभिड–१९) ले विपत्मा परेका नेपालीहरूलाई फिर्ता गरेर उनीहरूको सीप स्वदेशमै उपयोग गर्ने विषयमा सम्मेलन आयोजना गर्न लागिएको पनि एनआरएनएले जनाएको छ ।
एनआरएनएका अनुसार आगामी हुने सम्मेलनमा श्रम, रोजगार तथा सामाजिक सुरक्षा मन्त्री रामेश्वर राय यादव र परराष्टमन्त्री प्रदीप ज्ञवालीलाई प्रमुख अतिथिका रूपमा निमन्त्रणा गरिएको छ ।
दुईदिने सम्मेलनबाट विदेशमा दक्षता, सीप हासिल गरेका नेपालीहरूलाई फर्काएर स्वरोजगार सिर्जनासँगै देश विकासमा टेवा पु¥याउनका लागि कार्यक्रमको आयोजना गरिएको एनआरएनएले जनाएको छ । साथै, एनआरएनए र सरकारको सहकार्यमा उक्त पहल गरिने जनाइएको छ ।
विदेशमा सिकेको सीप नेपाली भूमि मै उपयोग गर्नका लागि सम्मेलन आयोजना गरिएको सम्मेलनका आयोजक रविन्द्र श्रेष्ठले बताएका छन् ।
उनले भने, ‘कोभिड–१९ का कारण होस् वा अन्य कारणले विदेशबाट फर्केकालाई कसरी स्वरोजगार र देश समृद्ध बनाउन सकिन्छ भन्नेमा सम्मेलन केन्द्रित रहेको छ ।’ साथै, नेपालीको उद्धार कुन तवरले गर्ने भन्नेबारेमा पनि सम्मेलनमा छलफल हुने उनले बताए ।
विभिन्न भाग छुट्टाएर आयोजना गर्न लागिएको सम्मेलनमा एनआरएनएमा महिला सहभागिता, भूमिका, नेतृत्व र निकासका विषयमा बहस गरिने एनआरएनए एसिया प्यासिफिकका कोअर्डिनेटर अम्रिता थापा (कञ्चन) ले बताएकी छन् । उनले भनिन्, ‘आगामी दुईदिने सम्मेलनले संघमा महिलाको उपस्थिति, भूमिका, नेतृत्व र निकासका बारे गहन बहस गर्नेछ ।’ उनका अनुसार पहिलो दिन युथ, दोस्रो दिन महिला र तेस्रो दिन नलेजसम्बन्धि गरी तीन सेसनमा रहेर छलफल हुनेछ ।
आगामी हुने सम्मेलनको उद्देश्य ‘नेटवर्किङ’ नै बनाएर आफूसँग भएको ज्ञान, सीप आदानप्रदान गर्न ‘नलेज कन्भेन्सन’ गर्न लागिएको एसिया प्यासिफिक सम्मेलनका को–अर्डिनेटर डा. देवी बस्नेतले बताएका छन् । ‘विदेशमा रहेका हकमा के गर्ने र फर्केर जानेहरूका हकमा के गर्ने भन्नेमा विदेशमा बस्ने नेपालीमा समस्या रहेको छ । यद्यपि, यही समस्याको खोजी सम्मेलनले गर्नेछ ।’ साथै, सम्मेलनमा कोरिया, जापानलगायत मुलुकहरू तीव्र गतिमा किन अगाडि बढिरहेका छन् भन्ने उदाहरण पनि प्रस्तुत गरिने उनले बताए ।
सम्मेलनमा नेपाल र विदेशमा रहेका विज्ञहरूको जम्काभेटमार्फत वैचारिक प्रस्तुति पनि प्रष्फुटित गरिने एनआरएनएले जनाएको छ ।
एनआरएनएका अनुसार यसअघि महिनामा एकचोटी हुने विज्ञ सम्मेलनले फड्को मारेको र प्रत्येक हप्ता हुने सम्मेलनले औधी आसा पलाएको छ । साथै, गैरआवासीय नेपालीलाई जोड्नका लागि यस सम्मेलनले नेटवर्किङको भूमिका निर्वाह गरेको एनआरएनएले जनाएको छ ।
आगामी हुने दुईदिने सम्मेलनमा कृषि, स्मार्ट सिटी र स्मार्ट टेक्नोलोजी, हेल्थलगायत समग्र विषयमा छलफल गरिने आयोजकले जनाएको छ ।
स्मार्ट सिटी एन्ड एड्भान्स आइसिटी ट्रेन्डस्का सेसनअन्तर्गत स्मार्ट सिटी र स्मार्ट टेक्नोलोजी कसरी विकास गर्न सकिन्छ भनेर छलफल गरिने आयोजकले जनाएको छ । र, यसभित्र नेपालमा स्मार्ट शिक्षादेखि अन्य विविध पाटोमा छलफल चल्ने बताइएको छ ।
त्यस्तै, धेरै जसो विद्यार्थीहरू विदेशमा ग्र्याजुएट गरेपछि पनि किन फर्किँदैनन् र सरकारले त्यस्ता विद्यार्थीहरूलाई किन फर्काउने वातावरण गरेको छैन भन्ने यावत् विषयमा छलफल गरिने बताइएको छ ।
यसका लागि नेपाल र दक्षिण कोरियामा रहेका विज्ञहरूले प्रस्तुति दिने आयोजकले जनाएको छ ।
