दोहा– संयुक्त अरब इमिरेट्स (युएई) बाट काठमाडौंसम्मको भाडा अरुबेलाको भन्दा तीन गुणा महँगो असुलिएको छ । ट्राभल एजेन्सीहरूले युएईबाट काठमाडौंसम्मको भाडा २ हजार २ सयदेखि ३ हजार ५ सय दिरामसम्म असुलिरहेका छन् ।
संयुक्त अरब इमिरेट्स (युएई) बाट काठमाडौंका लागि तोकेको नियमित उडानको भाडादरमा टिकट नपाएको भन्दै युएईबाट स्वदेश फर्कन लागेका नेपालीहरूले गुनासो गरेका छन् । यसघि सरकारले चार्टर्ड उडानको भाडादर १ हजार ४ सय ५० दिराम तोकेको थियो ।
सरकारले नियमित उडान भन्दै आएको भए पनि नियमितको टिकट नै नपाएको युवाहरूले बताएका छन् । तर, महँगो शुल्क तिर्दा जति पनि टिकट पाइने गरेको त्यहाँबाट नाम नबताउने सर्तमा एक नेपालीले बताए ।
उनका अनुसार ट्राभल एजेन्सीमा गएर बुझ्दा टिकट नपाइने तर नेपाली होटल, किराना पसल तथा कार्गो कार्यालयमा भने जति पनि टिकट पाउने गरेको त्यहाँबाट स्वदेश फर्कन टिकटको खोजीमा भौतारिरहेका नेपालीहरू बताउँछन् ।
नेपाल सरकारले नियमित ङ्खलाइट खुलेको भनेर जनताको आँखामा छारो मात्र हालेको छैन पूरै भ्रममा पारेको भन्दै प्रबासी नेपालीहरूले भन्दै आएका छन् । यता सरकारले पनि नियमित उडान भन्ने तर दैनिक ८ सय जना नबढ्ने गरी मात्र आउन पर्ने सर्त राख्नुले सरकार नै बिचौलियाको इशारामा हिँडिरहेको उनीहरूको भनाइ छ ।
नियमित उडान भएको मुलुकहरूबाट कोभिड–१९ परीक्षण नेगेटिभ प्रमाण भएको यात्रु सिधै घर जान मिल्ने गरी आउने भन्दै गर्दा तर पछि सरकारले क्वारेन्टाइनको अभाव देखाएर ८ सय जना मात्र आउन मिल्ने गरी सरकारले नै युवाहरू ठग्ने अभियानमा लागेको उनीहरू बताउँछन् ।
सरकारले कमिसनको खेलमा एकातिर केही उडानलाई मात्रै अनुमति दिने र अर्कातिर कोटा संख्या तोकेर जनतालाई अझै थप समस्यामा पारेकोमा प्रबासी नेपालीहरू आक्रोशित भएका छन् ।
युएईको दुबईस्थित भोल्ट्रासन, ट्रान्सगार्ड , इमिरेट्सलगायत विभिन्न ठूला कम्पनीहरूले आङ्खनै खर्चमा सबैलाई कोरोना परीक्षण गराएर नेपाल पठाउन तयार भए पनि ट्राभलहरूबाट टिकट लिँदा अत्यन्तै महँगो पर्ने, भने जति टिकट पनि नपाउने तथा महँगै भए पनि कम्पनीले चार्टर गरेर पठाउन तयारी गरे पनि नेपाल सरकारको ८ सय जना मात्र आउन पाउने नियमले चार्टर अनुमति नपाएर कम्पनीभित्रै थप नेपाली श्रमिकहरू अलपत्र पर्न थालेको एनआरएनए युएईले जनाएको छ ।
युएईमा भिसा सकिएको, भिसा क्यान्सिल भएकाहरूको जरिवाना लाग्न सुरु भइसकेकाले आझै थप समस्या हुन थालेको बताइएको छ । यसघि पनि जरिवाना तिर्न नसकेर १७ नेपाली स्वदेश फर्कन सकेका थिएनन् ।
युएईस्थित नेपाली दूताबासका अनुसार हालसम्म दूताबासमा नेपाल फर्कन चाहने नेपालीको संख्या ४५ हजारभन्दा बढी रहेको छ । अहिले करिब १७ हजार नेपाली नेपाल फर्किसकेका छन् । यस्तै, साउदी अरबको रियादबाट स्वदेश फर्किन नेपाल एयरलाइन्सको चार्टर उडान कम भएको भन्दै त्यहाँ स्वदेश फर्किने नेपालीहरूले सहज रूपमा टिकट नपाएको जनाएका छन् ।
साउदीस्थित नेपाली दूताबास रियादमा नाम रजिस्टर गरी स्वदेश फर्कन प्रतिक्षारत नेपालीहरू धेरै भएको हुनाले टिकट लिन आउनेको भिड नियन्त्रण गर्न हम्मेहम्मे परेको त्यहाँ स्थित नेपाल एयरलाइन्सको कार्यालयले जनाएको छ ।
