काठमाडौं– वैदेशिक रोजगारीमा जानेहरूले नो अब्जेक्सन सर्टिफिकेट (एनओसी) सम्बन्धित नेपाली दूताबासबाट प्रमाणित गराई पेस गरेको खण्डमा मात्र श्रम स्विकृति प्रदान गर्ने वैदेशिक रोजगार विभागले जनाएको छ ।
बुधबार ३ बुँदे सर्तहरू जारी गर्दै पूर्वश्रम स्विकृति लिएका, श्रम स्विकृति लिने प्रक्रियामा रहेका नयाँ र नयाँ व्यक्तिगत श्रम स्विकृति लिनेहरूले दूताबासबाट एनओसी प्रमाणित गराई वैदेशिक रोजगार कार्यालयमा अनिवार्य बुझाउनुपर्ने विभागले जनाएको छ ।
जारी सूचनामा २९ फागुन ०७६ अघि मागपत्र प्रमाणित भई पूर्वश्रम स्विकृति लिएकाको हकमा अन्तिम श्रम स्विकृति लिनका लागि गन्तव्य मुलुकको सम्बन्धित रोजगारदाता कम्पनीले हालै जारी गरेको एनओसी सम्बन्धित दूताबासबाट प्रमाणित भई अनिवार्य पेस गर्नुपर्ने उल्लेख छ ।
यस्तै, श्रम स्विकृति लिने प्रक्रियामा रहेका नयाँ र मागपत्रको हकमा समेत गन्तव्य मुलुकको सम्बन्धित रोजगारदाता कम्पनीले हालै जारी गरेको एनओसी सम्बन्धित दूताबासबाट प्रमाणित गराई अनिवार्य रूपमा पेस गर्नुपर्ने जारी सूचनामा उल्लेख गरिएको छ ।
साथै, नयाँ व्यक्तिगत श्रम स्विकृतिको हकमा गन्तव्य मुलुकको सम्बन्धित रोजगारदाता कम्पनीको एनओसी वैदेशिक रोजगार कार्यालय, ताहाचालको आधिकारिक इमेलमा पठाउनुपर्ने भनिएको छ ।
यसै सन्दर्भमा विभागका महानिर्देशक कुमारप्रसाद दाहालले नयाँ श्रम स्विकृतिको हकमा भन्दा पुराना श्रम स्विकृतिको हकमा समस्या आउने भएकाले अनिवार्य रूपमा एनओसी बुझाउनुपर्ने बताएका छन् ।
उनले भने, ‘२९ फागुनअघि पूर्व श्रम स्विकृति लिएकाका मागपत्र प्रमाणित हुन पनि बाँकी रहेका छन् । यसकारण पुनः एनओसी माग गरिएको छ ।’
एनओसी नलिई सिधै श्रम स्विकृति दिएर वैदेशिक रोजगारीको बाटो खोलिदिएको खण्डमा समस्या आउने उनले बताएका छन् ।
मागपत्रका आधारमा मात्र श्रम स्विकृति दिएर रोजगारीमा पठाउने तर, पछि उक्त कम्पनी नै नभएको अवस्थामा पुनः श्रमिकको उद्धार गर्नुपर्ने स्थिति पनि पैदा हुने उनले बताए ।
‘एनओसी नै नलिई हामीले यताबाट कामदार पठायौँ तर, कामदार पुग्दा कम्पनी नै भएन भने समस्या निम्तिन्छ । त्यसपछि श्रमिकको पुनः उद्धार गर्नुबाहेक अरु विकल्प हुँदैन । यसकारण एनओसी अनिवार्य गरिएको हो,’ उनले भने ।
नोबेल कोरोना भाइरस (कोभिड–१९) का कारण कम्पनीहरू बन्द भएको हुन सक्ने र श्रमिक पुग्दा रोजगार नपाउने भएकाले पनि एनओसी अनिवार्य गरिएको उनले बताएका छन् । साथै, सैद्धान्तिक रूपमा श्रम स्विकृति खुला गरिएको भनिए पनि ‘लकडाउन’ पछि मात्र कामहरू गरिने उनले बताए ।
महानिर्देशक दाहालका अनुसार यदि एनओसी नबुझाइएको खण्डमा श्रम स्विकृति दिइने छैन । उनले भने, ‘एनओसी नबुझँएको खण्डमा कसैलाई श्रम स्विकृति दिइने छैन । पछि गएर समस्या निम्ताउनुभन्दा अहिले नै कडाई गरौँ भनेर एनओसी अनिवार्य गरिएको छ ।’
आइतबार बसेको मन्त्रिपरिषद्को बैठकले विदेश जान चाहनेका लािग नयाँ श्रम खुला गर्ने निर्णय गरेसँगै बुधबार विभागले श्रम स्विकृति लिनका लागि मापदण्डहरू तोेकेको थियो । गन्तव्य मुलुकमा कोभिड–१९ को संक्रमण केही हदसम्म घटेसँगै श्रम स्विकृति दिन थालिएको बताइएको छ ।
कोभिड–१९ को संक्रमणका कारण लगभग ५ देखि ७ हजारको श्रम स्विकृति ‘पेन्डिङ’ मा रहेको महानिर्देशक दाहालले बताएका छन् ।
