काठमाडाैं- नेपाल लोकतान्त्रिक वैदेशिक रोजगारी व्यवसायी एसोसिएसनले विधान विपरीत निर्णय गरेको भन्दै जिल्ला प्रशासन कार्यालयलाई ध्यानाकर्षण गराएकाे छ। एसोसिएस सोमबार त्रुटिपूर्ण निर्णय सच्याउन अनुरोध गर्दै जिल्ला प्रशासन कार्यालय, काठमाडौमा पत्र बुझाएको हाे ।
एसोसिएसले प्रमुख जिल्ला अधिकारी ईश्वर राज पौडेललाई पत्र बुझाउदै प्रशासनले गत असार २२ गते एसोसिएसनका अध्यक्षबाट राम प्रसाद गैरेलाई हटाएर किशोर कुमार केसीलाई जिम्मेवारी दिइने भन्दै गरेको निर्णय संस्थाको विधान विपरीत भएको जनाएको छ ।
गत असार पाँच गते सम्पन्न १३औं साधारणसभाबाट एसोसिएसनको अध्यक्ष पदमा निर्वाचित गैरेलाई संस्थाको विधानको दफा ७ र ८ बमोजिम अध्यक्ष हुन आवश्यक योग्यता नपुगेको देखिएको भन्दै अध्यक्ष पदबाट हटाई निर्वाचनमा अध्यक्ष पदका प्रतिस्पर्धी उम्मेदवार केसीलाई प्रशासनले अध्यक्षको जिम्मेवारी तोकेको थियो ।
एसोसिएसनको कार्यसमितिले प्रजिअ पौडेल समक्ष सो निर्णय मान्य नहुने स्पष्ट पारेको छ । सिडिओ कार्यालयमा बुझाएको पत्रमार्फत संस्थाको विधानको दफा १३को (४)मा अध्यक्षको पद रिक्त भएमा निर्वाचन प्रक्रियाबाट पदपूर्ति गर्ने प्रावधान रहेको समेत स्मरण गराइएको छ ।
जिल्ला प्रशासनमा एसोसिएसनका कार्यवाहक अध्यक्ष सुवर्ण लामासहित नवनिर्वाचित कार्यसमितिका सम्पूर्ण पदाधिकारीकारि, पूर्व अध्यक्ष, सम्पूर्ण क्रियाशील सदस्यका साथै गत असार पाँच गते निर्वाचन गराउने निर्वाचन अधिकृत समेतको उपस्थिति थियो ।
