एजेन्सी - युद्धका कारण विस्थापित प्यालेस्टिनी नागरिक, विशेषगरी बालबालिकामा केही क्षणको खुसी बाँड्न फुटबललाई माध्यम बनाइरहेका मानवीय सहायता कार्यकर्ता मोहम्मद फवाज अल-वाहिदी इस्राएली ड्रोन आक्रमणमा मारिएका छन्। ५७ वर्षीय अल-वाहिदीको गाजा सिटीको साब्रा क्षेत्रमा गुडिरहेको नागरिक गाडीलाई लक्षित गरी गरिएको आक्रमणमा मृत्यु भएको हो।
अल-वाहिदी गाजामा सक्रिय इजिप्टसियन रिलिफ कमिटीका जनसम्पर्क निर्देशक थिए। उनले युद्धका कारण विस्थापित परिवार र बालबालिकाको मानसिक तनाव कम गर्न विभिन्न आश्रयस्थलमा ठूला स्क्रिन जडान गरी फिफा विश्वकप २०२६ का खेलहरू हेर्ने व्यवस्था मिलाउँदै आएका थिए।
स्थानीय स्वास्थ्य अधिकारीका अनुसार सोही आक्रमणमा १० वर्षीय हम्जा अल-देरी, उनका ८ वर्षीय भाइ फादी अल-देरीसहित अन्य तीन सर्वसाधारण बालबालिकाको पनि ज्यान गएको छ। घटनाले गाजामा सर्वसाधारण र राहतकर्मीको सुरक्षामाथि पुनः गम्भीर प्रश्न उठाएको छ।
यो घटना इजिप्टका मुख्य प्रशिक्षक होसाम हसनले विश्वकपको पत्रकार सम्मेलनमार्फत प्यालेस्टिनी नागरिक र सहायताकर्मीहरूको सुरक्षाका लागि अन्तर्राष्ट्रिय समुदायसँग अपिल गरेको भोलिपल्ट भएको हो। यसअघि इजिप्टको टोलीले अस्ट्रेलियामाथिको जितपछि मैदानमा प्यालेस्टाइनको झण्डा फहराउँदै आफ्नो विजय गाजाका जनतालाई समर्पण गरेको थियो। संयुक्त राष्ट्रसंघीय निकायहरूले युद्धविरामपछि पनि गाजामा राहत वितरणमा संलग्न सहायताकर्मी र सर्वसाधारणमाथि भइरहेका आक्रमणले मानवीय कार्य सञ्चालन झन् जोखिमपूर्ण बन्दै गएको बताएका छन्।
