क्युएनए- संयुक्त राष्ट्रसंघीय मानवतावादी मामिलाका उपमहासचिव टम फ्लेचरले गाजा पट्टीले युद्धविरामको छ महिना विति सक्दा पनि प्यालेस्टिनीहरू असुरक्षा र सफा पानी, स्वास्थ्य सेवा र शिक्षाको पहुँचको अभावमा गम्भीर संकटको सामना गरिरहेको जनाएका छन् ।
फ्लेचरले संयुक्त राष्ट्र सुरक्षा परिषद्को सत्रमा बोल्दै संयुक्त राज्य अमेरिका र इरान बीचको सम्झौता र लेबनानमा तत्काल युद्धविरामको आशाबीच गाजाका समस्यामा ध्यान दिनु पर्ने बताएका छन्। तीन वर्षको युद्धमा करिब ६० जना सहायताकर्मीको हत्या भएको सम्झना गर्दै उनले सहायता पुर्याउन गाजा पट्टी विश्वको सबै भन्दा खतरनाक ठाउँ भएको बताएका छन् ।
संयुक्त राष्ट्रसंघका उपमहासचिवले गाजाको ७० प्रतिशत जनसङ्ख्यालाई पर्याप्त आश्रयको आवश्यकता रहेको, जनाउदै एउटा अस्पताल पनि पूर्ण रूपमा सञ्चालनमा नभएकाले जनाताको अवस्था बिग्रँदै गएको बताएका छन् । इजरायली कब्जा बलहरूले जेनेरेटर, इन्जिन तेल र स्पेयर पाट्र्सको प्रवेशमा सबै भन्दा धेरै बाधा पुर्याइरहेको उनले उल्लेख गरेका छन् ।
संयुक्त राष्ट्रसंघका अधिकारीले गाजाका सबै सीमा नाकाहरू खोल्न र आवश्यक आपूर्तिमा इजरायली प्रतिबन्धहरू हटाउन आग्रह गरेका छन् । उनले मानवीय सहायतालाई सीमा प्रतिबन्धबाट छुट दिन, मानवीय कामदारहरूलाई दीर्घकालीन भिसा दिन, जोर्डन र प्यालेस्टिनी सरकारहरूद्वारा समन्वय गरिएको शिविरहरु पुनः सुरु गर्न र चिकित्सा निकासी विस्तार गर्न पनि आह्वान गरेका छन् ।
युद्धविराम पछि, गाजामा अनिकालको केहि अवस्था सहज भएता पनि यो गम्भीर सङ्कटको चरणमा रहेको बताइएको छ । करीब २१ हजार ट्रक सहायता संकलन गरिएको र पानी तथा स्वास्थ्य सेवा विस्तार गरिनुका साथै दशौँ हजार बालबालिकालाई खोप लगाइएको, र छ लाख भन्दा बढी मानिसलाई आश्रय प्रदान गरिएको उनले बताएका छन् ।
फ्लेचरले यो पर्याप्त नभएको बताउदै गाजा अस्थायी मानवीय समाधान र प्यालेस्टिनीहरूको उद्धारतालाई धन्यवाद दिनु भएको छ । यो एक अस्थिर अवस्था भएको उल्लेख गर्दै उनले सुरक्षा, आश्रय, पानी, स्वास्थ्य सेवा र शिक्षा जस्ता आधारभूत आवश्यकताहरूबाट वञ्चित रहेको कुरामा जोड दिँदै युद्धविरामपछि करिब एक हजार प्यालेस्टिनी मारिएको बताएका छन् ।
फ्लेचरले सुरक्षा परिषद्का लागि तीन प्रमुख मागहरू नागरिक र मानवीय कामदारहरूको सुरक्षा, सहायताका लागि सुरक्षित, दिगो र निर्बाध पहुँच सुनिश्चित गर्ने, र पर्याप्त रकम उपलब्ध गराउने बताएका छन् ।
