काठमाडौं– नेपालमा कोरोना संक्रमण दिनदिनै भयावह बन्दै गएको छ । संक्रमित संख्या बढेसँगै मृत्युदरको ग्राफसमेत उकालो चढ्दैछ । दिनानुदिन संक्रमित संख्यासँगै मृत्युदर बढ्दै गएपछि स्वास्थ्य आपत आइलागेको स्वास्थ्य तथा जनसंख्या मन्त्रालयले जनाएको छ ।
तर, सुरुका दिनकै आइसोलेसन र क्वारेन्टिनले संक्रमित धान्दै आएको छ ।
मन्त्रालयका प्रवक्ता डा. जागेश्वर गौतमले दैनिक बढिरहेको संक्रमणलाई रोकथाम र नियन्त्रण गर्न सीमित साधन स्रोतले गर्नु परेकाले अप्ठ्यारो परिस्थितिसँग जुध्नुपरेको बताए ।
आइतबार एकैदिन एक हजार २२१ जना संक्रमित फेला परेपछि त्रास बढेको हो । आइतबार उपत्यकामा मात्र ४२९ जना संक्रमित फेला परेका छन् । यो अहिलेसम्मकै धेरै संक्रमित संख्या भेटिएको हो ।
यसरी संक्रमित बढिरहँदा मृत्यु हुनेको संख्या समेत दिनै बढ्दै गएका छन् । हालसम्म शनिबार २४ घण्टा २० जनाले कोरोनाका कारण ज्यान गुमाएका थिए । यस्तै, आइतबार थप १४ जनाको मृत्यु भएको छ ।
पछिल्लो २४ घण्टामा १४ जनाको कोरोनाबाट मृत्यु भएको हो । मृत्यु हुनेमा ४ महिला र १० पुरुष रहेको स्वास्थ्य तथा जनसंख्या मन्त्रालयले जनाएको छ । मृतक महिलामा सुनसरी, बारा, महोत्तरी र काठमाडौंका १–१ जना रहेका छन् ।
यस्तै मृतक पुरुषमा महोत्तरी र रूपन्देहीका २–२ तथा सुनसरी, मोरङ, रौतहटका, ललितपुर, भक्तपुर र नवलपरासीका १–१ जना गरी १० जना रहेका छन् ।
योसँगै देशभर कोरोनाबाट मृत्यु हुनेको कुल संख्या २२१ जना पुगेको मन्त्रालयका प्रवक्ता डा. जागेश्वर गौतमले जानकारी दिए ।
यसअघि सबैभन्दा बढी देशभर एकैदिन एक हजार १११ जनामा कोरोना संक्रमण पुष्टि भएको थियो । काठमाडांै उपत्यकामा पनि आइतबार कोरोना संक्रमितको संख्या हालसम्मकै बढी हो ।
मन्त्रालयका प्रवक्ता प्रा डा. गौतमले आइतबार १२ हजार ७१७ जनामा पीसीआर परीक्षण भएकामा काठमाडौंसहित देशभर उक्त संख्यामा कोरोना संक्रमण पुष्टि भएको जानकारी दिए । उनका अनुसार हालसम्म ६ लाख ८२ हजार ३४३ जनाको पीसीआर परीक्षण गरिएको छ ।
हाल देशभर सक्रिय संक्रमितको संख्या १७ हजार ५१८ रहेको छ । संस्थागत आइसोलेसनमा १० हजार ६१२ जना रहेका छन् । होम आइसोलेसनमा रहेकाको सङ्ख्या छ हजार ९ सय रहेका छन् ।
आइतबारसम्म देशभर ७ हजार ७९७ जना क्वारेन्टिनमा छन् । पछिल्लो २४ घण्टामा थप २६७ कोरोना जितेर घर फर्किएको र हालसम्म कोरोना जितेर घर फर्किनेको संख्या २० हजार ८२२ पुगेको मन्त्रालयले जनाएको छ ।
यसरी दिनानुदिन कोभिड–१९ को संक्रमण बढ्दै गएपछि मन्त्रालयले सबैलाई सर्तकता अपनाउन आग्रह गरेको छ । कोरोनाबा समाजलाई बचाउनु सबैको दायित्व रहेकाले सबैले यस कठिन परिस्थितिलाई बुझेर आ–आफ्नो तर्फबाट रोकथाम र नियन्त्रणका लागि गर्न सकिने सहयोग गर्न डा. गौतमले अनुरोध गरेका छन् ।
सरकारले आफ्नो स्रोत साधनले भ्याएसम्म राम्रो सेवा प्रदान गर्न खोज्दा–खोज्दै पनि कतिपय बेलामा संक्रमितको अपेक्षा पूरा नभएको उनको भनाइ छ ।
एकजना संक्रमित व्यक्तिले तीन हजार व्यक्तिसम्म संक्रमण फैलाउन सक्ने भएकाले सबैले सरकारले तोकेको मापदण्ड पूरा गर्नुपर्ने सुझाव उनको छ ।
संक्रमित बढ्दै गएपछि रिफर जथाभावी गरिएको पाइएकाले समन्वय गरेरमात्र गर्न मन्त्रालयले निर्देशन दिएको छ ।
मन्त्रालयका प्रवक्ता डा. गौतमले विभिन्न निजी तथा सामुदायिक अस्पतालले सघन उपचार कक्षमा भएका बिरामी कोभिड–१९ डेडिकेडेट अस्पतालमा रिफर गर्दा समन्वय नगरी रिफर गरिएकाले समन्वय गर्न निर्देशन दिइएको बतए ।
