काठमाडौं- नेकपा एमालेका अध्यक्ष केपी शर्मा ओलीले पार्टीमा विधि र पद्धति भत्किनुमा आफ्नो मात्र दोष नरहेको बताएका छन् । उनले चुनावी समीक्षा र पुनर्गठन कार्यदलको बागमती प्रदेश भेला लगत्तै शनिबार प्रदेश र केही केन्द्रीय नेताहरूसँग आफ्नै निवास गुण्डुमा कुराकानी बताएका हुन् ।
उनले आफ्नै निवास गुण्डुमा कुराकानी गर्दै अध्यक्ष ओलीले पार्टीमा आएको संकटको समाधान सामूहिक रूपमै गर्नुपर्ने भन्दै केही नेताहरूले आफूलाई मात्र दोष दिएर उम्कने प्रयास गरिरहेकोमा असन्तुष्टि जनाएका थिए ।
बागमती भेलामा केही नेताहरूले ओलीको बिदाइको माग गरेका थिए । भेलामा त्यस्तो आवाज उठाउनेहरूलाई उपाध्यक्ष विष्णु पौडेल र महासचिव शङ्कर पोखरेलको साथ रहेकोतर्फ सङ्केत गर्दै ओलीले पुनर्गठनका नाममा पार्टीलाई तलमाथि पार्न नहुने बताएका थिए ।
‘पुनर्गठनका नाममा पार्टीलाई तलमाथि पार्ने काम गर्नुहुँदैन’, अध्यक्ष ओलीले गुण्डुमा भनेको भनाइ उद्धृत गर्दै एक नेताले भने- ‘लोभी पापी देखिएका छन् ।’ प्रदेशका नेताहरूसँग करिब एक डेढ घण्टा कुराकानी गरेका ओलीले उपाध्यक्ष पौडेल र महासचिव पोखरेलले पार्टी कसरी चल्छ र चलाउनुपर्छ भन्ने बुझिनसकेको समेत बताएका थिए ।
