काठमाडौं - थाइल्याण्डकी राजकुमारी बजरकितियाभाको ४७ वर्षको उमेरमा निधन भएको छ। तीन वर्षभन्दा बढी समयदेखि कोमामा रहेकी उनको बिहीबार साँझ निधन भएको थाइल्याण्डको शाही दरबारले जनाएको छ।
सन् २०२२ डिसेम्बरमा आफ्ना कुकुरलाई व्यायाम गराइरहेका बेला अचानक ढलेपछि उनी बेहोस भएकी थिइन्। चिकित्सकहरूका अनुसार मुटुमा भएको माइकोप्लाज्मा संक्रमणका कारण हृदयको धड्कन असामान्य बनेपछि उनी कोमामा पुगेकी थिइन्। त्यसयता निरन्तर उपचारमा रहे पनि उनको स्वास्थ्यमा सुधार आउन सकेन।
राजकुमारी बजरकितियाभा केवल शाही परिवारकी सदस्य मात्र नभई थाइल्याण्डको न्याय प्रणाली सुधारको पक्षमा आवाज उठाउने प्रभावशाली व्यक्तित्वका रूपमा परिचित थिइन्। विशेषगरी जेलमा रहेका महिला कैदीहरूको अवस्था सुधार र कारागार व्यवस्थापनमा परिवर्तनको आवश्यकता उनले निरन्तर उठाउँदै आएकी थिइन्।
कानुन विषयमा उच्च शिक्षा हासिल गरेकी उनले अमेरिकाबाट दुई स्नातकोत्तर उपाधि प्राप्त गरेकी थिइन्। उनले न्यूयोर्कस्थित संयुक्त राष्ट्रसंघमा थाइल्याण्डको स्थायी नियोगमा काम गरेकी थिइन् भने स्वदेश फर्किएपछि सरकारी कानुनी निकायहरूमा महत्वपूर्ण जिम्मेवारी सम्हालेकी थिइन्। सन् २०१२ देखि २०१४ सम्म उनी अष्ट्रियाका लागि थाइल्याण्डकी राजदूत पनि रहिन्।
राजा वजिरालोङकोर्नकी जेठी छोरी बजरकितियाभालाई भविष्यमा शाही उत्तराधिकार प्रक्रियामा समेत महत्वपूर्ण भूमिका खेल्न सक्ने व्यक्तित्वका रूपमा हेरिएको थियो। उनको निधनले थाइल्याण्डले एक सक्रिय शाही सदस्य मात्र होइन, सामाजिक न्याय र सुधारका पक्षमा बोल्ने प्रभावशाली आवाज पनि गुमाएको विश्लेषण गरिएको छ।
फिटनेसप्रेमीका रूपमा परिचित उनी लामो दूरीका दौड प्रतियोगिताहरूमा नियमित सहभागी हुन्थिन्। तर तीन वर्षअघि भएको अचानक स्वास्थ्य संकटले उनको सक्रिय सार्वजनिक जीवनलाई एकाएक रोकिदिएको थियो।
