एजेन्सी – इरानको इस्लामिक रिभोलुसनरी गार्ड कोर्प्स (आइआरजीसी) ले अमेरिकाले होर्मुज जलडमरूमध्य क्षेत्रका इरानी बन्दरगाह र टापुहरूमा गरेको आक्रमणको प्रतिकारस्वरूप मध्यपूर्वका विभिन्न अमेरिकी सैन्य अड्डाहरूलाई निशाना बनाएको दाबी गरेको छ।
बुधबार सरकारी सञ्चारमाध्यममार्फत जारी विज्ञप्तिमा आइआरजीसीले बहराइनस्थित अमेरिकी पाँचौं नौसैनिक बेडा, कुवेतको अली अल सलिम हवाई अड्डा तथा जोर्डनको अजराक हवाई अड्डामाथि ड्रोन र क्षेप्यास्त्र आक्रमण गरेको जनाएको छ।
आइआरजीसीका अनुसार अमेरिकी पक्षका २१ लक्ष्यलाई निशाना बनाइएको थियो। तीमध्ये चारवटा लक्ष्य पूर्ण रूपमा ध्वस्त पारिएको दाबी गरिएको छ। ध्वस्त पारिएका संरचनामध्ये जोर्डनस्थित सैन्य अड्डामा रहेको एफ–३५ लडाकु विमानको ह्याङ्गर पनि समावेश रहेको आइआरजीसीले जनाएको छ।
यसैबीच, इरानले आफ्नो जाम शहरको आकाशमा अमेरिकी एमक्यु–९ ड्रोन खसालिएको दाबी पनि गरेको छ।यसअघि मंगलबार अमेरिकाले आफ्नो अपाचे हेलिकोप्टर इरानले खसालेको आरोप लगाउँदै होर्मुज जलडमरूमध्य नजिकको केश्म टापु तथा इरानी तटीय बन्दरगाहहरूमा सैन्य आक्रमण गरेको थियो। आइआरजीसीका अनुसार उक्त अमेरिकी कारबाहीका कारण सिरिक शहरको दूरसञ्चार टावरमा क्षति पुगेको छ भने दुईवटा पानी ट्याङ्की नष्ट भएका छन्।
आइआरजीसीले अमेरिकाले थप सैन्य कदम चालेमा त्यसको “कडा र निर्णायक” जवाफ दिन आफ्ना सैन्य बल पूर्ण रूपमा तयार रहेको चेतावनी दिएको छ। साथै, क्षेत्रीय तनाव थप बढे त्यसको सम्पूर्ण जिम्मेवारी वाशिङ्टनले वहन गर्नुपर्ने पनि उसले उल्लेख गरेको छ।
यद्यपि, इरानको दाबीबारे अमेरिकाले तत्काल कुनै आधिकारिक प्रतिक्रिया जनाएको छैन।
