- संघको नवनिर्वाचित कार्यसमिति
- अध्यक्षः डिकबहादुर खत्री
- प्रथम उपाध्यक्षः महेशकुमार बस्नेत
- द्वितीय उपाध्यक्षः अनिल बोगटी
- तृतीय उपाध्यक्षः लक्ष्मण पौडेल
- महासचिवः हिराबहादुर डाँगी
- सचिवः केदारनाथ अधिकारी
- कोषाध्यक्षः धनमाया सिञ्जाली
- सदस्यः रमा खड्का, तारा तामाङ, तारामणि राई, ध्रुव जिसी, भावना गजुरेल, रविन्द्र राई, विवस ढुंगाना, दीक्षा थपलिया, बाबुराम न्यौपाने र गीता राउत
काठमाडाैं- नेपाल वैदेशिक रोजगार व्यवसायी संघको अध्यक्षमा डिकबहादुर खत्री ‘कुमार’ विजयी भएका छन् । संघको आइतबार सम्पन्न विशेष साधारणसभाबाट उनी ठूलो मतान्तरसहित निर्वाचित भएका हुन् ।
नेकपा एमालेनिकट प्रगतिशील वैदेशिक रोजगार व्यवसायी मञ्च नेपालका उम्मेदवार खत्रीले ३४७ मत प्राप्त गरे । उनका निकटतम् प्रतिस्पर्धी मेघनाथ भुर्तेलले १९२ मत प्राप्त गरे । अध्यक्षका अर्का प्रत्याशी हरिबहादुर पाण्डे क्षेत्रीको पक्षमा १७० मत खस्यो । भुर्तेल नेपाली कांग्रेसको शुभेच्छुक संस्था नेपाल लोकतान्त्रिक वैदेशिक रोजगार व्यवसायी एसोसिएसन र पाण्डे स्वतन्त्र वैदेशिक रोजगार व्यवसायी समूहबाट प्यानलसहित चुनाव लडेका थिए ।
अध्यक्षमा निर्वाचित खत्री नेतृत्वको प्यानलमा प्रगतिशील मञ्चका साथै नेपाली कम्युनिस्ट पार्टी (नेकपा) निकट वैदेशिक रोजगार व्यवसायी गणतान्त्रिक मञ्च र लोकतान्त्रिक एसोसिएसनबाट विद्रोह गरेका व्यवसायी समेटिएका थिए । ‘संयुक्त व्यवसायी प्यानल’ नामबाट चुनावी मैदानमा उत्रिएको उक्त गठबन्धनबाट उम्मेदवार बनेका अधिकांश विजयी भएका छन् ।
संघको १७ सदस्यीय कार्यसमितिमा सात पदाधिकारीमध्ये छ जना र १० सदस्यमध्ये आठ जना खत्री नेतृत्वको संयुक्त व्यवसायी प्यानलका उम्मेदवार निर्वाचित भएका छन् । लोकतान्त्रिक एसोसिएसन एक पदाधिकारी र दुई सदस्यमै सीमित बनेको छ । पाण्डे नेतृत्वको स्वतन्त्र व्यवसायी समूहका सबै उम्मेदवार पराजित भए ।
संघको प्रथम उपाध्यक्षमा महेशकुमार बस्नेत विजयी भएका छन् । उनी संघका निवर्तमान महासचिवसमेत हुन् । लोकतान्त्रिक एसोसिएसन निकट भए पनि उनी खत्रीको प्यानलबाट चुनाव लडेका थिए । बस्नेतले २४१ मत प्राप्त गर्दा उनका निकटतम् प्रतिस्पर्धी कर्णराज कटुवालले १० मत कम अर्थात् २३१ मतमात्र प्राप्त गरे । द्वितीय उपाध्यक्षमा अनिल बोगटी ३१५ मतसहित निर्वाचित हुँदा उनका निकटतम् प्रतिद्वन्द्वी रविन मेगाले मगरले २०५ मत पाए ।
तृतीय उपाध्यक्षमा भने लोकतान्त्रिक एसोसिएसनका उम्मेदवार लक्ष्मण पौडेल २५९ मतसहित विजयी भएका छन् । उनका निकटतम् प्रतिस्पर्धी तुलसी पुरी २५६ मत ल्याउँदै झिनो मतान्तरले पराजित भएका हुन् ।
त्यसैगरी महासचिव पदमा हिराबहादुर डाँगी २७३ मतसहित निर्वाचित भएका छन् । उनका निकटतम् प्रतिद्वन्द्वी नूर मोहम्मद मियाँले २४९ प्राप्त गरेका थिए । सचिव पदमा केदारनाथ अधिकारी २९४ मतसहित विजयी हुँदा निकटम् प्रतिद्वन्द्वी राजकाजी भोलान (राज लामा)ले २४४ मत प्राप्त गरेका छन् ।
कोषाध्यक्षमा संघकी निवर्तमान कोषाध्यक्ष्य धनमाया सिञ्जाली नै निर्वाचित भएकी छन् । उनले ३२३ मत ल्याउँदा निकटतम् प्रतिद्वन्द्वी विद्यालक्ष्मी बज्रचार्यको पक्षमा १९५ मत खसेको थियो ।
कार्यसमिति सदस्यमा रमा खड्का ३३६ मत, तारा तामाङ ३०१, तारामणि राई २८४, ध्रुव जिसी २७०, भावना गजुरेल २५९, रविन्द्र राई २५८, विवस ढुंगाना २५४, दीक्षा थपलिया २५२, बाबुराम न्यौपाने २५० र गीता राउत २३३ मत ल्याएर विजयी भएका छन् ।
संघको निर्वाचनका लागि कूल ७१९ मत खसेको थियो । भुवनसिंह गुरुङ नेतृत्वको निवर्तमान कार्यसमिति आन्तरिक विवादका कारण कार्यकाल पूरा नगरी विघटन भएपछि विशेष साधारणसभामार्फत नयाँ कार्यसमिति चयन गरिएको हो । निवर्तमान अध्यक्ष गुरुङको कार्यशैलीप्रति असन्तुष्टि जनाउँदै बहुमत पदाधिकारीले राजीनामा दिएपछि कार्यसमिति विघटन हुन पुगेको थियो । संघको विधानमा बहुमत पदाधिकारीले राजीनामा दिएमा कार्यसमिति स्वतः विघटन हुने व्यवस्था छ । सोही व्यवस्थालाई टेकेर जिल्ला प्रशासन कार्यालय काठमाडौंलेसमेत संघलाई निर्वाचनमार्फत नयाँ कार्यसमिति चयन गर्न अनुमति दिएको थियो ।
‘नीतिगत सुधार प्राथमिकतामा’
नेपाल वैदेशिक रोजगार व्यवसायी संघमा नवनिर्वाचित अध्यक्ष डिकबहादुर खत्री यस क्षेत्रका विज्ञका रुपमा चिनिन्छन् । उनी नेतृत्वको प्यानललाई स्पष्ट बहुमत दिएसँगै व्यवसायीहरुले संघबाट सुधारको ठूलो अपेक्षा राखेका छन् । सरकार वैदेशिक रोजगार व्यवसायीमाथि कडारुपमा प्रस्तुत भइरहँदा नवनिर्वाचित कार्यसमितिमा चुनौती बढेको व्यवसायीहरु बताउँछन् ।
नवनिर्वाचित अध्यक्ष खत्रीले व्यवसायीको अपेक्षाअनुसार संघलाई अगाडि बढाउने प्रतिबद्धता जनाए । नीतिगत सुधारका लागि आफूले प्रभावकारीरुपमा सरकारसँग पहल गर्ने बताए । ‘नीतिगत सुधार नभए व्यवसाय गर्ने अवस्था छैन । सरकार त्रुटियुक्त ऐनहरु संशोधन गर्न लागिपरेका बेला यसपटकको संशोधनमा पूर्ववत् त्रुटिहरु नहोस् भनेर सरकारसँग संवाद गर्ने सोचेका छौं,’ उनले भने, ‘अहिलेको सरकारले हाम्रा समस्यालाई सुनेर कार्यान्वयनमा ल्याउने ठूलो अपेक्षा छ । मन्त्रालयमा पछिल्लो समय भएका छलफलले पनि त्यो दिशानिर्देश गरेको छ ।’
सरकारले झण्झटिला र अव्यावहारिक ऐन, कानुनमा संशोधन गरेपछि २०४८ सालदेखिका समस्यालाई एकैचोटि सङ्ल्याउन सकिने खत्रिको भनाइ छ । नीतिगत सुधार भएपछि संघले व्यवसायीलाई मर्यादित र अनुशासित बनाउने योजना बनाएको उनले बताए । ‘नीति बनिसकेपछि सदस्य संस्थाहरुलाई आचारसंहिता जारी गर्ने योजना छ । आचारसंहिता तयारी अवस्थामा छ,’ खत्रीले भने, ‘सरकारले यो क्षेत्रलाई व्यवस्थित ग¥यो भने संघले आफ्नो सदस्य संस्थालाई आचारसंहितामार्फत व्यवस्थित गर्छ ।’
दुई वर्षे कार्यकालमा धेरै कामहरु सम्पादन हुने नवनिर्वाचित महासचिव हरी डाँगीले बताए । नीतिगत सुधारका साथै यस क्षेत्रलाई प्रविधिमैत्री बनाउँदै लैजाने उनको भनाइ छ । ‘डिजिटल प्रविधिलाई सुदृढ बनाएर स्थानीय तहसँगको समन्वयबाट श्रमिकहरु सीधै हामीसँग आउनसक्ने अवस्था निर्माण गर्दै जान्छौं,’ डाँगीले भने ।
दूतावासले गर्ने मागपत्र प्रमाणीकरणको समस्याका साथै वैदेशिक रोजगार विभाग र व्यवसायीबीचको सम्बन्धलाई प्रगाढ बनाउन पनि आवश्यक समन्वय गर्ने उनले बताए ।
