[caption id="attachment_10244" align="alignnone" width="1510"]
काभ्रेपलाञ्चोक–समुदायस्तरमा कोरोना संक्रमणको उच्च जोखिम बढ्दै गएको अवस्थामा यहाँका अधिकांश स्थानीय तह आइसोलेशन कक्ष व्यवस्थित गर्न आलटाल गरिरहेका छन् । १३ स्थानीय तहमध्ये आठले हालसम्म आइसोलेशन कक्ष निर्माण गरेका छैनन् ।[/caption]
आइसोलेशन कक्ष तयार गरेका पाँच स्थानीय तहमध्ये बनेपा नगरपालिकाले ५० बेड र धुलिखेल नगरपालिकाले ३१ बेडको कक्ष तयार गरेका हुन् । कोभिड–१९ रोकथाम तथा नियन्त्रण, कमाण्ड पोष्टका अनुसार हाल तीन नगरपालिका पाँचखालले सात, पनौतीले छ र नमोबुद्धले छ बेडको आइसोलेशन कक्ष व्यवस्थित गरेका छन् । मण्डनदेउपुर नगरपालिका तथा खानीखोला, महाभारत, रोशी, बेथानचोक, तेमाल, भुम्लु र चौंरीदेउराली गाउँपालिकाले हालसम्म आइसोलेशन कक्ष व्यवस्थित गरेका छैनन् ।
बनेपाले प्राविधिक शिक्षालय भवनमा र धुलिखेल नगरपालिकाले सञ्जीवनी उच्च माविको भवनमा हालै मात्र आइसोलेशन कक्ष व्यवस्थित गरेका हुन् । कोरोना संक्रमितलाई उपचारार्थ राख्न आइसोलेशन कक्ष व्यवस्थित गर्नुपर्ने भएको हो । जिल्लाभित्र कोरोना भाइरस् संक्रमणको जोखिम बढ्दै गएपछि करिब दुई महिनाअघि नै पोष्ट र जिल्ला संकट व्यवस्थापन केन्द्रको संयुक्त बैठकको निर्णयसँगै स्थानीय तहलाई आइसोलेशन कक्ष बनाउन पटकपटक आग्रह गर्दै आएको जनाइएको छ ।
‘सबै स्थानीय तहलाई आइसोलेशन कक्ष व्यवस्थित गर्न आग्रह गर्दै आएका छौँ, केहीले मात्रै बनाएका छन्, अन्यले वास्ता गरेका छैनन्’ पोष्टका सदस्यसचिव एवं जिल्ला स्वास्थ्य कार्यालय प्रमुख डा.नरेन्द्रकुमार झाले भने । उनका अनुसार स्थानीय तहले आइसोलेशन नबनाए जिल्लाका अस्पतालले संक्रमित धान्नसक्ने अवस्था छैन ।
पोष्ट र केन्द्रले सबै स्थानीय तहलाई प्रारम्भिक चरणमा १० बेडको आइसोलेशन कक्ष तयार गर्न पटकपटक आग्रह गर्दै आएको हो । झाले भने, ‘स्थानीयस्तरमा संक्रमित देखिन थालेका छन्, त्यो संख्या बढेपछि बनाउन बाध्य होलान् कि !’ यहाँका स्थानीय तहले हालसम्म जम्मा सय बेडको आइसोलेशन कक्ष व्यवस्थित गरेका हुन् ।छ बेडको आइसोलेशन कक्ष तयार गरेका नमोबुद्ध नगरप्रमुख टिपी शर्मा तिमल्सिनाले आवश्यकताअनुसार आइसोलेशन बेडको संया बढाउन तयारी अवस्थामा रहेको बताए । उनका अनुसार उक्त नगरका पाँच संक्रमितमध्ये दुई धुलिखेल अस्पतालको आइसोलेशनमा उपचाररत रहेका छन् भने तीन उपचारपछि हाल ‘होम क्वारेन्टिनँमा बसेका छन् ।
भुम्लु गाउँपालिकाले कोरोना संक्रमित बढ्दै गए पनि आइसोलेशनका लागि आवश्यक स्वास्थ्यकर्मी नहुँदा व्यवस्थित नगरिएको जनाएको छ । ‘चिकित्सकलगायत जनशक्ति भए स्थानीयस्तरमै संक्रमितको उपचार गर्न आइसोलेशन कक्ष तयार गर्न सकिन्छ, तर अहिले सम्भव छैन’, अध्यक्ष गुमानध्वज कुँवरले भने । उनका अनुसार गाउँपालिकाका १० कोरोना संक्रमितमध्ये हाल तीन मात्रै आइसोलशनमा उपचाररत छन् ।
जिल्लामा हालसम्म १६३ मा कोरोना संक्रमण देखिएको छ । यसमध्ये एक पुरुष र एक महिलाको मृत्यु भएको छ भने ६८ उपचारपछि घर फर्किएका छन् । बाँकी ९३ संक्रमित विभिन्न आइसोलेशनमा उपचाररत छन् । विश्वव्यापी महामारीका रूपमा कोरोना भाइरस् संक्रमण फैलँदै गएपछि २०७६ चैत महिनायता यहाँका स्थानीय तहले ८४५ शै्ययाको क्वारेन्टिन बेड व्यवस्थित गरेका छन् । रासस
-1745656903.jpeg)