काठमाडौं - नेपाल मगर संघको १३ औँ राष्ट्रिय महाधिवेशन काठमाडौँकाे कमलादिमा आयोजना हुने भएकाे छ । बुधबार पत्रकार सम्मेलन गरी मगर संंघ केन्द्रीय समितिले १३ औँ राष्ट्रिय महाधिवेशन - २०८३ शुक्रबारदेखि आइतबारसम्म हुने जनाइएकाे हाे ।
१३ औं राष्ट्रिय महाधिवेशन मूल आयोजक समितिका सदस्य सचिव तथा मगर संघ केन्द्रीय समितिका महासचिव टेकबहादुर नामजाली मगरका अनुसार “ऐतिहासिक मगरात सभ्यता र प्राचीन संस्कार-संस्कृतिको जगमा मगरात दर्शन निर्माण गरौं, समृद्ध मगर समाज निर्माणको पक्षमा १३ औँ राष्ट्रिय महाधिवेशन भव्यताका साथ सफल पारौं” भन्ने मूल नारासाथ महाधिवेशन आयोजना हुन लागेको छ ।
उनले उक्त महाधिवेशनमा देशका ६८ जिल्ला, सात प्रदेश समिति, ९ भ्रातृ संस्था तथा १३ वटा प्रवास शाखाबाट करिब सातसय प्रतिनिधिहरुको सहभागिता रहने जानकारी दिए । महाधिवेशन उद्घाटन समारोह नेपाल मगर संघका सल्लाहकार तथा पूर्व अर्थमन्त्री वर्षमान पुन मगरको प्रमुख आतिथ्यतामा आयोजना हुनेछ ।
महाधिवेशनमा मगर समुदायको मौलिक भेषभूषा, संस्कृति तथा पहिचान झल्काउने झाँकीसहितको सांस्कृतिक र्याली भृकुटीमण्डपबाट बिहान ११ बजे सुरु हुनेछ र पुतलीसडक, कमलादी हुँदै नेपाल प्रज्ञा–प्रतिष्ठानको सभा हलमा पुगेर औपचारिक सभामा परिणत हुनेछ ।
