काठमाडौं- ट्राफिक प्रहरीले काठमाडौँ उपत्यकामा पछिल्लो २४ घण्टामा एक हजार ९६२ जना सवारी चालक तथा नियम उल्लंघनकर्तामाथि कारबाही गरेको छ । उक्त कारबाहीबाट आठ लाख ८९ हजार रुपैयाँ राजस्व सङ्कलन भएको काठमाडौँ उपत्यका ट्राफिक प्रहरी कार्यालयले जनाएको छ ।
ट्राफिक प्रहरीका अनुसार उपत्यकाभित्र बढ्दो सवारी चाप, अव्यवस्थित पार्किङ, लापरबाहीपूर्ण सवारी सञ्चालन तथा ट्राफिक नियमको बेवास्ताका कारण दुर्घटनाको जोखिम बढ्दै गएको छ । यसलाई नियन्त्रण गर्न नियमित चेकिङ, निगरानी तथा विशेष अभियान सञ्चालन गरिएको हो ।
ट्राफिक प्रहरी प्रवक्ता एवं प्रहरी उपरीक्षक नरेशराज सुवेदीका अनुसार कारबाहीमा पर्नेहरूमध्ये सबैभन्दा बढी विभिन्न अन्य ट्राफिक उल्लंघन गर्ने ९०५ जना रहेका छन् । यस्तै, मादक पदार्थ सेवन (मापसे) गरेर सवारी चलाउने १०२ जना चालकलाई नियन्त्रणमा लिइएको छ भने राइड सेयरिङसम्बन्धी नियम उल्लंघन गर्ने १४७ जनामाथि कारबाही गरिएको छ ।
त्यसैगरी, रातो बत्ती उल्लंघन गर्ने २११, तीव्र गतिमा सवारी चलाउने १९७, लेन मिच्ने ५३, सडक फुटपाथ अतिक्रमण गर्ने ८८, ‘नो हर्न’ क्षेत्र उल्लंघन गर्ने ११६ तथा एकतर्फी सडकमा सवारी प्रवेश गराउने १४३ जना चालक कारबाहीमा परेका छन् । प्रहरी उपरीक्षक सुवेदीले ट्राफिक प्रहरीको मुख्य उद्देश्य राजस्व सङ्कलन मात्र नभई नागरिकलाई ट्राफिक नियमप्रति जिम्मेवार बनाउनु रहेको बताए । उनले भने, “उपत्यकामा ट्राफिक नियम उल्लंघन तथा सवारी दुर्घटना न्यूनीकरण गर्न ट्राफिक प्रहरी निरन्तर खटिएको छ । हाम्रो उद्देश्य केवल राजस्व उठाउनु होइन, नागरिकलाई सुरक्षित यात्रा सुनिश्चित गराउनु र सडक दुर्घटना घटाउनु हो ।”
उनका अनुसार पछिल्लो समय ट्राफिक नियम उल्लंघनका घटनामा केही कमी आए पनि अझै धेरै चालकले आधारभूत नियमसमेत पालना नगर्ने गरेको पाइएकाले निगरानी थप कडा बनाइएको छ । विशेषगरी मापसे, तीव्र गति, मोबाइल प्रयोग गर्दै सवारी चलाउने तथा सिग्नल उल्लंघन गर्ने गतिविधिले दुर्घटना निम्त्याउने भएकाले यस्ता कार्यविरुद्ध कडाइ गरिएको जनाइएको छ ।
काठमाडौँ उपत्यकामा दैनिक हजारौँ सवारीसाधन सञ्चालन हुने भएकाले ट्राफिक व्यवस्थापन चुनौतीपूर्ण बन्दै गएको छ । सडक विस्तार, सवारी सङ्ख्या वृद्धि र यात्रु चापसँगै ट्राफिक अनुशासन कायम गर्नु प्रहरीका लागि ठूलो चुनौती भएको अधिकारीहरू बताउँछन् ।
ट्राफिक प्रहरीले चालकहरूलाई सवारी चलाउँदा अनिवार्य रूपमा ट्राफिक नियम पालना गर्न, हेल्मेट तथा सिटबेल्ट प्रयोग गर्न, मादक पदार्थ सेवनपछि सवारी नचलाउन तथा सडक सङ्केतको सम्मान गर्न आग्रह गरेको छ । साथै आगामी दिनमा पनि उपत्यकाभर विशेष ट्राफिक चेकिङ अभियानलाई निरन्तरता दिइने जनाइएको छ ।
