काठमाडौं - मेटलाइफ नेपाल र खल्ती सुरक्षाले संयुक्त रूपमा ‘सुरक्षा ३६०’ नामक डिजिटल बीमा योजना सार्वजनिक गरेका छन् । यो योजना अब खल्ती एपमार्फत सहज रूपमा उपलब्ध हुने बताइएको छ ।
कम्पनीका अनुसार उक्त योजनाले जीवन र स्वास्थ्यसँग सम्बन्धित विभिन्न बीमा सुविधालाई एउटै प्याकेजमा समेटेको छ । यसमार्फत प्रयोगकर्ताले केही आधारभूत व्यक्तिगत विवरण भरेर केही मिनेटमै बीमा खरिद गर्न सक्नेछन् ।
बीमा सेवा लिन जटिल प्रक्रिया वा लामो समय कुर्नुपर्ने अवस्थालाई हटाउँदै डिजिटल माध्यमबाट सरल, छिटो र पहुँचयोग्य सेवा दिने उद्देश्यले योजना ल्याइएको जनाइएको छ ।‘सुरक्षा ३६०’ योजनामा जीवन बीमा, दुर्घटनाबाट हुने मृत्यु तथा स्थायी अशक्तता सुरक्षा, गम्भीर रोग बीमा र दुर्घटनाबाट हुने उपचार खर्चसमेत समावेश गरिएको कम्पनीले जनाएको छ ।
यो योजना सिल्भर, गोल्ड र प्लेटिनम गरी तीनवटा प्याकेजमा उपलब्ध रहेको छ । ग्राहकहरूले आफ्नो आवश्यकता र बजेटअनुसार योजना छनोट गर्न सक्नेछन् । योजनाअन्तर्गत २३ लाख रुपैयाँदेखि ४६ लाख रुपैयाँसम्मको बीमा सुरक्षा उपलब्ध हुने बताइएको छ ।
वार्षिक बीमाशुल्क प्याकेजअनुसार ३ हजार ४ सय ८० रुपैयाँबाट सुरु हुने जनाइएको छ । १८ देखि ५० वर्ष उमेर समूहका नेपालीलाई लक्षित गर्दै योजना सार्वजनिक गरिएको कम्पनीको भनाइ छ । अरुण बहादुर बस्नेतले ‘सुरक्षा ३६०’ ले जीवनका विभिन्न चरणमा आवश्यक वित्तीय सुरक्षा प्रदान गर्ने बताए । उनले विश्वसनीय डिजिटल प्लेटफर्ममार्फत बीमा सेवामा पहुँच विस्तार गर्दै थप नेपालीलाई वित्तीय सुरक्षाप्रति सचेत र जिम्मेवार बनाउन योजना ल्याइएको उल्लेख गरे ।
मेटलाइफ अनुसार कम्पनी सन् १८६८ मा स्थापना भएको विश्वव्यापी वित्तीय सेवा प्रदायक संस्था हो, जसले बीमा, एन्युटी, कर्मचारी लाभ योजना तथा सम्पत्ति व्यवस्थापन सेवा प्रदान गर्दै आएको छ । त्यस्तै खल्ती ले नेपाली ग्राहकका लागि डिजिटल माध्यमबाट सहज बीमा सेवा उपलब्ध गराउँदै आएको जनाएको छ ।
