काठमाडौं– नेपाल रेडक्रस सोसाइटीले बन्दाबन्दी र निषेधाज्ञाको अवस्थामा रक्तदान क्याम्प आयोजना हुन नसकेकाले केन्द्रीय रक्तसञ्चार सेवालगायत धेरैजसो रक्तसञ्चार केन्द्रहरूमा न्यून मात्रामा रगत मौज्दात रहेको जनाएको छ ।
केन्द्रीय रक्तसञ्चार सेवाकाअनुसार शनिबारका लागि बुक गरिएका अधिकांश क्याम्पहरू निषेधाज्ञाका कारण स्थगित भएका छन् । दुर्घटनामा पर्ने, रक्तश्राव भएका, प्रसुति, मुटु, क्यान्सर तथा मिर्गौला विरामी, थालसेमिया, हेमोफिलिया, आकस्मिक शल्यक्रिया गर्नुपर्ने विरामीहरूका आफन्तहरू केन्द्रीय रक्तसञ्चार केन्द्रमा आइरहेको भएपनि पर्याप्त रगत आपूर्ति गर्न नसकिएको सेवाका निर्देशक पवन गुप्ताले जानकारी दिए ।
केन्द्रमात्र होइन धरान, विराटनगर, चितवनलगायत स्थानमा पनि रगत अभाव भइरहेकोे रेडक्रसका सञ्चार निर्देशक दिव्यराज पौडेलले बताए । ती क्षेत्रका अधिकांश भागमा निषेधाज्ञा लागू रहेको र आसपासका जिल्लाहरूबाट पहिलेजस्तो सहयोग हुनसक्ने परिस्थिति नरहेको उनले बताए ।
यद्यपि नेपालगञ्जमा भने तुलनात्मकरूपमा सहज देखिएको छ । रगतको माग भइरहेकाले रक्तदाता, संघसंस्था र रेडक्रसका निकायहरूले सानो समूहमा भएपनि स्थानीय पालिका र प्रशासनको सहयोगमा रक्तदानको कार्यक्रम आयोजना गर्न गराउन सके रगत आपूर्ति सहज हुने रेडक्रसले जनाएको छ । नियमित रक्तदाता तथा युवाहरूले नजिकका केन्द्रहरूमा गई रक्तदान गर्नसक्ने र बिरामीको रक्तसमूहसँग मिल्ने साथीभाइ, इष्टमित्रहरूसँग पहिल्यै सोधखोज, उत्प्रेरणा तथा अनुरोध गरेमा कुरुवा र आफन्तजनलाई पनि सजिलो हुने निर्देशक पौडेलले बताए ।
