काठमाडौं - नेपाल एसोसिएसन अफ टुर एन्ड ट्राभल एजेन्ट्स (नाट्टा- NATTA)का अध्यक्ष कुमारमणि थपलिया UFTAA को विश्व बोर्ड अफ डाइरेक्टर्समा नियुक्त भएका छन् । नाट्टाका अध्यक्ष कुमारमणि थपलिया संयुक्त फेडेरेसन अफ ट्राभल एजेन्ट्स एसोसिएसन (उफ्टा- UFTAA) को विश्वव्यापी बोर्ड अफ डाइरेक्टर्समा औपचारिक रूपमा मनोनयन भई नियुक्त भएका हुन्।
नेपालको पर्यटन क्षेत्रमा ऐतिहासिक उपलब्धि हासिल भएको घोषणा नाट्टाले गरेको छ। उफ्टाको नयाँ कार्यसमितिको संरचना २०२५-२६ को वार्षिक साधारणसभामा अन्तिम रूप दिइएको हो। उफ्टाका अध्यक्ष सुनिल कुमार आर. को अध्यक्षतामा सम्पन्न उक्त सभामा विभिन्न महादेशका पर्यटन क्षेत्रका प्रतिष्ठित नेतृत्व र प्रतिनिधिहरूको उपस्थिति रहेको थियो।
यो प्रतिष्ठित अन्तर्राष्ट्रिय बोर्डमा निर्देशक पद हासिल गर्नु नेपालका लागि ठूलो उपलब्धि मानिएको छ। यसले NATTA को आवाजलाई अन्तर्राष्ट्रिय मञ्चमा स्थापित गर्नुका साथै नेपालको पर्यटन उद्योगको बढ्दो विश्वव्यापी पहिचानलाई पनि झल्काउँछ।
नाट्टा अध्यक्ष थपलियाले भने, “यस नियुक्तिले हामीलाई विश्व पर्यटन विकासमा महत्वपूर्ण योगदान पुर्याउने अवसर प्रदान गरेको छ र नेपालका अद्वितीय सम्भावनालाई विश्वसामु प्रस्तुत गर्ने बाटो खुलेको छ।” १२ सदस्यीय बोर्डमा थपलियासहित पाँच जना नयाँ निर्देशक नियुक्त भएका छन्।
उफ्टा सन् १९६६ मा स्थापना भएको विश्वव्यापी ट्राभल एजेन्टहरूको अग्रणी संस्था हो, जसको मुख्यालय मोनाकोमा रहेको छ। यसले ट्राभल उद्योगका अधिकार संरक्षण, जटिल चुनौतीहरूको समाधान तथा अन्तर्राष्ट्रिय सहकार्य प्रवर्द्धनमा काम गर्दै आएको छ।
सन् १९६६ मा स्थापना भएको नाट्टा नेपालको अग्रणी संस्था हो । नाट्टाले ८०० भन्दा बढी ट्राभल एजेन्ट र टुर अपरेटरहरूको प्रतिनिधित्व गर्दछ। यसले पर्यटन व्यवसायको व्यवस्थित विकास, पेशाकर्मीहरूको हित संरक्षण तथा यात्रुहरूको सुरक्षामा महत्वपूर्ण भूमिका खेल्दै आएको छ। उफ्टाको दीर्घकालीन सदस्यका रूपमा नाट्टाले नेपालको पर्यटनलाई अन्तर्राष्ट्रिय स्तरमा प्रवर्द्धन गर्दै आएको छ।
