हामी त सडकमा आइपुगेका छाैं । गगनले हामीलाई सडकमा ल्याए । त्यही भएर बाहिर नै बैठक बस्नुपरेको हो ।
जितजंग बस्नेत
कांग्रेस नेता
- आधिकारिकता दाबी गर्दै पूर्वसंस्थापनले आजदेखि केन्द्रीय समिति बैठक आयोजना गर्दै, १९ गतेका लागि जिल्ला सभापतिहरुको भेला
- अनुशासनविपरीतको कार्य गरेको भन्दै पूर्णबहादुर खड्कालगायतलाई कारबाहीको तयारीमा संस्थापनपक्ष
काठमाडौं- फागुन २१ गतेको प्रतिनिधिसभा सदस्य निर्वाचनमा कमजोर बनेसँगै आन्तरिक कलहमा फसेको कांग्रेस विवाद फेरि सतहमा आएको छ । विशेष महाविधेशनबाट निर्वाचित गगन थापा नेतृत्वको कार्यसमितिलाई मान्यता दिएर निर्वाचनमा गएको कांग्रेसभित्रको विवाद बिहीबारदेखि सतहमा आएको हो ।
पार्टीको लेटरहेड दुरुपयोग गरेर विभिन्न क्रियाकलाप भइरहेको कुरा हाम्रो नोटिसमा आएको छ । हामी यसबारे छिट्टै निर्णय गर्छौं ।
देवराज चालिसे
प्रवक्ता, नेपाली कांग्रेस
शनिबार कांग्रेस नेता एवं पूर्वगृहमन्त्री रमेश लेखक पक्राउ परेपछि संस्थापनपक्षले देवराज चालिसेको हस्ताक्षरमा विज्ञप्ति निकालेको थियो । सोही दिन कांग्रेस पूर्वउपसभापति पूर्णबहादुर खड्काले कार्यवाहक सभापतिको हैसियतमा लेखक पक्राउको विरोध गर्दै विज्ञप्ति जारी गरे । शनिबार संस्थापन पक्षले नवनिर्वाचित सांसदहरुलाई प्रशिक्षणसमेत दिएको थियो । आइतबार पूर्वसंस्थापनले नवनिर्वाचितहरुलाई बधाइ कार्यक्रम आयोजना गर्यो । धुम्बराहीस्थित होटल स्मार्टमा आयोजित कार्यक्रममा पूर्वसंस्थानका ११ जना सांसदमात्र आइपुगे । जबकि, पूर्वसंस्थापनबाट यो निर्वाचनमा २२ जना निर्वाचित भएका छन् ।
प्रत्यक्षमा १८ र समानुपातिकमा २० गरी कूल ३८ सिट जितेको कांग्रेस प्रतिनिधिसभामा प्रमुख प्रतिपक्षी दल हो । २०७९ मंसिरमा भएको निर्वाचनमा ८९ सिटसहित पहिलो बनेको कांग्रेसले सरकारको नेतृत्व भने गर्न पाएन । तत्कालीन नेकपा माओवादी केन्द्रसँग तालमेल गरी निर्वाचनमा गएको कांग्रेस कहिले प्रतिपक्षमा त कहिले माओवादी केन्द्रसँगै मिलेर सरकारमा गयो । पछिल्लोपटक कांग्रेसले नेकपा एमालेसँग गठबन्धन गरी सरकार बनाएको थियो ।
दुई ठूला दल मिलेर शक्तिशाली सरकारको नेतृत्व एमाले अध्यक्ष केपी शर्मा ओलीले गरेका थिए । उक्त सरकार भ्रष्टाचारमा लिप्त भएको र सुशासनको विषयमा कमजोर बनेको भन्दै त्यतिबेला कांग्रेस महामन्त्री रहेका गगन थापाले खबरदारी गरिरहे । सोहीबीचमा ओली नेतृत्वको सरकारले वर्ष दिन पूरा गरेको केही समयमै भदौ २३ गते जेन-जी विद्रोह भयो । सोही विद्रोहले ओली सरकार ढालेसँगै कांग्रेसमा पनि विशेष महाधिवेशनको माग भयो ।
कांग्रेसमा निर्वाचनअघि महाधिवेशन गर्न नहुने भन्दै शेरबहादुर देउवा पक्षले अडान लिँदा गगन पक्षले भने नयाँ नेतृत्व लिएरमात्र निर्वाचनमा जानुपर्ने भन्दै पुसको अन्तिम साता विशेष महाधिवेशन आयोजना गर्यो । उक्त महाधिवेशनले देउवा नेतृत्वको कार्यसमिति भंग गर्दै गगन नेतृत्वको नयाँ कार्यसमिति घोषणा गर्यो । त्यसपछि यो कलह निर्वाचन आयोग पुगेको थियो । निर्वाचन आयोगले गगन नेतृत्वको कार्यसमितिलाई आधिकारिकता दिएसँगै देउवापक्षले सर्वोच्च अदालतमा मुद्दा दायर गरेको छ ।
यो मुद्दाको सुनुवाई नभएपछि देउवापक्षका नेताहरु पनि गगनको हस्ताक्षरमै प्रतिनिधिसभा निर्वाचनमा होमिए । गगनको हस्ताक्षर लिएर गएकामध्ये देउवापक्षका चार जनामात्र निर्वाचित भए । यता समानुपातिकमा भने धेरैजसो देउवापक्षका निर्वाचित भएका छन् । अहिले कांग्रेस संसदीय दलमा गगनपक्षका १६ जना र देउवा-शेखर कोइराला पक्षका गरी २२ सांसद छन् । पूर्वसंस्थापन पक्षमा देउवा र शेखर छन् ।
आजदेखि पूर्वसंस्थापनको केन्द्रीय समिति
विशेष महाधिवेशनको विपक्षमा उभिएका देउवापक्षका नेताहरु आजदेखि बैठकमा जुट्दै छन् । पूर्वउपसभापति खड्काले केन्द्रीय समिति भन्दै डाकेको यो बैठक धुम्बाराहीमा दिउँसो १ बजेबाट सुरु हुने कांग्रेस नेता जितजंग बस्नेतले बताए । ‘हामी त सडकमा आइपुगेका छौं । गगनले हामीलाई सडकमा ल्याए । त्यही भएर बाहिर नै बैठक बस्नुपरेको हो,’ बस्नेतले भने । बस्नेत राष्ट्रिय सभा सदस्य हुन् ।
भोलि बुधबारसम्म चल्ने बैठकमा चुनावी हार, कांग्रेसका नेताहरुलाई सरकारले गरेको पछिल्लो धरपकडबारे छलफल गरिने बस्नेतले बताए । बालेन्द्र शाह नेतृत्वको सरकार बनेसँगै पूर्वगृहमन्त्री रमेश लेखक र पूर्वउर्जामन्त्री दीपक खड्का पक्राउ परेका छन् । यो विषयमा संस्थापनपक्ष मौन देखिँदा देउवापक्ष भने आक्रामक देखिएको छ । सरकारले सम्पत्ति शुद्धीकरणमा पूर्वसभापति देउवालाई पनि राडारमा राखेको छ ।
केन्द्रीय समितिको बैठकपछि देउवापक्षका जिल्ला सभापतिहरुकोसमेत भेला हुँदैछ । भेलामा ४७ जनाभन्दा बढी जिल्ला सभापतिहरुलाई निम्तो दिइएको देउवापक्षले जनाएको छ । आफूलाई पनि भेलाको निम्तो आएको मकवानपुर जिल्लाका कांग्रेस सभापति बुद्ध लामाले बताए । ‘निम्तो आएको छ । जाउँ भने संस्थापनले कारबाही गर्ने डर । नजाउँ आफ्नै पक्षको बैठक,’ लामाले भने, ‘केन्द्रका नेताहरु नमिल्दा धेरै अप्ठेरो परिस्थितिको सिर्जना भएको छ ।’ भक्तपुर जिल्ला सभापति दुर्लभ थापाले जिल्ला सभापतिहरुको भेलामा पछिल्लो परिस्थिति र कांग्रेसले चाल्नुपर्ने कदमबारे छलफल हुने बताए ।
केन्द्रीय अनुशासन समितिको बैठक बस्दै
देउवा समूहले समानान्तर गतिविधि थालेपछि रणनीति बनाउन गगन नेतृत्वको कांग्रेसले केन्द्रीय अनुशासन समितिको बैठक डाकेको छ । बुधबार दिउँसो १ बजे बस्ने गरी बैठक बोलाइएको कांग्रेस केन्द्रीय कार्यालयका कार्यवाहक मुख्यसचिव कृष्णप्रसाद दुलालले बताए ।
बैठकमा निर्वाचनमा अन्तरघात गर्नेहरुको विषयमासमेत छलफल हुने दुलालले बताए । पूर्वसंस्थापनपक्षले गरेको गतिविधि आफूहरुले ‘नोटिस’मा राखेको कांग्रेस प्रवक्ता देवराज चालिसेले बताए । ‘पार्टीको लेटरहेड दुरुपयोग गरेर विभिन्न क्रियाकलाप भइरहेको कुरा हाम्रो नोटिसमा आएको छ । हामी यसबारे छिट्टै निर्णय गर्छौ,’ उनले भने ।
