म्याग्दी- गण्डकी प्रदेश सरकार मार्फत म्याग्दीमा यस वर्ष २४ पर्यटकीय स्थलमा पूर्वाधार निर्माणका लागि योजना सञ्चालन भएका छन् । बेनीमा रहेको एकिकृत सेवा कार्यालय मार्फत सञ्चालित ती योजनाहरुका लागि प्रदेश सरकारले एक करोड ४० लाख रुपैयाँ बजेट बिनियोजन गरेको हाे ।
तीन वटा योजना सम्पन्न भइसकेका कार्यालयका नायव सुब्बा सुवास सुवेदीले जानकारी दिए । बाँकी योजनाहरुको सर्वेक्षण, डिजाइन (नक्साङकन), लागत अनुमान तयार, सम्झौता र कार्यान्वयनको चरणमा रहेका छन् । पाँच/पाँच लाख रुपैयाँ बजेट बिनियोजन भएको बेनपा-९ को ढाडा पधेरा आरोटा, पाखाथर र रघुगंगा गाउँपालिका-३ को गलेश्वर-बगैचा पदमार्ग निर्माण सम्पन्न भएको हो ।
मालिका गाउँपालिका-७ मा प्रभुचेला ध्यानाश्रम, बिम-डाडागाउँ पदमार्गलाई १०/१० लाख, मालिका -३ को लामखोरिया-डाडागाउँ र मालिका-४ को गौखोरे-मतौका पदमार्गलाई छ/छ रुपैयाँ लाख बिनियोजन भएको छ । पाँच लाख रुपैयाँ बजेट बिनियोजन भएको अन्नपूर्ण गाउँपालिका-४ को नारच्याङ झरना पर्यटन पूर्वाधार निर्माण योजना पनि सम्पन्न भएको छ ।
१० लाख बजेट रुपैयाँ बिनियोजन भएको चिमखोला देखि काली बराह पदमार्ग र . आठ लाख रुपैयाँ बजेट बिनियोजन भएको धवलागिरी गाउँपालिका-४ को खिवाङ-चुङ पदमार्ग निर्माणाधिन रहेको छ । पाँच/पाँच लाख बजेट रहेको बेनी नगरपालिकाको बराहपाखो पदमार्ग, लभ्लिडाडा घेराबार र सनातन धार्मिक आश्रम घेराबार तथा उद्यान निर्माण योजना कार्यान्वयनको चरणमा रहेका एकिकृत सेवा कार्यालय म्याग्दीका प्रमुख सम्शेर घर्ती क्षेत्रीले बताए ।
मंगला गाउँपालिका-४ को गम्फाधुरी - दापु- छहरा पूर्वाधार, मालिकाको बिम तल्लो गाउँ मान्थान देखि प्रभुचेला पदमार्ग र मालिका धुरी आधुनिक पूर्वाधार योजना कार्यान्वयनको चरणमा छन् । रघुगंगा गाउँपालिकाको फुलडाडा पदर्मा, मुलपानी देखि भगवती स्वास्थ्यचौकी जैसिखोर, खइसे धौलागिरी आइसफल पदमार्ग डिपिआर र गायत्री मन्दीर उद्यान निर्माण योजनाको उपभोक्ता समितिसँग सम्झौता भएको छ ।
अन्नपूर्ण गाउँपालिकाको टिकोट -सोबन्ध पदमार्ग, मारका पदमार्ग, चित्रे हुदै घान्द्रुक देउराली पदमार्ग र फगाम-सुवा-दुवारी-मतिचौर पर्यटन पदमार्ग योजना निर्माणाधिन रहेका छन् । पर्यटनतर्फ हालसम्म १६ योजनाहरुको सम्झौता भइसकेको एकिकृत सेवा कार्यालयले जनाएको छ ।
