- मधेसवादी दलहरू १६५ सिटमध्ये एक सिट पनि जित्न अक्षम
- जसपा नेपाल, जसपा, जनमत, रामुपा, नाउपा, आजपा शून्य
- समानुपातिक मत पनि ‘थ्रेस होल्ड’ कटाउन अपुग
- २०४८ यता हरेक संसद्मा पुग्ने मधेसवादी दलहरूको पहिलोपटक पत्तासाप
काठमाडौं- प्रतिनिधिसभामा मधेसवादी दलबाट एक जना पनि प्रतिनिधि नहुने भएको छ । फागुन २१ मा सम्पन्न प्रतिनिधिसभा निर्वाचनबाट मधेशवादी दलहरू एक सिट पनि जित्न असफल भएका हुन् ।
प्रत्यक्षतर्फको सबै मतपरिणाम आइसक्दा जनता समाजवादी पार्टी (जसपा) नेपाल, जनता समाजवादी पार्टी, जनमत पार्टी, राष्ट्रिय मुक्ति पार्टी र नागरिक उन्मुक्ति पार्टीले एक सिट पनि जित्न सकेनन् । समानुपातिकतर्फको मतगणना पनि अन्तिम चरणमा पुग्दा कुनै पनि मधेसवादी दलले समानुपातिकबाट सिट पाउन आवश्यक तीन प्रतिशत ‘थ्रेस होल्ड’ कटाउन सकेको छैन । यो नतिजासँगै अब प्रतिनिधिसभामा विगतमा जस्तो मधेसवादी दलहरुबाट कोही पनि प्रतिनिधि नहुने करिब निश्चित भएको छ ।
देशभर राष्ट्रिय स्वतन्त्र पार्टीको पक्षमा लहर चल्दा मधेस प्रदेशमा पनि त्यो प्रभाव देखियो । जसकारण यसपटक मधेसवादी दलहरु पत्तासाप भएका हुन् । मधेसमा पनि कुनै मधेसकेन्द्रित दलहरू पहिलो, दोस्रो, तेस्रो र चौथो स्थानमा छैनन् । जबकि, २००८ सालमा कांग्रेसबाट अलग भएर तराई कांग्रेस गठन गर्दै बेदानन्द झाले मधेसकेन्द्रित राजनीति थालनी गरेका थिए । २०४८ यताको संसद्मा नेपाल सद्भावना पार्टीको उपस्थिति हुन्थ्यो ।
२०६४ यता भने मधेसी जनअधिकार फोरम, नेपाल सद्भावना पार्टी (आनन्दीदेवी)लगायत विभिन्न दल सत्ता बार्गेनिङ गर्ने हैसियतमा पुगे । २०७०, २०७४ देखि २०७९ सम्मै मधेस केन्द्रित राजनीतिक दलहरू सत्तामा निर्णायक बने । तर, यसपटक खासगरी रास्वपाले यी दलहरूलाई पत्तासाप पारेको मधेस मामिलाका जानकार तुलानारायण साह बताउँछन् । उनको विचारमा मधेसकेन्द्रित दलहरू मधेसको मूल मुद्दा, बलिदान र आन्दोलनको भावनाभन्दा टाढा पुग्दा आधार इलाकामै जनमतबाट अस्वीकृत हुनु परेको हो ।
मधेसका मूल नेता ठान्ने जसपा नेपालका अध्यक्ष उपेन्द्र यादव सुरक्षित स्थान भनिएको सप्तरी–३ बाट लड्दा पनि दोब्बर बढी मतान्तरले पराजित भए । सप्तरी-१ मा जनमतका अध्यक्ष डा. सिके राउत पराजित भए । दुवै पराजित भएको रास्वपा उम्मेदवारहरूबाटै हो । जसपा अध्यक्ष अशोक राई उम्मेदवार बनेनन् । राजेन्द्र महतोको दल राष्ट्रिय मुक्ति पार्टी, रेशमलाल चौधरीको दल नागरिक उन्मुक्ति पार्टी कहीँ पनि प्रतिस्पर्धीसम्म भएनन् । सबै मधेसकेन्द्रित दलहरूको सर्मनाक हार भयो ।
अब पाँच वर्ष ती दलहरू संसद् र सत्ताबाहिर हुने भएका छन् । मधेसको अर्को दल आम जनता पार्टीका अध्यक्ष प्रभु साह, पूर्वपत्रकार ऋषि धमलाले पनि निर्वाचन जित्न सकेनन् । दुवै नराम्ररी पराजित भए । प्रभावशाली भनिएका दलहरूले एक सिट पनि नजित्दा साना मधेसकेन्द्रित दलहरू नेपाल संघीय समाजवादी, बहुजन एकता पार्टी नेपाल, र नेपाल जनजागृति पार्टी, जनस्वराज पार्टीलगायतले जित्ने कुरै भएन । यससँगै मधेसकेन्द्रित दलहरू अस्तित्वको संकटमा परेको देखिएको छ ।
बेदानन्द झाले ७४ वर्षअघि राज्यको मूलधारमा मधेसको समान पहुँच, पहिचान, सरकारी सेवामा प्रवेश र हिन्दी भाषालाई आधिकारिकता सुनिश्चित गर्न माग गर्दै थालिएको मधेस राजनीति यतिबेला शिथिल बनेको हो ।
