नयाँ दिल्ली - भारतीय प्रहरीले बंगलादेशको ढाकामा एक लोकप्रिय विद्यार्थी नेताको हत्या गरेको आरोपमा दुई बंगलादेशी नागरिकलाई पक्राउ गरेको छ ।
सन् २०२४ मा बंगलादेशकी तत्कालीन प्रधानमन्त्री शेख हसिनालाई सत्ताच्युत गर्ने जनविद्रोहमा भाग लिएका भारतका मुखर आलोचक सरिफ उस्मान हादीलाई गत वर्ष नकाबधारी आक्रमणकारीहरूले गोली हानेका थिए र पछि सिंगापुरको एक अस्पतालमा उनको मृत्यु भएको थियो ।
बंगलादेशी प्रहरीले हादीको हत्या गरी हत्यारा भागेर भारत पुगेको बताएका थिए तर भारतीय अधिकारीहरूले भारतमा हत्यारा नरहेको बताएका थिए । बंगलादेशसँग सीमा जोडिएको भारतको पश्चिम बंगाल राज्यको प्रहरीले आइतबार हिरासतमा रहेका दुई बंगलादेशी नागरिकसँग प्रारम्भिक सोधपुछ गर्दा हादीको हत्यामा उनीहरूको संलग्नता रहेको देखिएको बताएको छ।
भारतीय प्रहरीद्वारा जारी विज्ञप्तिमा भनिएको छ, “जोडी बंगलादेशबाट भागेर अवैध रूपमा भारत प्रवेश गरेका बिषयमा ‘गोप्य विश्वसनीय सूचना’ थियो । उनीहरू बंगलादेश फर्कने मनसायका साथ सीमा क्षेत्रमा शरण लिन खोजेका थिए ।”हादीको मृत्युपछि बंगलादेशमा हिंसात्मक प्रदर्शन सुरु भएको थियो भने आक्रोशित भीडले भारतको पक्षमा मानिने दुई प्रमुख अखबारहरू र एक प्रमुख सांस्कृतिक संस्थासहित धेरै भवनहरूमा आगजनी गरेको थियो।
हसिनाले प्रजातन्त्र समर्थक विद्रोहबाट भागेर भारतमा शरण लिएपछि भारत र बंगलादेशबीचको सम्बन्ध थप चिसिएको थियो।भारतको विदेश मन्त्रालयले हादीको हत्यामा नयाँ दिल्लीको संलग्नताबारे ‘गलत कथन’ अस्वीकार गर्ने बताएको छ।हसिनाको बहिर्गमनपछि गत फेब्रुअरीमा भएको पहिलो संसदीय निर्वाचनमा जित हासिल गरेकोमा भारतीय प्रधानमन्त्री नरेन्द्र मोदीले बंगलादेश नेसनलिस्ट पार्टीलाई बधाई दिएको थियो ।
