काठमाडौं - अमेरिकी राष्ट्रपति डोनाल्ड ट्रम्पले इरानमाथि अझ कडा आक्रमण गरिने चेतावनी दिएका छन् । आफ्नो सामाजिक सञ्जाल ट्रुथ सोसलमा उनले लेखेका छन्, “आज इरानमाथि धेरै शक्तिशाली आक्रमण हुनेछ ।” इरानी राष्ट्रपति मसूद पेजेश्कियानले आफ्नो देशद्वारा गरिएका आक्रमणका निम्ति छिमेकी मुलुकहरूसँग माफी मागेका बेला ट्रम्पले यस्तो बताएका हुन् ।
पेजेश्कियानले गलत बुझाइका कारण आक्रमण भएको र देशको सैन्य कमान्डमा हालैका हमलाले असर पारेको बताएका छन् । अब छिमेकी देशहरूबाट आक्रमण भएमा मात्र इरानले जवाफी कारबाही गर्ने उनले उल्लेख गरे । यद्यपि, उनले इरानसँग आफ्नो सुरक्षाको पूर्ण अधिकार रहेको बताए ।
मध्यपूर्वमा युद्ध लगातार फैलँदै गएको छ । यसको घेरामा धेरै देश परिसकेका छन् । अमेरिका, इरान र इजरायलबीच बढ्दो टकरावबीच यो क्षेत्रमा ड्रोन र क्षेप्यास्त्र आक्रमणको संख्या तीव्र भएको छ । धेरै देशले हवाई आक्रमण, इन्टरसेप्सन र सुरक्षा अलर्टको पुष्टि गरेका छन् ।
स्थिति द्रुत गतिमा परिवर्तन भइरहेको छ । मृत्यु हुनेको संख्या पनि लगातार बढिरहेको छ ।खाडी देशहरूले इरानबाट प्रहार गरिएका धेरै ब्यालिस्टिक क्षेप्यास्त्र र ड्रोनहरूलाई विफल पारेको बताएका छन् । साउदी अरबले आफ्नो विशाल ‘सैबाह’ तेल क्षेत्रमा आक्रमण गर्न आएका चार ड्रोन खसालेको जनाएको छ ।
दुबई अन्तर्राष्ट्रिय विमानस्थलमा पनि विस्फोटको आवाज सुनिएपछि यात्रुलाई सुरक्षित स्थानमा सारिएको थियो । उडानहरू अवरुद्ध भएको थियो । कुवेतले पनि एउटा ड्रोनलाई बीचैमा नष्ट गरेको पुष्टि गरेको छ । फलस्वरूप, कुनै हताहती भएन ।
जोर्डनले एक सातामा इरानका तर्फबाट ११९ क्षेप्यास्त्र र ड्रोन प्रहार गरिएको र १४ जना घाइते भएका जनाएको छ । त्यहाँका सैन्य प्रवक्ता मुस्तफा हियारीका अनुसार, ती आक्रमण जोर्डनकै इलाकालक्षित थियो ।इजरायलले लेबनान र तेहरानमा तीव्र हवाई आक्रमण जारी राखेको छ ।
