भक्तपुर - नेपाली कम्युनिष्ट पार्टीका उम्मेदवार रामप्रसाद सापकोटा ‘दीपशिखा’ले आफ्नो चुनावी प्रतिबद्धता सार्वजनिक गरेका छन् । सोमबार मध्यपुर थिमि–२ स्थित दुईपोखरीमा आयोजित पत्रकार सम्मेलनमार्फत उनले सम्पदा संरक्षणदेखि रोजगारी सिर्जना र सुशासन, क्षेत्र विकास र जनसुविधा केन्द्रित रणनीति प्रस्तुत गरेका हुन् ।
उनले मध्यपुर थिमि र सूर्यविनायक क्षेत्रको ऐतिहासिक, धार्मिक र सांस्कृतिक महत्वलाई अन्तर्राष्ट्रिय बजारसम्म प्रभावकारी रूपमा पुर्याउन नसकिएको स्वीकार गर्दै अब पर्यटनमैत्री पूर्वाधार विकास, व्यवस्थित प्रचारप्रसार र निजी क्षेत्रसँग सहकार्य गरेर स्वदेशी तथा विदेशी पर्यटक आकर्षित गर्ने नीति अघि सारेका छन् ।
स्थानीय उत्पादन, हस्तकला र होमस्टेसँग पर्यटनलाई जोडेर रोजगार र आयआर्जन विस्तार गर्ने योजना पनि उनले प्रस्तुत गरे विशेष रूपमा स्थानीय पहिचान बोकेको ‘ऐला’लाई ब्रान्डका रूपमा विकास गरी परम्परागत घरेलु उत्पादनलाई उद्योगमा रूपान्तरण गर्दै दीर्घकालीन रूपमा विदेशी बजारमा प्रवर्द्धन गर्ने लक्ष्य रहेको उनले बताए ।
कृषि क्षेत्रमा पनि पर्यटनसँग समन्वय गर्दै तरकारी उत्पादनका पुराना केन्द्र पुनर्जीवित गर्ने प्रतिबद्धता व्यक्त गर्दै किसानलाई तालिम, आधुनिक प्रविधि, शीत भण्डारण र बजार सुनिश्चिततामार्फत सशक्त बनाइने स्पष्ट पारे। यसले ग्रामीण अर्थतन्त्र बलियो बनाउने मात्र होइन, युवा वर्गलाई पनि कृषि र पर्यटन क्षेत्रमा रोजगारीका अवसर दिने उनकाे भनाई छ।
युवा र विद्यार्थी लक्षित कार्यक्रममा सूचना प्रविधिमैत्री वातावरण निर्माण, स्टार्टअप र आईटी हब स्थापना, सार्वजनिक स्थानमा निःशुल्क इन्टरनेट सेवा विस्तार तथा सीपमूलक तालिममार्फत रोजगार र स्वरोजगारका अवसर सिर्जना गरिने योजना पनि उनले घोषणा गरे ।
स्वास्थ्य क्षेत्रमा ज्येष्ठ नागरिकलाई घरदैलोमै आधारभूत सेवा उपलब्ध गराउने, नगर अस्पतालको स्तरोन्नति र भक्तपुर स्वास्थ्य विज्ञान प्रतिष्ठान स्थापनाका लागि पहल गर्ने प्रतिबद्धता समेत उनले व्यक्त गर्नु भयो। नसर्ने रोगको नियमित परीक्षण, बीमा योजनाको प्रभावकारी कार्यान्वयन, खेलकुद पूर्वाधार विकास र खेलाडी प्रोत्साहन कार्यक्रम सञ्चालन हुने योजना पनि उनले प्रस्तुत गरे ।
उनले अव्यावहारिक सपना नदेखाइ सहज खानेपानी, समयमै चल्ने सार्वजनिक यातायात, सडक सरसफाइ, हरियाली विस्तार र स्वच्छ वातावरण निर्माणलाई व्यावहारिक लक्ष्यका रूपमा अघि सारेका छन्। सुशासनलाई मूल आधार मान्दै प्रशासनिक ढिलासुस्ती अन्त्य, भ्रष्टाचार नियन्त्रण, पारदर्शी सेवा प्रवाह, प्रभावकारी गुनासो सुनुवाइ संयन्त्र स्थापना, भूमि व्यवस्थासम्बन्धी सेवा स्थानीय तह मातहत ल्याउने पहल र स्थानीय अदालत स्थापनाको योजना पनि उनको घोषणापत्रमा समावेश छ।
भयमुक्त समाज निर्माण, गुण्डागर्दी नियन्त्रण र राजनीतिक विभेद अन्त्य गर्ने प्रतिबद्धता दोहोर्याउँदै “जनप्रतिनिधि जनताको सेवक हो” भन्ने मान्यतालाई व्यवहारमा उतार्ने दाबी उजले गरे।पत्रकार सम्मेलनमा नेकपाका समानुपातिक उम्मेदवार दिलिप प्रजापति ‘भीष्म’, बागमती प्रदेश सरकारका पूर्वमन्त्री डा. राजेन्द्रमान श्रेष्ठ, पार्टी नेता श्याम बस्नेतलगायतको उपस्थिति रहेको थियो। भक्तपुर–२ मा विभिन्न दल र स्वतन्त्र गरी ३२ जना उम्मेदवार प्रतिस्पर्धामा छन्।
